28 مامىر, 16:14 421 0 ساياسات انار لەپەسوۆا

قاسىم-جومارت توقاەۆ نۇرلان ەرمەكباەۆتىڭ ەسەبىن تىڭدادى

قازاقستان پرەزيدەنتى – قارۋلى كۇشتەردىڭ جوعارعى باس قولباسشىسىنا قازاقستان ارمياسىنىڭ شتاتتىق قۇرىلىمىن وڭتايلاندىرۋ ماقساتىندا جۇرگىزىلىپ جاتقان جۇمىستار، قارۋ-جاراقتاردى، اسكەري تەحنيكا مەن وق-دارىلەردى ينۆەنتاريزاتسيالاۋ جانە تەكسەرۋ، كوروناۆيرۋس ىندەتىنىڭ تارالۋىنا قارسى كۇرەس، سونداي-اق، جۇزەگە اسىرىلىپ جاتقان ءىرى ينفراقۇرىلىمدىق جوبالار تۋرالى باياندالدى.

بۇل تۋرالى اقوردانىڭ ءباسپاسوز قىزمەتى حابارلادى.

قورعانىس ءمينيسترى مەملەكەت باسشىسىنا قازىرگى ۋاقىتتاعى سىن-قاتەرلەردى ەسكەرە وتىرىپ، قارۋلى كۇشتەردىڭ جاڭا كەلبەتىن قالىپتاستىرۋ، ءتۇرلى تابيعي جانە تەحنوگەندىك توتەنشە جاعدايلاردى جويۋ كەزىندە اسكەري قىزمەتشىلەردى جۇمىلدىرۋ مۇمكىندىگى مەن قاجەتتىگى جايىندا مالىمەت بەردى.

سونىمەن قاتار قاسىم-جومارت توقاەۆ نۇرلان ەرمەكباەۆتىڭ اسكەري بولىمشەلەردىڭ دايىندىعى، مەملەكەتتىك قورعانىس سالاسىنداعى تاپسىرىس ماسەلەلەرى، بيۋدجەت مۇمكىندىكتەرىن ەسكەرە وتىرىپ، اسكەري تەحنيكامەن جابدىقتاۋ، قورعانىس مينيسترلىگىن اۆتوماتتاندىرۋ جانە تسيفرلاندىرۋ جونىندەگى ەسەبىن تىڭدادى.

جوعارعى باس قولباسشى ەلىمىزدىڭ قورعانىس قابىلەتىن كۇشەيتۋدى، قارۋلى كۇشتەردىڭ جابدىقتالۋىن جاقسارتۋدى، شىعىنداردى وڭتايلاندىرۋدى، اسكەري قىزمەتشىلەردىڭ ءبىلىم دەڭگەيىن كوتەرىپ، بىلىكتىلىگىن ارتتىرۋ مۇمكىندىكتەرىن پىسىقتاۋدى تاپسىردى.

 

سوڭعى جاڭالىقتار