20 مامىر, 16:11 394 0 جاڭالىقتار اسىل تۇمار

جول ساپاسىنا جاۋاپتى 60 لاۋازىمدى تۇلعا اكىمشىلىك جازاعا تارتىلدى

سۋرەت عالامتوردان الىندى
سۋرەت عالامتوردان الىندى

سولتۇستىك قازاقستان وبلىسىندا جولدارعا ءتيىستى دەڭگەيدە كۇتىم كورسەتپەگەن لاۋازىمدى تۇلعالار اكىمشىلىك جازاعا تارتىلدى، – دەپ جازدى قازاقپارات.

سقو پوليتسيا دەپارتامەنتى ءباسپاسوز قىزمەتىنىڭ مالىمەتىنە قاراعاندا، اكىمشىلىك پوليتسيا باسقارماسى جۇمىسىنىڭ ءبىر باعىتى – كوشە-جولدىڭ جاعدايىن قاداعالاپ وتىرۋ. اسىرەسە كولىك اعىنى كوپ پەتروپاۆلدا بۇل جۇمىس جاقسى جولعا قويىلعان.

«جول ينفراقۇرىلىمىنىڭ اقساۋى كولىك اپاتىنا اكەلۋى مۇمكىن. وبلىس ورتالىعىنداعى جولداردا ويىلعان ءاسفالتتى ءجيى كەزدەستىرەمىز. بۇل بارلىق شاعىن اۋداندارعا ءتان. جولدارعا جاۋاپتى 60 لاۋازىمدى تۇلعاعا مىندەتتەرىنە سالعىرت قاراعاندارى ءۇشىن 73 اكىمشىلىك حاتتاما تولتىرىلدى»، – دەيدى پد اكىمشىلىك پوليتسيا باسقارماسىنىڭ اسا ماڭىزدى تاپسىرمالار بويىنشا اعا ينسپەكتورى ەۆگەني گوكين.

ءتارتىپ ساقشىلارى جولدىڭ جاعدايىن عانا ەمەس، جول ينفراقۇرىلىمىنىڭ بارلىق بولشەكتەرىن: جول بەلگىلەرىن، جولاقتارىن، باعدارشامداردى نازارعا الادى.

پوليتسەيلەردىڭ ايتۋىنشا، ولاردىڭ جاقسى كورىنۋى جول قاۋىپسىزدىگىن قامتاماسىز ەتەدى. ولقىلىقتاردى جويۋ تۋرالى ۇيعارىمعا سايكەس ءتيىستى مەكەمەلەر 300 استام جول بەلگىلەرىن جۋىپ، سىرلاپ، تۇزەتتى. سونداي-اق لاستانعان 35 باعدارشام جونگە كەلتىرىلدى. جولاقتار جاڭارتىلىپ، شۇڭقىرلار جوندەلدى.

«جەرگىلىكتى اتقارۋشى ورگانعا جول ينفراقۇرىلىمىن دامىتۋعا قاتىستى 73 ۇسىنىس بەرىلدى. ناتيجەسىندە پەتروپاۆلداعى پوتانين، «جاس وركەن» ىقشاماۋدانىنداعى جامبىل جانە № 26 ورتا مەكتەپتىڭ ماڭىنداعى باتىر بايان كوشەلەرىندە جۇرگىنشى جولدارى پايدا بولدى»، – دەيدى ەۆگەني گوكين.

جالپى جىل باسىنان پوليتسەيلەر وبلىستىڭ 4 مىڭ شاقىرىم جولىنىڭ جاعدايىن تەكسەردى. ناتيجەسىندە 680 ءتۇرلى اقاۋ تابىلدى. 60 لاۋازىمدى تۇلعا جولدى جانە تەمىرجول وتپەلەرىن ءتيىستى دەڭگەيدە كۇتىپ ۇستاماعانى ءۇشىن اكىمشىلىك جازاعا تارتىلدى.

سوڭعى جاڭالىقتار