26 مامىر, 21:41 485 0 جاڭالىقتار اسىل تۇمار

كارانتين جىلجىمايتىن مۇلىك نارىعىنا قالاي ىقپال ەتتى – ساراپشى پىكىرى

سۋرەت عالامتوردان الىندى
سۋرەت عالامتوردان الىندى

كارانتين ەلىمىزدەگى جىلجىمايتىن مۇلىك نارىعىنا ىقپال ەتتى. اتاپ ايتقاندا، مۇلىكتى ساتۋ، جالعا بەرۋ نارىعىندا توقىراۋ بايقالعان. بۇعان قازاقستان ريەلتورلارى بىرىككەن قاۋىمداستىعىنىڭ پرەزيدەنتى لاريسا ستەپانەنكو تالداۋ جاسادى، – دەپ جازدى قازاقپارات.

«بۇگىندە كوپتەگەن ستۋدەنتتەر، جاس ماماندار، كونتراكتىمەن جۇمىس ىستەپ جۇرگەن جاستار قالادان كەتتى. ولاردىڭ كوپشىلىگى پاتەردى جالعا الىپ جۇرگەن. كارانتين كەزىندە كوپتەگەن پاتەرلەر بوساپ قالدى»، – دەدى لاريسا ستەپانەنكو.

سونىمەن قاتار، كارانتيننەن كەيىن اسا قىمبات ەمەس حوستەلدەر، جاتاقحانالارعا سۇرانىس ارتتى.

«سوندىقتان، قازىر جالعا بەرۋ نارىعىندا باعا ءتۇسىپ جاتىر. ال ساتۋ نارىعىندا باعا ءالى تۇسپەدى. وعان دوللاردىڭ وسكەنى ىقپال ەتىپ جاتىر. ءبىز جىلجىمايتىن مۇلىك سالاسىنىڭ قىزمەتكەرلەرى، ريەلتورلار ۇنەمى ساتۋشىلارعا ايتامىز. بۇل نارىققا دوللاردىڭ قاتىسى قانشا؟ ادامدار جالاقىنى تەڭگەمەن الادى. بۇعان دەيىن ساتىلماعان ءۇيىڭىز قازىر قىمبات باعاعا ساتىلاتىنىنا سەنەسىز بە دەگەن ساۋالدار قويامىز. ەكونوميكانىڭ قاراپايىم زاڭىن دا ەسكەرۋ كەرەك، تەك سۇرانىس ۇسىنىستان اسقاندا عانا باعا كوتەرىلۋى ءتيىس. قازىر نارىقتا كەرىسىنشە، سۇرانىس جوق. سوندىقتان باعا نەگىزسىز كوتەرىلىپ وتىر»، – دەدى ل.ستەپانەنكو.

ونىڭ ايتۋىنشا، جالعا الۋ نارىعىندا كوبىنەسە قازاقستاننىڭ وڭتۇستىگى مەن سولتۇستىگىندەگى ءىرى قالالاردا سۇرانىس كوپ. سونداي-اق، جەكەمەنشىك ۇيلەرگە قىزىعۋشىلىق ارتقان.

«ءىرى قالالاردا ادامدار جەكەمەنشىك ءۇيدى جالعا الىپ بولماسا ساتىپ الۋعا ءوتىنىم بەرە باستاعان. الايدا، مامان كارانتين اياسىندا بولجام ايتۋعا بولمايتىنىن ايتتى. بۇل ءبىزدىڭ سالا ءۇشىن تاجىريبە بولدى. نارىققا ادامي فاكتوردان بولەك فاكتورلار دا ىقپال ەتە الاتىنىن كورسەتتى. تۇتاس ەلدەردىڭ نارىعىنا الەمدەگى احۋال ءبىر ساعاتتا-اق ىقپال ەتە الاتىنى انىق بولدى. قازىر كوپ ەل جابىق، ادامدار دەمالۋعا قاشان شىعارى بەلگىسىز. تىم بولماعاندا ىشكى تۋريزم جاندانادى دەگەن ءۇمىت بار. ال جالعا الۋ نارىعىندا جاز ماۋسىمىندا ىلگەرىلەۋ بولمايتىنى انىق. جالعا الۋشىلار پاتەردى شەكەسىنەن شەرتىپ ءجۇرىپ تاڭداي الادى»، – دەدى لاريسا ستەپانەنكو.

توتەنشە جاعداي رەجيمى اياقتالعان سوڭ كارانتين كەزىندە ۋاقىتشا توقتاپ قالعان ساتۋ-ساتىپ الۋ تۋرالى مامىلەلەر اياقتالدى. الايدا، نارىقتا سوندا دا بەلسەندىلىك بايقالمايدى. ساتىپ الۋشىلاردان ساتۋشىلار وتە كوپ. «كوپتەگەن ادامدار ءۇشىن ءۇي ساتىپ الۋ كەيىنگە قالدىرىلدى. ادامدار ەندى اقشاسىن جينايتىن بولادى»، – دەدى سپيكەر.

لاريسا ستەپانەنكو باسپانا نارىعىنداعى «5-10-20 باعدارلاماسىن» جاقسى باعالادى.

«وسى باعدارلامانى جاساۋ تۋرالى تاپسىرما جاقىندا عانا شىقتى. قازىر ازىرگە ونىڭ قانداي شارتى بار ەكەنىن بىلمەيمىز»، – دەدى ول.

سوڭعى جاڭالىقتار