28 مامىر, 11:14 402 0 ءبىلىم ارايلىم بيمەنديەۆا

تۇركىستان وبلىسىندا ۇبت-عا 18 634 تۇلەك قاتىسادى 

Nur Otan پارتياسىنىڭ تۇركىستان وبلىستىق فيليالى ءوڭىر تۇرعىندارىنا ارناپ تىكەلەي ەفير ۇيىمداستىردى. تۇركىستان وبلىستىق ادامي الەۋەتتى دامىتۋ باسقارماسىنىڭ باسشىسى  راقىمبەك جولاەۆ 2019-2020 وقۋ جىلىن قورىتىندىلاپ، ءبىلىم سالاسىنداعى جاڭالىقتارمەن ءبولىستى.
راقىمبەك جولاەۆتىڭ ايتۋىنشا، پاندەميا قاۋپىنە بايلانىستى بيىلعى ۇلتتىق بىرىڭعاي تەستىلەۋىندە ساقتىق كۇشەيتىلەدى.
«ۇلتتىق بىرىڭعاي تەستىلەۋ 20 ماۋسىم مەن 5 شىلدە ارالىعىندا وتەدى. وتكىزۋ ەرەجەسى بۇرىنعىداي. دەگەنمەن ءار اۋديتورياداعى تەستىلەۋگە قاتىسۋشىلار سانى 2 ەسەگە ازايادى. مىسالى، بۇرىن ءار پارتادا ءبىر تۇلەك تەست تاپسىرسا، ەندى ەكى مەتر كولەمىندە ارا-قاشىقتىق ساقتالادى. بارلىق تەست وتكىزۋ پۋنكتەرى جىلۋ تەكسەرگىش قۇرالدارىمەن، جەدەل جاردەم پۋنكتەرىمەن، دەزينفەكتسيالاۋ تۋننەلدەرىمەن، سانيتارلىق تازارتقىشتارمەن، رەسپيراتورلىق ماسكالارمەن، قولعاپتارمەن قامتاماسىز ەتىلەدى. سونىمەن بىرگە 3-4 ماۋسىم كۇندەرى سانيتارلىق تالاپتاردى ساقتاي وتىرىپ، تۇلەكتەر ءۇشىن مەكتەپپەن قوشتاسۋ سالتاناتتى ءىس-شارالارىن وتكىزۋدى جوسپارلاپ وتىرمىز. مەكتەپتىڭ اۋلاسىندا قىسقا عانا ۋاقىتقا سوزىلاتىن جيىنعا سىنىپ جەتەكشىسى مەن بىرنەشە ۇستاز جانە شەكتەۋلى دەڭگەيدە اتا-انالار عانا قاتىستىرىلادى. قاتىسۋشىلار تۇگەل ماسكا كيىپ، ارا-قاشىقتىقتى ساقتاۋى ءتيىس. تۇلەكتەردىڭ ومىرىندەگى ەرەكشە ساتكە ارنالعان ءىس-شارا ءوتۋى ءتيىس ويلايمىن»، – دەدى ول.
بيىل تۇركىستان وبلىسى بويىنشا  11 سىنىپتى   24 658 وقۋشى ءبىتىردى.  كوروناۆيرۋس پاندەمياسىنا بايلانىستى ۇبت-عا ءوتىنىش بەرۋ ءراسىمى ونلاين جانە ءداستۇرلى تۇردە جۇرگىزىلدى. وبلىس بويىنشا تەستىلەۋگە 24 658 ءبىتىرۋشىنىڭ 18 634-ءى ءوتىنىش بەردى. بۇل جالپى تۇلەكتەردىڭ 75,5 پايىزىن قۇرايدى. ءبىر ايتا كەتەرلىگى، ءوتىنىش بەرۋشىلەر سانى 7 پايىزعا كوبەيگەن. بىلتىر تۇلەكتەردىڭ 68,8 پايىزى تەستىلەۋگە قاتىسۋعا ءوتىنىش بەرگەن بولاتىن. ياعني، قاۋىپتى ىندەت تۇلەكتەردىڭ بىلىمگە دەگەن قۇلشىنىسىنا كەدەرگى كەلتىرە الماعان.
وبلىستا ۇلتتىق بىرىڭعاي تەستىلەۋدى وتكىزۋگە ارنالعان 15 پۋنكت ازىرلەنگەن. شالعاي اۋىلداردا تۇراتىن 11 200 وقۋشىنى ۇبت وتكىزۋ ورىندارىنا تاسىمالداۋ ءۇشىن ءتيىستى قارجى قارالعان. وبلىستا كوپبالالى جانە از قامتىلعان وتباسىلاردىڭ بالالارى ءۇشىن مەملەكەت تاراپىنان قوسىمشا گرانتتار دا قارالادى. ول ءۇشىن ءاربىر تۇلەك ەڭ تومەنگى 50 باللدان جوعارى جيناۋى ءتيىس.
باسقارما باسشىسى وبلىس اۋماعىن كەڭ جولاقتى ينتەرنەتپەن تولىق قامتاماسىز ەتۋ باعىتىندا جۇمىستار باستالعانىن، ەگەر پاندەميا جالعاسقان جاعدايدا ءاربىر اتا-انا بالالارىن قاجەتتى قۇرىلعىلار – سمارتفون، پلانشەت، نوۋتبۋكپەن قامتاماسىز ەتۋگە كۇش سالۋلارى كەرەكتىگىن ايتتى.
«ءبىز 1 قىركۇيەكتە ءداستۇرلى وقۋ جۇيەسىنە كوشىپ، وقۋ جىلىن مەكتەپتەردە قارسى الۋعا ۇمىتتەنىپ وتىرمىز. كارانتين توقتاسا، وقۋشىلارىمىزدى جازعى ساۋىقتىرۋ لاگەرلەرىنە جىبەرۋگە دە دايىنبىز. دەمالىس ورىندارى ساقاداي-ساي. بىراق قاۋىپتى ىندەتتىڭ تارالۋى توقتاماسا، قاشىقتىقتان وقىتۋعا ءماجبۇر بولامىز»، – دەدى ر.جولاەۆ.

سوڭعى جاڭالىقتار