28 مامىر, 13:45 724 0 زاڭ انار لەپەسوۆا

سپورت كوميتەتى توراعاسىنىڭ ورىنباسارلارى بيۋدجەتتىڭ 380 ملن تەڭگەسىن جىمقىرعان

سپورت جانە دەنە شىنىقتىرۋ ىستەرى كوميتەتى توراعاسىنىڭ ورىنباسارلارى تۇتقىندالدى. 

بۇل جونىندە قر سىبايلاس جەمقورلىققا قارسى ءىس-قيمىل اگەنتتىگى 1-ءشى دەپارتامەنتىنىڭ اسا ماڭىزدى ىستەر جونىندەگى تەرگەۋشىسى دانيار بيعايداروۆ مالىمدەدى.

«شىعىس قازاقستان وبلىستىق سىبايلاس جەمقورلىققا قارسى قىزمەتى سوتقا دەيىنگى تەرگەۋ بارىسىندا اسا ءىرى كولەمدە بيۋدجەت قاراجاتىن جىمقىرۋ فاكتىلەرى بويىنشا قر قىلمىستىق-پروتسەسسۋالدىق ءىس جۇرگىزۋ كودەكسىنىڭ 128-بابىنا سايكەس، قازاقستان رەسپۋبليكاسى مادەنيەت جانە سپورت مينيسترلىگىنىڭ سپورت جانە دەنە شىنىقتىرۋ كوميتەتى توراعاسىنىڭ بۇرىنعى جانە قازىرگى ورىنباسارلارىن ۇستاپ، وسكەمەن قالاسىنداعى ۋاقىتشا ۇستاۋ يزولياتورىنا قامادى»، - دەدى ول اگەنتتىك الاڭىندا وتكەن ونلاين بريفينگ بارىسىندا.

ونىڭ اتاپ وتۋىنشە، ۇستالعانداردىڭ بىرەۋىنە قاتىستى سوت 2 اي مەرزىمگە «قاماۋعا الۋ» تۇرىندەگى بۇلتارتپاۋ شاراسىن سانكتسيالادى.

دانيار بيعايداروۆتىڭ ايتۋىنشا، كوميتەت توراعاسىنىڭ ورىنباسارلارى ريددەر قالاسىنداعى «رەسپۋبليكالىق مامانداندىرىلعان وليمپيادالىق رەزەرۆتىك مەكتەپ-ينتەرناتى» رمم-ءنىڭ 300 ورىنعا ارنالعان وقۋ كورپۋسى» قۇرىلىس نىسانىن سالۋ كەزىندە ءىس جۇزىندە ورىندالماعان جۇمىس ءۇشىن مەردىگەردىڭ شوتىنا 380,8 ملن تەڭگە سوماسىندا بيۋدجەت قاراجاتىن اۋدارۋ ارقىلى جىمقىردى دەگەن كۇدىككە ىلىنگەن.

قازىرگى ۋاقىتتا اتالعان فاكتىلەر بويىنشا سوتقا دەيىنگى تەرگەۋ جۇرگىزىلۋدە، تەرگەۋ مۇددەلەرى ءۇشىن باسقا اقپارات جاريا ەتىلمەيدى.

سوڭعى جاڭالىقتار