28 مامىر, 18:59 420 0 زاڭ انار لەپەسوۆا

قىمبات زاتتار ۇتىسى تۋرالى حابارلاما تاراتقان الاياق 40 ادامدى الداپ سوققان

پاۆلودار وبلىسىندا ينتەرنەت الاياقتىقتىڭ ەڭ كوپ تارالعان ءتۇرى – ينتەرنەتتە مۇلىكتى ساتۋ مەن جالعان ۇتىستار تۋرالى حابارلامالاردى تاراتۋ، دەپ حابارلايدى Pavlodarnews.kz.

بيىل 4 اي ىشىندە وبلىستا 250 الاياقتىق فاكتىسى تىركەلدى. ولاردىڭ 70-80%-ى ينتەرنەت الاياقتىق ساناتىنا جاتادى.

«الاياقتار ازاماتتاردىڭ سەنىمىن پايدالانا وتىرىپ، قۇنىن تومەندەتىپ، قانداي دا ءبىر مۇلىكتى ساتۋ تۋرالى حابارلاندىرۋلار جاريالايدى»، - دەدى ونلاين كونفەرەنتسيا بارىندا وبلىستىق پد باستىعى نۇرلان ءماسىموۆ.

قاراجاتىن ۇنەمدەگىسى كەلەتىن حالىق مۇنداي ارانداتۋلارعا الدانىپ قالادى. سونداي-اق جالعان ۇتىستار تۋرالى حابارلامالارعا سەنەدى. مىسالى، مامىر ايىنىڭ باسىندا وبلىس ورتالىعىندا جالعان SMS جىبەرگەن 36 جاستاعى تۇرعىن ۇستالدى. ول ءتۇرلى ۇيىمداردىڭ قىزمەتكەرى بولىپ، قىمبات گادجەتتەردىڭ، تۇرمىستىق تەحنيكانىڭ، اۆتوكولىكتىڭ ۇتىسى تۋرالى حابارلاعان. بۇعان پاۆلودار وبلىسىنان عانا ەمەس، بارلىق وڭىرلەردەن دە 40-تان استام ازامات الدانىپ قالعان.

پد باستىعى سونداي-اق جەرگىلىكتى الاياقتار باسقالاردىڭ اتتارىنا ونلاين-نەسيە راسىمدەيتىن فاكتىلەر بار ەكەنىن اتاپ ءوتتى.

«ينتەرنەتتەگى الاياقتىقتى انىقتاۋ قيىن. ويتكەنى ولار ءارتۇرلى سايتتار قولدانادى. قۇجاتتاردى باسقا بىرەۋلەردىڭ اتىنا راسىمدەيدى. بۇكىل جۇيەنى اشۋ وتە قيىن. وسىنداي جاعدايلار بويىنشا جۇمىس ىستەپ جاتىرمىز. بىزدە ارنايى الاياقتىق ءبولىم بار. بىراق مەن ولاردىڭ جۇمىسىنىڭ بارلىق قۇپيالارىن ايتا المايمىن»، - دەيدى نۇرلان ءماسىموۆ.

پوليتسيا دەپارتامەنتى ەلەكتروندى جەكە شوتتارعا نەمەسە «امياندارعا» اقشا اۋدارۋ ارقىلى ۇتىس سالىعى تولەنبەيتىنىن ەسكە سالادى. سونداي-اق جەكە مالىمەتتەر مەن بانكتىك شوتتار تۋرالى اقپاراتتى بەرمەۋگە كەڭەس بەرەدى.

سوڭعى جاڭالىقتار