20 مامىر, 10:27 6345 0 جاڭالىقتار اسىل تۇمار

ەت كومبيناتتارى كوروناۆيرۋستىڭ جاڭا وشاعىنا اينالدى

سۋرەت عالامتوردان الىندى
سۋرەت عالامتوردان الىندى

ەۋروپادا ەت ءوندىرىسىنىڭ ءىرى كاسىپورىندارى كوروناۆيرۋس ينفەكتسياسىنىڭ جاڭا وشاعىنا اينالدى، – دەپ جازدى قازاقپارات Euronews اگەنتتىگىنە سىلتەمە جاساپ.

فرانتسيانىڭ سولتۇستىگىندەگى كوت-د’ارمور دەپارتامەنتىندە Kermene قاساپحاناسىنان كوروناۆيرۋس جۇقتىرعان 69 جاڭا وقيعا انىقتالدى. زاۋىتتىڭ 800 قىزمەتكەرى تەستىلەۋدەن ءوتتى.

لۋار دەپارتامەنتىندەگى Tradival قاساپحاناسىنىڭ 54 جۇمىسشىسى ۆيرۋس جۇقتىرعان. جەرگىلىكتى زاۋىت بيلىكتىڭ قاۋىپسىزدىك شارالارىن قولدانعانىنا قاراماستان، كاسىپورىننىڭ تەحنيكالىق جاعى ەسكىرگەنىن مالىمدەدى.

گەرمانيادا تومەنگى ساكسونيا جەرىندە ەت وڭدەۋ كومبيناتىنىڭ 92 قىزمەتكەرى كوروناۆيرۋس جۇقتىرعان. سولتۇستىك رەين-ۆەستفالياداعى زاۋىتتا 150-دەن استام ادامنىڭ ۆيرۋس جۇقتىرعانى انىقتالدى. اتالعان كاسىپورىنداردىڭ كوپتەگەن قىزمەتكەرى رۋمىنيا مەن بولگاريادان كەلگەن ەڭبەك ميگرانتتارى.

«ار-نامىس پەن ادىلدىك ءۇشىن» قايىرىمدىلىق قاۋىمداستىعىنان پيتەر كوسسەن لەنگەرح قالاسىنداعى ميگرانتتارعا كومەكتەسەدى.

«ادامدار كىشكەنە پاتەرلەردە سىعىلىسىپ تۇرادى. نارەستەلەر مەن مەكتەپ جاسىنداعى بالالار بار، مۇنداي جاعدايدا نە بولارىن ەلەستەتۋ دە قيىن. بۇل پاتەرلەر كوبىنەسە جۇمىس بەرۋشىنىڭ مەنشىگىندە، سوندىقتان ميگرانتتار كەلىسىمشارت اياقتالعاننان كەيىن ولار پاتەردەن شىعارىلادى»، – دەدى پيتەر كوسسەن.

گەرمانيا بيلىگى باقىلاۋدى كۇشەيتۋگە ۋادە بەردى جانە مەردىگەرلەر مەن قوسالقى مەردىگەرلەر ارقىلى قىزمەتكەرلەردى جالداۋ ءۇشىن تىيىم سالىنادى نەمەسە شەكتەۋ قويىلادى.

گەرمانيانىڭ ەڭبەك ءمينيسترى حۋبەرتۋس حايل قازىرگى احۋالدى «ۇيىمداسقان جاۋاپسىزدىق» دەپ اتاپ، وسى سالادا ءتارتىپ ورناتۋعا شاقىردى.

سوڭعى جاڭالىقتار