21 مامىر 2020, 15:37 630 0 قوعام انار لەپەسوۆا

اشم الاڭداۋلى: ماروككولىق شەگىرتكە 824 مىڭ گەكتارعا تارالۋى مۇمكىن

ماروككولىق شەگىرتكەنىڭ العاشقى تارالۋ وشاقتارى انىقتالدى، دەپ حابارلايدى قر اشم ءباسپاسوز قىزمەتى.

بۇعان دەيىن ايتىلعانداي، 2020 جىلى رەسپۋبليكادا ءۇيىرلى جانە سايا شەگىرتكە زيانكەستەرى 824 مىڭ گەكتارعا تارالۋى كۇتىلۋدە. وسى بولجامدارعا سايكەس، قر اۋىل شارۋاشىلىعى مينيسترلىگى وتكەن جىلدان باستاپ اۋىل شارۋاشىلىعى داقىلدارىنىڭ زيانكەستەرىمەن كۇرەس جونىندەگى ءىس-شارالارعا اۋقىمدى دايىندىق جۇرگىزدى.

اتاپ ايتقاندا، رەسپۋبليكالىق جانە جەرگىلىكتى بيۋدجەتتەردەن 1,5 ميلليارد تەڭگە ءبولىندى، ولارعا پەستيتسيدتەردىڭ ءار ءتۇرلى توپتارىنىڭ پرەپاراتتارى، سونداي-اق بولجاناتىن بارلىق الاڭعا حيميالىق وڭدەۋ جۇمىستارى بويىنشا قىزمەتتەر ساتىپ الىندى.

اشم ماماندارى شەگىرتكە زيانكەستەرىنىڭ وشاقتارىن GPS ناۆيگاتورلار مەن ترەكەرلەردىڭ كومەگىمەن ىزدەۋ بارىسىندا رەسپۋبليكا بويىنشا شامامەن 40 ملن گا جەر كولەمىن زەرتتەۋ جوسپارلانعانىن اتاپ ءوتتى.

العاشقى قورعاۋ ءىس-شارالارى رەسپۋبليكانىڭ وڭتۇستىك ايماقتارىندا 10 ساۋىردەن باستالدى. تۇركىستان جانە جامبىل وبلىستارىندا ماروككو شەگىرتكەسى 143 مىڭ گا الاڭدا انىقتالدى. قازىرگى ۋاقىتتا زيانكەستەر قونىستانعان الاڭنىڭ 67% - دان استامى وڭدەلدى.

باسقا ايماقتاردا شەگىرتكە زيانكەستەرىنىڭ تارالۋ وشاقتارىنىڭ انىقتالۋىنا بايلانىستى حيميالىق وڭدەۋ جۇمىستارى باستالادى. كورشىلەس مەملەكەتتەرمەن شەكارالاس اۋماقتاردا بىرلەسكەن زەرتتەۋلەر جۇرگىزىلەدى.

بۇل تۋرالى قر اشم ماماندارى رف، قىتاي جانە وزبەكستاننان كەلگەن ارىپتەستەرىمەن الدىن الا كەلىسىمگە كەلدى.

 

سوڭعى جاڭالىقتار