27 مامىر 2020, 11:35 1662 0 سپورت انار لەپەسوۆا

اۋىر اتلەتيكادان ۇلتتىق قۇراماعا جاڭا باس باپكەر تاعايىندالدى

اۋىر اتلەتيكادان قازاقستان ۇلتتىق قۇراماسىنىڭ باس باپكەرى اۋىستى. يۋري مەلنيكوۆتىڭ ورنىنا باقىت احمەتوۆ كەلدى، دەپ حابارلايدى  فەدەراتسيانىڭ ءباسپاسوز قىزمەتى.

باقىت احمەتوۆ - بۇرىننان بەلگىلى قازاقستاندىق اۋىر اتلەت. 2004 جىلى ازيا چەمپيونى، 2007 جىلى ازيا چەمپيوناتىنىڭ قولا جۇلدەگەرى، 2002 جىلى ازيا ويىندارىنىڭ چەمپيونى جانە 2006 جىلى ازيا ويىندارىنىڭ قولا جۇلدەگەرى بولعان. 2008 جىلى قىتايدا وتكەن جازعى وليمپيادا ويىندارىندا قازاقستاننىڭ تۋىن كوتەرىپ شىققان.

ونىڭ باسشىلىعىمەن 2009 جىلدان باستاپ جاسوسپىرىمدەر مەن جاستار قۇراماسى حالىقارالىق ارەنادا جوعارى سپورتتىق ناتيجە كورسەتكەن. باقىت بەشىمبەكۇلىنىڭ شاكىرتتەرى ۇلتتىق قۇرامانىڭ ساپىندا دا بار. جازيرا جاپپارقۇل، الەكساندر زايچيكوۆ، كارينا گوريچەۆا، البەرت ليندەر جانە يگور سون سياقتى سپورتشىلاردى باقىت احمەتوۆ تاربيەلەگەن.

«قازىر ۇلتتىق قۇراما جاڭعىرۋ كەزەڭىن وتكەرۋدە. وسى جىلدان باستاپ ەرەسەكتەر قۇراماسىنىڭ قۇرامىنا جاستاردان راحات بەكبولات، نۇرعيس ادىلەتۇلى، سايحان تايسۋەۆ، سايرامكەز اقمولدا، كارينا قۇزعانباەۆا، داريا احمەروۆا جانە گۇلنۇر ىبىراي ەندى. باقىت احمەتوۆتىڭ ۇيلەستىرۋىمەن كوماندانى نىعايتۋ جوسپارلانىپ وتىر. ءبىز باقىت بەشىمبەكۇلىن تاجىريبەلى جاس جاتتىقتىرۋشى جانە كاسىبي مەنەدجەر رەتىندە بىلەمىز. وسىعان وراي ونى ەرەسەكتەر قۇراماسىنا اۋىستىرۋ تۋرالى شەشىم قابىلداندى.يۋري الەكساندروۆيچكە كوپ راحمەت. ول ۇلتتىق قۇرامانى قيىن كەزەڭدە باسقاردى. ونىڭ باسشىلىعىمەن ءبىزدىڭ سپورتشىلار جوعارى ناتيجەگە جەتتى»، - دەدى اۋىر اتلەتيكا فەدەراتسياسىنىڭ اتقارۋشى ديرەكتورى الديار نۇرالينوۆ.

 

سوڭعى جاڭالىقتار