27 مامىر, 10:58 285 0 جاڭالىقتار انار لەپەسوۆا

"قازاقمىستىڭ" 300 قىزمەتكەرى كوروناۆيرۋس جۇقتىرعان

قاراعاندى وبلىسىنداعى "قازاقمىس" كورپوراتسياسىنىڭ 300 جۇمىسشىسىنان كوروناۆيرۋس تابىلدى.

بۇل اقپاراتتى وبلىس اكىمى جەڭىس قاسىمبەك راستاپ وتىر، دەپ حابارلايدى  استانا ارناسى.

تەمىرتاۋداعى "قازاقمىس" كورپوراتسياسىنىڭ "نۇرقازعان" كەنىشى كارانتين اياقتالعانعا دەيىن جۇمىسىن توقتاتۋعا ءماجبۇر بولعان. سەبەبى كاسىپورىن قىزمەتكەرلەرى اراسىندا كوروناۆيرۋستىڭ تارالاۋى كۇننەن-كۇنگە ارتقان. ەندى كومپانيا جۇقپالى اۋرۋدى اۋىزدىقتاۋ ءۇشىن بار كۇشىن سالىپ، جەدەل شارالاردى قولدانۋعا كىرىسكەن ەكەن.

"نۇرقازعاندا 300-دەن استام ادام اۋرۋ جۇقتىرعان. جۇمىسشىلاردىڭ وزدەرى جانە ولاردىڭ وتباسى مۇشەلەرىندە باقىلاۋعا الدىق. كۇن سايىن بىرنەشە جاعداي راستالىپ جاتىر. ول مەردىگەرلىك جانە قوسالقى مەردىگەرلىك ۇيىمداردىڭ جۇمىسشىلارى جانە كەنشىلەردىڭ تۋىستارى. ءبىز كارانتيننەن كەيىن ۆاحتالىق ادىسپەن 14-15 كۇندىك جۇمىسقا اۋىستىرۋدى جوسپارلاپ وتىرمىز", – دەيدى قاراعاندى وبلىسىنىڭ اكىمى جەڭىس قاسىمبەك.

سونىمەن قاتار ءوڭىر باسشىسى بۇقار جىراۋ اۋدانىنىڭ تۇرعىندارى كارانتينگە قاراماستان وتباسىلىق مەرەكەنى جاسىرىن تۇردە وتكىزگەنىن ايتتى.

"وكىنىكشە قاراي، قوناقتاردىڭ اراسىندا كەسەلدى جۇقتىرعان ازاماتتاردا بولعان" ، – دەيدى جەڭىس قاسىمبەك.

"بۇقار جىراۋ اۋدانىندا مەرەكەلىك جيىن وتكىزگەن ۇيدە 27 ادام بولعان. ولاردىڭ بارلىعىنان COVID-19-عا ساراپتاما جۇرگىزىلدى. ناتيجەسىندە كوروناۆيرۋستىق ينفەكتسيا 7 قوناق پەن ءۇي قوجايىنىنان انىقتالدى", – دەيدى قاراعاندى وبلىسىنىڭ اكىمى.

ايتا كەتەيىك، بۇگىندە جالپى قاراعاندى وڭىرىندە كوروناۆيرۋس جۇقتىرعان 662 ادام تىركەلگەن.

سوڭعى جاڭالىقتار