28 مامىر 2020, 16:08 693 0 اتاجۇرت باقىتبەك قادىر

شەتەلدەگى قانداستارعا ءبىلىم گرانتىن كوبەيتۋدى ۇسىندى

ۇلتتىق قوعامدىق سەنىم كەڭەسىنىڭ مۇشەسى اسىلبەك قوجاحمەتوۆ شەتەلدەگى قانداستارعا كوپتەپ گرانت ءبولۋدى ۇسىندى.

– بىزگە قانداستار ءۇشىن بولىنەتىن گرانت­تاردىڭ سانىن ارتتىرۋ كەرەك. سەبەبى شەتتەگى قازاقتاردى وتاندىق جوعارى وقۋ ورىن­دارىنا تارتا بىلسەك، ولاردى ەلدە قالدىرۋ مۇمكىندىك­تە­رى دە ارتا تۇسەدى، –  دەدى اسىلبەك قوجاحمەتوۆ ۇلت­تىق قوعامدىق سەنىم كەڭەسى­نىڭ كەزەكتى وتى­رىسىندا.

سونىمەن قاتار «ءبىلىم جانە عىلىم مينيستر­لىگىنىڭ جوو-لاردى اۆتونوميالاندىرۋ باعىتىنداعى جۇمىسىن قولدايتىنىن جەتكىزدى. «جوو-لارعا اۆتونوميالىق مارتە­بە بەرۋ – ولاردىڭ جاۋاپكەرشىلىگىن ارتتىرا تۇسەدى. ولارعا بارلىق قۇزىرەت بەرىلۋى كەرەك»، – دەدى كەڭەس مۇشەسى.

بۇل ماسەلە تۋرالى 30 ءساۋىر كۇنى گازەتى­مىزدىڭ №17 سانىندا «قانداستارعا ارنالعان ءبىلىم گرانتى شەتەل قازاعىن اتاجۇرتقا تارتۋدىڭ ەڭ نەگىزگى تەتىگى» دەگەن تاقىرىپتا ماقالا جازىلعان بولاتىن. اتالعان ماقا­لادا شەتەلدەن كەلگەن قازاق جاستارى­نىڭ گرانتپەن وقۋعا ءتۇسۋىنىڭ پايداسى – كوشى-قوندى جانداندىرۋدىڭ بىردەن-ءبىر جولى ەكەنى جانە قانداستاردىڭ ءبىلىم الۋىنا ءتيىمدى تەتىك ەكەنى باسا ايتىلعان ەدى.

پرەزيدەنتى جانىنداعى ۇلتتىق قوعام­دىق سەنىم كەڭەسىنىڭ مۇشەسى اۋىت مۇقيبەك ارىپتەسى اسىلبەك قوجاحمەتوۆتىڭ شەتەلدەگى قانداستارعا كوپتەپ گرانت ءبولۋ ۇسىنىسىنا قولداۋ ءبىلدىردى. ول قانداستار كوشىنىڭ ەكىنشى تولقىنى باستالۋعا جاقىن ەكەنىن ايتادى.

– ۇلتتىق قوعامدىق سەنىم كەڭەسىنىڭ بۇگىن­گى ءۇشىنشى وتىرىسىن قوعام ومىرىنە تىڭ بەتبۇرىس اكەلەتىن تاريحي وقيعا دەپ ايتۋعا بولادى. پاندەميا بۇكىل جەر شارىنداعى مەملەكەتتەردىڭ ءبارىن باسقاشا ستاندارتتارمەن ءومىر سۇرۋگە ءماجبۇر ەتتى. سونىڭ ىشىندە قازاقستان دا بار. وسى پاندەميا بارىسىندا پرەزيدەنت دەنساۋلىق ساقتاۋ، ءبىلىم، عىلىم، اۋىل شارۋاشىلىعى سالاسىنداعى كەم­شىلىكتەردىڭ ءبارىن ايتىپ ءوتتى. سوندىق­تان ءبىز ءوزىمىزدى-ءوزىمىز اسىراۋ دەگەن قاعيدات­تى ءبىرىنشى ورىنعا قويۋعا ءتيىسپىز. ول ءۇشىن عىلىم مەن ءبىلىم، دەنساۋلىق ساقتاۋ سالاسىن كەمەلدەندىرۋ كەرەك. وسىعان بايلانىستى ۇلتتىق كەڭەستىڭ مۇشەلەرى بۇگىن ءوز تاراپىنان وتە قۇندى ۇسىنىستاردى ورتاعا سالدى.

بىراق بۇل كۆوتا دا ازدىق ەتەدى. سەبەبى قازاق كوشىنىڭ ەكىنشى ۇلكەن تولقىنى باستالايتىن دەپ تۇر. قازاقستاندا ولاردى قۇجات­تان­دىراتىن زاڭدىق نەگىز دايىن دەپ ايتۋعا بولادى. ايتسە دە، تولىقتىرار تۇستار دا بارشىلىق. ماسەلەن قانداستاردى باسپانامەن، جەرمەن قامتۋ جاعى سەكىلدى ماسەلە­لەردى ناقتىلاي ءتۇسۋ كەرەك.

قازاقستانداعى دەموگرافيالىق توقىراۋ سوعان ماجبۇرلەپ وتىر. ول كۇن دە الىس ەمەس. ەرتەڭ بە، بۇرسىگۇنى مە ول كوشتىڭ ۇلكەن تولقىنى باستالادى. سوعان دايىن بولۋىمىز، ەڭ الدىمەن، كەلگەن جاستاردى وقىتىپ، ءبىلىم بەرۋىمىز كەرەك. سوندىقتان مەنىڭ ويىمشا، 4 پايىز گرانت ازدىق ەتەدى. مەن ونى كەمىندە 10 پايىزعا كوبەيتۋدى ۇسىنار ەدىم. ولار قازاق­ستانعا قازىر قاجەتتى اۋىل شارۋاشىلى­عى سالاسىنا كەرەك ماماندىق­تاردى ۇيرەنۋى ءتيىس، – دەدى اۋىت مۇقيبەك.

سوڭعى جاڭالىقتار