21 مامىر 2020, 14:49 5753 0 ايماق انار لەپەسوۆا

پوشتا قىزمەتكەرى اۋىل تۇرعىنىنىڭ جاردەماقىسىن الىپ، جاراتىپ جىبەرگەن

تۇركىستان وبلىسى كەلەس اۋدانىندا بۇرىنعى پوشتا قىزمەتكەرى تۇرعىننىڭ ەسەپشوتىنان اقشا العان. جابىرلەنۋشى اقشاسىنىڭ ۇرلانعانىن مەملەكەت تاراپىنان بەرىلگەن جاردەماقىسى جوعالعان سوڭ ءبىر-اق بىلگەن.

ءبۇل تۋرالى وبلىستىق پد ءباسپاسوز قىزمەتى حابارلادى.

ارىزدانىپ كەلگەن تۇرعىن ەسەپشوتىنا مەملەكەت تاراپىنان تۇسكەن 30 مىڭ تەڭگەنى پوشتا قىزمەتكەرى زاڭسىز العانىن ايتقان. ءىستىڭ تولىق ءمان-جايىن انىقتاۋ ماقساتىندا تاجىريبەلى پوليتسەيلەردەن جەدەل-تەرگەۋ توبى قۇرىلىپ، وسى قىلمىسقا قاتىستى كۇدىكتى انىقتالعان. ول بۇرىنعى پوشتادا قىزمەتكەرى بولىپ شىقتى.

تەرگەۋ بارىسىندا كۇدىكتى پوشتادا ىستەپ جۇرگەن كەزىندە جەرگىلىكتى تۇرعىننىڭ اقشاسىن ءوزى قول قويىپ، العانىن مويىنداعان. وسىلايشا ول ءوزىنىڭ قىزمەتىن پايدالانا وتىرىپ، جالعان قۇجاتتارمەن وزگەنىڭ سەنىپ تاپسىرىلعان مۇلكىن يەمدەنگەن.

«كۇدىكتىگە قاتىستى قر قك 189 جانە 385-بابى بويىنشا تەرگەۋ امالدارى جۇرگىزىلدى. زاڭسىز العان اقشانى ءوز قاجەتىنە جاراتىپ جىبەرگەنى بەلگىلى بولدى. قولحاتپەن بوساتىلعان. قازىرگى تاڭدا جيناقتالعان ءىس-قۇجاتتارى اۋداندىق سوتقا جولداندى» دەلىنگەن حابارلامادا.

 

سوڭعى جاڭالىقتار