26 مامىر, 13:45 618 0 جاڭالىقتار اسىل تۇمار

42 500 تەڭگە الۋعا 8 ميلليون ادام ءوتىنىش بەرگەن

قر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى اقمادي سارباسوۆ توتەنشە جاعداي كەزىندە كىرىسىنەن ايىرىلعان قانشا ادامعا 42 500 تەڭگە الەۋمەتتىك تولەمى بەرىلگەنىن ايتتى.

قازاقپاراتتىڭ جازۋىنشا، ورتالىق كوممۋنيكاتسيالار قىزمەتىندەگى بريفينگ بارىسىندا اقمادي سارباسوۆ: «ءبىز ءوتىنىش بەرۋ ۇدەرىسىن بارىنشا جەڭىلدەتتىك. ول ءۇشىن ءارتۇرلى تەحنيكالىق شەشىمدەر ىسكە اسىرىلدى: 42500.enbek.kz ۆەب-پورتالى; «ەلەكتروندىق ۇكىمەتتىڭ» ۆەب-پورتالى; 18 Telegram-بوت; ۇيالى تەلەفون ءنومىرى تىركەلسە، ءوتىنىم بەرۋسىز. بانكتەردەگى ۇزىن-سونار كەزەكتىڭ پايدا بولۋ قاۋپىن ازايتۋ ماقساتىندا، بانك دەرەكتەمەلەرىنسىز ءوتىنىش بەرۋ مۇمكىندىگى قاراستىرىلدى. ەسەپشوتتاردى ونلاين اشۋ بويىنشا شارالار قابىلداندى. بۇل شارالاردىڭ بارلىعى وتىنىشتەردى بەرۋ جانە قاراۋ ۇدەرىسىن تەزدەتۋگە مۇمكىندىك بەردى. بارلىعى 8 ميلليون ادام ءوتىنىش بەردى، ونىڭ 4,6 ميلليونىنا تاعايىندالدى. توتەنشە جاعدايدىڭ توقتاتىلۋىنا بايلانىستى 2020 جىلدىڭ 11 مامىرىنان باستاپ جاڭا وتىنىشتەردى قابىلداۋ اياقتالدى»، – دەپ اتاپ وتكەن.

ۆيتسە-ءمينيستردىڭ ايتۋىنشا، العاش رەت 194,2 ملرد تەڭگە سوماسىنداعى 4,6 ملن تولەم تاعايىندالدى. ونىڭ ىشىندە ءبىرىنشى ايعا 158,9 ملرد تەڭگە سوماسىندا 3,7 ملن، ەكىنشى ايعا 35,4 ملرد تەڭگەگە 834 مىڭ ءوتىنىش ماقۇلداندى. ەكىنشى ايدا 2,9 ميلليون ادامعا تولەم ۇزارتىلىپ، 122,2 ملرد تەڭگە تولەندى.

«ءبىز بۇعان دەيىن دە ايتقانىمىزداي، جالدامالى قىزمەتكەرلەرگە الەۋمەتتىك جاردەماقى تاعايىنداۋدىڭ باستى شارتى – بۇل اقىسىز دەمالىستا بولۋ جانە الەۋمەتتىك ساقتاندىرۋ جۇيەسىنە قاتىسۋ ءوتىلى، ال باسقا ساناتتار ءۇشىن – توتەنشە جاعداي كەزىندە تولىق كىرىستەن ايىرىلۋ جانە الەۋمەتتىك ساقتاندىرۋ جۇيەسىنە قاتىسۋ ءوتىلى بولدى. ال ازاماتتىق-قۇقىقتىق سيپاتتاعى شارتتار بويىنشا جۇمىس ىستەيتىن ازاماتتار ءۇشىن زەينەتاقى جارنالارىنىڭ بولۋى سۇرالدى»، – دەدى ۆيتسە-مينيستر.

سوڭعى جاڭالىقتار