22 مامىر 2020, 20:42 1168 0 جاھان انار لەپەسوۆا

قىرعىزستان ەلشىسى كورسەتكەن كومەگى ءۇشىن قازاق شەكاراشىلارىنا العىس ايتتى

قىرعىزستاننىڭ قازاقستانداعى توتەنشە جانە وكىلەتتى ەلشىسى جەەنبەك كۋلۋباەۆتان قازاقستان رەسپۋبليكاسى ۇقك شەكارا قىزمەتىنە العىس ايتتى.

بەلگىلى بولعانداي، رەسەي فەدەراتسياسى ورىنبور وبلىسىندا پاندەمياعا بايلانىستى ەلدەرىنە قايتا الماعان قىرعىز ەلىنىڭ ازاماتتارىن ەۆاكۋاتسيالاۋدا كورسەتكەن كومەگى ءۇشىن ەلشىلىك قازاق شەكاراشىلارىنا العىس ايتىپ، ارنايى حات جولدادى، دەپ حابارلادى قازاقپارات.

«اقتوبە وبلىسى بويىنشا شەكارا دەپارتامەنتىنىڭ اسكەري قىزمەتشىلەرىنىڭ ادامگەرشىلىكپەن قاراپ، اسا سابىرلىقپەن جانە شىدامدىلىقپەن جۇرگىزگەن جۇمىسى ارقاسىندا، 16 ناۋرىزدان بەرى ورىنبور وبلىسى سول-يلەتسك قالاسىندا بولىپ، ەلدەرىنە قايتا الماعان 500-دەن اسا قىرعىز ەلى ازاماتتارىنىڭ وتانىنا ورالۋىنا مۇمكىندىك تۋدى. شەكارا قىزمەتىنىڭ بارلىق اسكەري قىزمەتشىلەرىنە العىس ايتا وتىرىپ، ءوز قىزمەتتەرىندە جەتىستىككە جەتۋىنە تىلەكتەسپىن»،- دەلىنگەن جولدانعان حاتتا.

«ەل باسىنا كۇن تۋعاندا قول ۇشىن سوزعان قازاقستان تاراپى جەدەل شەشىم قابىلداپ، سونىڭ ىشىندە شەكاراشىلار «جايسان-اۆتو» شەكارالىق باقىلاۋ بولىمشەسى ارقىلى ادامداردىڭ ۇيلەرىنە تەزىرەك ورالۋىنا جاعداي جاسادى. شەكارادان امان-ەسەن وتكەن قىرعىز ازاماتتارى الدىن الا دايىندالعان اۆتوبۋستارمەن وڭتۇستىك شەكاراعا جول تارتتى»، - دەلىنگەن ۇقك مالىمەتىندە.

 

سوڭعى جاڭالىقتار