26 مامىر, 12:57 438 0 جاڭالىقتار اسىل تۇمار

بولات باقاۋوۆتىڭ ءىسى بويىنشا نەگىزگى سوت تالقىلاۋى 27 مامىرعا بەلگىلەندى

سۋرەت عالامتوردان الىندى
سۋرەت عالامتوردان الىندى

پاۆلودار وبلىسىنىڭ بۇرىنعى اكىمى بولات باقاۋوۆتىڭ ءىسى بويىنشا نەگىزگى سوت تالقىلاۋى 27 مامىرعا بەلگىلەندى.

پاۆلودار وبلىستىق سوتىنىڭ سايتىندا جاريالانعان پاۆلودار قالالىق №2 سوتىنىڭ قاۋلىسىندا: «قىلمىستىق كودەكستىڭ 361-بابى 4-بولىگى 3-تارماعىندا كوزدەلگەن قىلمىستىق قۇقىق بۇزۋشىلىققا ايىپتالىپ وتىرعان بوقاۋوۆ بولات جۇمابەكۇلىنا قاتىستى قىلمىستىق ءىس سوت وندىرىسىنە الىندى. نەگىزگى سوت تالقىلاۋى سوتتالۋشىنىڭ، مەملەكەتتىك ايىپتاۋشىنىڭ جانە قورعاۋشى ادۆوكاتتىڭ قاتىسۋىمەن 2020 جىلدىڭ 27 مامىرى كۇنى ساعات 10.00-گە پاۆلودار قالالىق №2 سوتىنىڭ عيماراتىندا اشىق سوت وتىرىسىندا كەلىسىمدى وندىرىستە بەلگىلەنسىن. سوتتالۋشىعا قاتىستى تاڭداپ الىنعان بۇلتارتپاۋ شاراسى سول قالپىندا قالسىن»، – دەلىنگەن.

سونىمەن قاتار اتالعان قۇجاتتا ءىس بويىنشا ءوندىرىستى قىسقارتۋعا نەمەسە توقتاتا تۇرۋعا الىپ كەلەتىن ەشقانداي نەگىز جوق ەكەندىگى اتالىپ وتىلگەن. پروتسەسسۋالدىق كەلىسىم جاساۋ بارىسىندا تاعايىندالعان سوت وتىرىسىنا كەدەرگى كەلتىرەتىن قىلمىستىق ءىس جۇرگىزۋ زاڭىن بۇزۋعا جول بەرىلمەيدى.

«ىسكە قاتىستى پروكۋروردىڭ ايىپتاۋ اكتىسى بەكىتىلگەن جوق، سوتتالۋشىعا قاتىستى تاعايىندالعان بۇلتارتپاۋ شاراسىن وزگەرتۋگە جانە الىپ تاستاۋعا نەگىز جوق. قىلمىس سالدارىنان كەلتىرىلگەن شىعىنداردىڭ ورنىن تولتىرۋدى قامتاماسىز ەتەتىن شارالار جانە مۇلىكتى تاركىلەۋ مۇمكىندىگى قابىلدانعان. قارسىلىق تۇسكەن جوق. سوتقا دەيىنگى ءوندىرىس بارىسىندا كۇدىكتىڭ قورعاۋشىسى رەتىندە ادۆوكات قاتىستى. ونىڭ ىسكە قاتىسۋىنا كەدەرگى كەلتىرەتىن جايت جوق»، – دەلىنگەن تاراتىلعان اقپاراتتا.

ەستەرىڭىزگە سالا كەتسەك، بيىل 16 قاڭتاردا قر ۇلتتىق قاۋىپسىزدىك كوميتەتى پاۆلودار وبلىسىنىڭ اكىمى بولات باقاۋوۆقا قاتىستى قىلمىستىق ءىستى تەرگەپ جاتقانى بەلگىلى بولعان ەدى.

«ۇلتتىق قاۋىپسىزدىك كوميتەتى 2020 جىلعى 15 قاڭتاردا پاۆلودار وبلىسىنىڭ اكىمى بولات باقاۋوۆقا قاتىستى لاۋازىمدىق ۋاكىلەتتىگىن اسىرا پايدالانۋ فاكتىسى بويىنشا قر قك-ءنىڭ 362-بابى 2-بولىگى 3-تارماعى بويىنشا تىركەلگەن قىلمىستىق ىسكە سايكەس جەدەل-تەرگەۋ شارالارىن جۇرگىزدى. قازىرگى ۋاقىتتا تەرگەۋ امالدارى جالعاسۋدا. وسى كەزەڭدە تەرگەۋ مۇددەسىنە وراي تولىق دەرەكتەر جاريالانۋعا جاتپايدى»، – دەلىنگەن ۇقك اقپاراتىندا.

بولات باقاۋوۆ 18 اقپاننان بەرى ۇيقاماقتا وتىر. ساۋىردە ونى ۇيقاماقتا ۇستاۋ مەرزىمى مامىر ايىنا دەيىن سوزىلدى.

سوڭعى جاڭالىقتار