21 مامىر 2020, 16:49 11697 0 زاڭ انار لەپەسوۆا

اقش سوتى حراپۋنوۆتارعا قاتىستى ۇكىم شىعاردى

سۋرەت ينتەرنەتتەن الىندى
سۋرەت ينتەرنەتتەن الىندى

نيۋ-يوركتىڭ وڭتۇستىك وكرۋگى بويىنشا اقش وكرۋگتىك سوتى يلياس پەن ۆيكتور حراپۋنوۆتارعا قارسى شەشىم شىعاردى. بۇل تۋرالى قر ادىلەت مينيسترلىگىنىڭ رەسمي سايتىندا حابارلاندى.

«مۇددەسىنە ادىلەت مينيسترلىگى وكىلدىك ەتەتىن – الماتى قالاسىنىڭ اكىمدىگى جانە بتا بانك تالاپكەرلەردىڭ تالاپ-ارىزدارىن راستايتىن اقپاراتتى اشىپ ايتۋىن تالاپ ەتتى. سوت تاراپتاردىڭ پوزيتسياسىن زەردەلەگەننەن كەيىن، يلياس پەن ۆيكتور حراپۋنوۆتار سوتپەن «مىسىق-تىشقان» ويىنىن ادەيى ۇيىمداستىردى جانە ولاردىڭ بۇل ارەكەتى جازالانۋعا ءتيىس دەگەن شەشىمگە كەلدى.

سوت يلياستىڭ جوعالعان ەلەكتروندىق حاتتار تۋرالى سىلتاۋلارىن اقىلعا قونبايدى دەپ تانىدى. بۇعان دەيىن، سوت مۇحتار ءابىلازوۆتىڭ دە وسىعان ۇقساس ءىس-ارەكەتىن جازالاعان ەدى. ول كەزدە ءابىليازوۆ دالەلدەمەلەردى اشكەرەلەۋ پروتسەدۋراسى بارىسىندا قۇجاتتاردى ۇسىنا الماعان بولاتىن.

سوت الماتى قالاسىنىڭ اكىمدىگى مەن بتا بانكتىڭ تالاپ-ارىزدارىنا تىكەلەي قاتىسى بار اقپاراتتاردى ۇمىتىپ قالعانى تۋرالى حراپۋنوۆتاردىڭ ۋاجدەمەسىن جالعان دەپ تانىدى. سوت پايىمىنشا، يلياس ءتيىستى ايعاقتاردى قاساقانا جويىپ جىبەرگەن»، - دەلىنگەن اقپاراتتا.

ءمالىم ەتىلگەندەي، سۋديا يلياس پەن ۆيكتور حراپۋنوۆتارعا الماتى قالاسى اكىمدىگى مەن بتا بانك زاڭگەرلەرىنە كەتكەن شىعىندى وتەۋدى مىندەتتەدى. سونىمەن قاتار، سوت حراپۋنوۆتار بۇدان بىلاي بەلگىلى ءبىر دالەلدەمەلەردى ۇسىنۋ قۇقىعىنان ايىرىلاتىنىن جانە القا بيلەرگە يلياس دالەلدەمەلەردى قاساقانا جويعانى تۋرالى نۇسقاۋ بەرىلەتىنىن ۇكىم ەتتى.

«بۇعان دەيىن، سوت مۇحتار ابىليازوۆقا قاتىستى دا القا بيلەرگە ءدال وسىنداي نۇسقاۋ بەرىلەتىندىگى تۋرالى قاۋلى ەتكەن ەدى»، - دەلىنگەن مالىمەتتە.

«بۇدان بولەك، الماتى قالاسى اكىمدىگى مەن بتا بانكىنىڭ فەليكس ساتەرگە قارسى قاتار ءجۇرىپ جاتقان سوت پروتسەسىندە دە سوت تالاپكەرلەردىڭ پايداسىنا شەشىم قابىلدادى. جاۋاپ الۋ بارىسىندا ساتەر حراپۋنوۆتار مەن ءابىليازوۆتىڭ الماتى قالاسىندا تىڭشىلارى بار ەكەندىگى جانە ونىڭ قاۋىپسىزدىگىنە قاۋىپ-قاتەر ءتونۋى مۇمكىندىگى تۋرالى مالىمدەدى. سوت ءوز شەشىمىندە ءابىليازوۆتىڭ 2018 جىلى قازاقستاندا بتا بانكتىڭ بۇرىڭعى باسشىسىن ولتىرگەنى جانە كوپتەگەن باسقا دا قىلمىستار ءۇشىن سوتتالعانىن ەسكەرە وتىرىپ، ساتەردىڭ ۇرەيى سەنۋگە تۇرارلىق ەكەندىگىن اتاپ ءوتتى»، - دەدى ادىلەت مينيسترلىگىنەن.

 

سوڭعى جاڭالىقتار