20 مامىر 2020, 16:58 783 0 جاڭالىقتار اسىل تۇمار

اياگوزدەگى ءتورت بالانىڭ ولىمىنە قاتىستى قىلمىستىق ءىس قوزعالدى

سۋرەت عالامتوردان الىندى
سۋرەت عالامتوردان الىندى

شىعىس قازاقستان وبلىسى اياگوز قالاسىنداعى ارنايى الەۋمەتتىك كومەك ورتالىعىندا 4 بالانىڭ كوز جۇمۋىنا قاتىستى جاڭا مالىمەتتەر بەلگىلى بولدى، – دەپ جازدى قازاقپارات.

ونلاي-بريفينگ بارىسىندا وبلىس اكىمىنىڭ ورىنباسارى الىشەر مارحابات ايماق باسشىسى دانيال احمەتوۆتىڭ تاپسىرماسىمەن قۇرىلعان ۆەدومستۆوارالىق كوميسسيا مۇشەلەرى ءىس ماتەريالدارىمەن تانىسۋ ءۇشىن بالالار ورتالىعىنا بارعانىن ايتتى.

«كوميسسيا مۇشەلەرى مەديتسينالىق قۇجاتتامانى جانە بەينەباقىلاۋ كامەرالارىنا تۇسىرىلگەن جازبالاردى تۇگەل قاراپ شىقتى. انىقتالعانداي، بالالار ءبىر ۋاقىتتا قايتىس بولماعان. ولىمگە ءارتۇرلى تۋا بىتكەن اۋرۋلاردىڭ ءبىر اي ىشىندە اسقىنىپ كەتۋى سەبەپ بولىپ وتىر»، – دەيدى الىشەر مارحابات.

ونىڭ ايتۋىنشا، العاشقى ءولىم وقيعاسى 2 ساۋىردە بولعان. ول كەزدە 12 جاستاعى بالا كوز جۇمعان. ودان كەيىنگى جاعدايلار 12 ساۋىردە (12 جاسار بالا), 20 ساۋىردە (14 جاستاعى بالا) جانە اتالعان ايدىڭ سوڭىندا (8 جاسار قىز) تىركەلدى.

«دارىگەرلەردىڭ تۇجىرىمىنا سايكەس، بالالار ءولىمىنىڭ قىزىلشاعا ەش قاتىسى جوق. بۇنى دالەلدەيتىن مەديتسينالىق انىقتامالار مەن اكتىلەر بار. كوميسسيا جۇمىسىنىڭ نەگىزىندە ىشكى ىستەر ورگاندارى وقيعاعا قاتىستى قىلمىستىق ءىس قوزعادى. سونداي-اق جۇمىس بارىسىندا مەديتسينالىق قۇجاتتاردى جۇرگىزۋ كەزىندەگى زاڭبۇزۋشىلىقتار انىقتالدى. وسىعان بايلانىستى شقو تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى قوسىمشا تەكسەرىس جۇرگىزۋدە»، – دەيدى وبلىس اكىمىنىڭ ورىنباسارى.

الىشەر مارحابات زاڭبۇزۋشىلىققا جول بەرگەن لاۋازىمدى تۇلعالار ءتيىستى ورگانداردىڭ تەكسەرۋ ناتيجەلەرىنە بايلانىستى جاۋاپكەرشىلىككە تارتىلاتىنىن ايتتى.

سونىمەن قاتار ول ورتالىقتىڭ ديرەكتورى، ونىڭ ورىنباسارى مەن ءبولىم باسشىلارىنىڭ جازاعا تارتىلعانىن ءمالىم ەتتى.

ەستەرىڭىزگە سالا كەتسەك، وسىعان دەيىن اياگوزدەگى الەۋمەتتىك كومەك ورتالىعىندا 4 بالانىڭ قايتىس بولعاندىعى حابارلاندى. قر ىشكى ىستەر مينيسترلىگى ءىستىڭ تەرگەلۋىن ءوز باقىلاۋىنا الدى.

وسى وقيعادان كەيىن قر ەڭبەك جانە حالىقتى الەۋمەتتىك قورعاۋ مينيسترلىگى ەلىمىزدىڭ ءار وڭىرىندە ورنالاسقان مەديتسينالىق-الەۋمەتتىك كومەك كورسەتەتىن 113 مەكەمەگە تەكسەرۋ جۇرگىزىلەتىنىن ءمالىم ەتتى. ونىڭ ىشىندە اياگوزدەگى بالالارعا ارنالعان ارنايى الەۋمەتتىك كومەك ورتالىعى بار.

سوڭعى جاڭالىقتار