29 مامىر, 14:22 928 0 زاڭ انار لەپەسوۆا

تۇركىستان وبلىسىندا 15 جىل ىزدەۋدە جۇرگەن قىلمىسكەر ۇستالدى

تۇركىستان وبلىسى پد كريمينالدىق پوليتسيا قىزمەتكەرلەرى بۇرىن اۋىر قىلمىس جاساعانى ءۇشىن ىزدەستىرىلگەن ەكى قىلمىسكەردى قولعا ءتۇسىردى، دەپ حابارلايدى وڭىرلىك پوليتسيا دەپارتامەنتىنىڭ ءباسپاسوز قىزمەتى.

تۇركىستان وبلىسى پد باستىعىنىڭ ورىنباسارى پوليتسيا پودپولكوۆنيگى قۇرمانبەك ساحوۆتىڭ ايتۋىنشا، كەنتاۋ قالاسىنىڭ پب-نە اۋرۋحانادان پىشاق جاراقاتىمەن جاس جىگىتتىڭ جەتكىزىلگەنى جونىندە حابارلاما كەلىپ تۇسكەن.

تەكسەرۋ بارىسىندا جابىرلەنۋشى كەنتاۋ قالاسىنداعى كافەلەردىڭ بىرىندە جاراقات العانى انىقتالدى. وسى جايت بويىنشا 2005 جىلى قر قك 106-بابى 2-بولىمىنە سايكەس قىلمىستىق ءىس قوزعالىپ، كۇدىكتىگە ىزدەۋ جاريالاندى. ول سول ارالىقتاردا بوي تاسالاپ، قاشىپ جۇرگەن.

«وسى جىلدار بويى پوليتسيا قىزمەتكەرلەرى جەدەل-ىزدەستىرۋ شارالارىن توقتاتقان جوق. ولار تانىستار شەڭبەرىن جانە جاسىرىنعان قىلمىسكەر تۇراتىن مەكەنجايدى انىقتادى. 15 جىلدان كەيىن پوليتسيا قىزمەتكەرلەرى ىزدەستىرىلىپ جاتقان ەر ادامنىڭ ىزىنە شىعىپ، ونى تۇركىستان وبلىسىنىڭ ءبىر ەلدى مەكەنىنەن ۇستادى.

سونداي-اق 2015 جىلى تۇركىستان قالاسىنىڭ پب-نە جاس ايەلدىڭ زورلانعانى جونىندە ارىز كەلىپ تۇسكەن. وسى وقيعا بويىنشا پوليتسيادا قر قك-ءنىڭ 120-بابى بويىنشا قىلمىستىق ءىس قوزعالدى. الايدا، قىلمىسكەر قىلمىستىق قۋدالاۋدان جاسىرىنىپ ۇلگەرگەن. بەس جىل بويى 35 جاستاعى ەر ادامدى ىزدەستىرۋ ءىسى جۇرگىزىلدى. 2020 جىلى مامىر ايىنىڭ ورتاسىندا تۇركىستاندىق جەدەل ۋاكىلدەر كەنتاۋ قالاسىنىڭ ماڭىنداعى ساياجاي القابىندا كۇدىكتىنى ۇستادى. تەرگەۋ بارىسىندا پوليتسەيلەر ونىڭ وسى ۋاقىت ارالىعىندا پاۆلودار وبلىسىندا جاسىرىنعانىن انىقتادى. ول جاقتا دا وسىعان ۇقساس قىلمىس جاساپ، وقۋشى قىزدى جابىرلەپ، تۋعان ولكەسىنە قايتا ورالعان. زورلىقشى تەرگەۋ يزولياتورىندا جانە جاقىن ارادا پاۆلودار وبلىسىنا ەتاپپەن اپارىلادى. وندا وعان قاتىستى ءبىزدىڭ ارىپتەستەرىمىز سوتقا دەيىنگى تەرگەۋ امالدارىن جۇرگىزىپ، كامەلەتكە تولماعاندارعا قاتىستى زورلىق-زومبىلىق جاساۋ جايتى بويىنشا ءىستى سوتقا جىبەرەدى»، دەيدى قۇرمانبەك ساحوۆ.

اتاپ وتەر بولساق، جىل باسىنان بەرى تۇركىستان وبلىسى پد پوليتسەيلەرى 52 قىلمىسكەردى قولعا ءتۇسىردى، ولاردىڭ 10-ى اۋىر جانە اسا اۋىر قىلمىستارى ءۇشىن ىزدەستىرىلۋدە جۇرگەندەر.

 

سوڭعى جاڭالىقتار