21 مامىر 2020, 21:07 743 0 بيزنەس انار لەپەسوۆا

سانيتارلىق تالاپتاردى ورىنداماعان كاسىپكەرلەر 4 ملن تەڭگە ايىپپۇل ارقالايدى

بۇگىن الماتىنىڭ  باس سانيتارى جانداربەك بەكشين باستاعان ءموبيلدى توپ جۇمىسىن جانداندىرعان مەكەمەلەردى ارالاپ شىقتى. 

ونىڭ ىشىندە ازىق-تۇلىك دۇكەندەرى، ءسان سالوندارى مەن كوك بازار بار.

قالالىق كاسىپكەرلىك باسقارماسى، «اتامەكەن» ۇلتتىق كاسىپكەرلەر پالاتاسىنىڭ وكىلدەرى مەن سانيتار دارىگەرلەردەن قۇرىلعان ءموبيلدى توپ، الدىمەن امبەباپ ازىق-تۇلىك دۇكەنىنەن باستادى. بۇل ساۋدا ورنىندا ناننىڭ ارنايى قاپتاماعا سالىنباي ساۋدالانىپ جاتقاندىعى انىقتالدى، دەپ حابارلايدى "الماتى" ارناسى.

مۇنداعىلاردىڭ بارلىعىندا قوس-قوستان قولعاپ پەن بەتپەردە بار ەكەن. ال، مىنا ءسان سالونى بولسا بەتپەردەسىز كەلگەندەردى قابىلداي بەرەتىن بولىپ شىقتى. ودان وزگە، جۇمىسشىلار ماسكانى ءار 20 مينۋت سايىن اۋىستىرىپ تۇرامىز دەپ باس سانيتاردىڭ الدىندا شاتاستى. تيىسىنشە، جانداربەك بەكشين سالون اكىمشىسىنە ەسكەرتۋ جاسادى.

«ولاردىڭ ايتاتىن ءار 20 مينۋت سايىن بەتپەردەنى اۋىستىرامىز دەيدى. ولاي ەمەس. ءسىز ولارعا دۇرىستاپ ءتۇسىندىرىڭىز. ءبىر بەتپەردەنى ءار 2-3 ساعات سايىن اۋىستىرۋ قاجەت. جانە ونى تاققان كەزدە اۋىز بەن مۇرىندى تولىق جاۋىپ تۇرۋى قاجەت»، – دەدى قالالىق مەملەكەتتىك باس سانيتارلىق دارىگەر جانداربەك بەكشين.

ال، ادام كوپ جينالاتىن كوك بازارعا ەسكەرتۋ كوپ ايتىلدى. ماسەلەن، 500 شارشى مەتردەن اساتىن مەكەمەگە كەلۋشىلەردىڭ مىندەتتى تۇردە دەنە قىزۋى قاشىقتان تەكسەرىلۋى قاجەت. الايدا، ورتالىق بازاردا مۇنداي قۇرىلعى بولماي شىقتى. بازار قوجايىندارى بولسا سىلتاۋ ايتۋمەن الەك.

سانيتارلى نورمالاردى ساقتاۋ دەگەنىمىز – بۇل تەك بەتپەردە تاعىپ، قولعاپ كيۋ عانا ەمەس. سونداي-اق، سانيتايزەرلەرمەن انتيسەپتيكتەر، سونىمەن قاتار الەۋمەتتىك اراقاشىقتىقتى ساقتاۋ ماڭىزدى. ول ءۇشىن وسىنداي ساۋدا ورىندارىندا مىندەتتى كەلۋشىلەرگە ارنايى بەلگى ورناتىلۋى قاجەت.

ال، بۇل بازاردا ارنايى بەلگىلەر ساناۋلى قاتارلار دا عانا بار. شەتكى قاتارلاردان اراقاشىقتى بىلدىرەتىن بەلگىنى ءموبيلدى توپ تابا المادى. بىرنەشە ەرەجە بۇزۋشىلىقتى انىقتاعان ماماندار الداعى ۋاقىتتا ايىپپۇل سالىنادى دەدى.

«بازاردىڭ اكىمشىلىگىنە ايىپپۇل سالۋ ءۇشىن مەدەۋ اۋدانىنىڭ باس سانيتارلىق دارىگەرىنە تاپسىرما بەرىلدى. بۇل – ءىرى بيزنەس. سوندىقتان بۇل نىسانعا ءىرى ايىپپۇل سالىنادى. ءبىزدىڭ جۇمىسكەرلەرىمىز قاراپ شىعادى. ايىپپۇلدىڭ كولەمى ءىرى بيزنەس بولىپ شىقسا، 4 ميلليون تەڭگەگە دەيىن جەتەدى»، – دەدى ەدى قالالىق مەملەكەتتىك باس سانيتارلىق دارىگەر جانداربەك بەكشين.

قالالىق باس انيتاردىڭ سوزىنشە، الماتىنىڭ بارلىق اۋداندارىندا وسىنداي بىرنەشە ءموبيلدى توپ قۇرىلعان. ولار وسى ۋاقىتقا دەيىن قالا بويىنشا 3000-نان استام كاسىپورىندى تەكسەرىپ، 100-گە جۋىعىنا ءتيىستى شارا قولدانعان.

سوڭعى جاڭالىقتار