26 مامىر, 17:51 536 0 جاڭالىقتار اسىل تۇمار

ەلوردانى تولىعىمەن گازداندىرۋ ماسەلەسى قاشان شەشىلەدى – اكىمدىك جاۋابى

سۋرەت عالامتوردان الىندى
سۋرەت عالامتوردان الىندى

ەلوردانى تولىعىمەن گازداندىرۋ 2025 جىلى اياقتالادى دەپ جوسپارلانعان. الايدا بۇل ماسەلە مەجەلى ۋاقىتتان ەكى جىل ەرتە شەشىلۋى مۇمكىن. بۇل تۋرالى نۇر-سۇلتان قالاسى اكىمىنىڭ ورىنباسارى التىنبەك قايساعاليەۆ مالىمدەدى، – دەپ جازدى قازاقپارات.

«نۇر-سۇلتان قالاسىندا 22 مىڭنان استام تۇرعىن ءۇي بار. سونىڭ ءبارى تابيعي گازعا اۋىستىرىلادى. قازىر ولار جانار-جاعارماي ارقىلى نەمەسە كومىرمەن جىلىتىلىپ وتىر. ياعني اۋاعا شىعارىلاتىن زياندى زاتتار وتە كوپ. ءۇش كەزەڭنەن تۇراتىن قالانى گازداندىرۋ باعدارلاماسى قابىلدانعان. ءۇش كەزەڭنىڭ بىرىنشىسىنە كىرىسىپ كەتتىك. ءبىرىنشى كەزەڭنىڭ ءوزى 9 ىسكە قوسۋ كەشەنىنەن تۇرادى. ونىڭ ءبارى بويىنشا كونكۋرستىق پروتسەدۋرالار ءوتىپ، بۇگىنگى كۇنى مەردىگەر كومپانيالار بەلگىلەنىپ، قۇرىلىس جۇمىستارى باستالىپ كەتتى»، – دەدى «ASTANA TV» تەلەارناسىنداعى Elorda live-تا بەرگەن سۇحباتىندا.

قالا اكىمىنىڭ ورىنباسارىنىڭ ايتۋىنشا، جوسپارعا سايكەس 2025 جىلعا دەيىن نۇر-سۇلتان قالاسىن تولىعىمەن گازبەن قامتۋ جوسپارى بار.

«دەگەنمەن، بۇگىنگى كۇنى جۇمىس قارقىندى جۇرگىزىلىپ جاتقاندىقتان، قاراجات ۋاقىتىندا ءبولىنىپ، ىستەر تىندىرىلاتىن بولسا – 2023 جىلعا دەيىن ءۇش كەزەڭ بويىنشا جۇمىستى تولىقتاي اياقتاعىمىز كەلىپ وتىر»، – دەدى ول.

سونىمەن قاتار، ول بيىل قالانىڭ قاي تۇرعىن ءۇي الاپتارىنا گاز قوسىلاتىنىن ايتىپ ءوتتى.

«نۇر-سۇلتان قالاسىنا العاشقى گاز بيىل كوكتال-1, كوكتال-2, اگروقالاشىق تۇرعىن الاپتارىن گازبەن ءبىرىنشى كەزەڭدە قامتيتىن بولامىز. بيىل سونىمەن قاتار جەكە تۇرعىن ۇيلەر دە گازعا قوسىلادى. ودان بولەك وسى جىلى گازعا قوسىلاتىن مەملەكەتتىك جانە مەملەكەتتىك ەمەس الەۋمەتتىك نىساندار دا بار. بۇل كەشەندى تۇردە جۇرگىزىلەتىن جۇمىس»، – دەدى التىنبەك قايساعاليەۆ.

سوڭعى جاڭالىقتار