19 مامىر, 19:10 452 0 جاڭالىقتار اسىل تۇمار

سولتۇستىك قازاقستان وبلىسى اكىمىنىڭ جاڭا ورىنباسارى تاعايىندالدى

سولتۇستىك قازاقستان وبلىسى اكىمى قۇمار اقساقالوۆتىڭ وكىمىمەن جانە قر پرەزيدەنتى اكىمشىلىگىنىڭ كەلىسىمى بويىنشا عاني نىعىمەتوۆ وبلىس اكىمىنىڭ ورىنباسارى بولىپ تاعايىندالدى.

سقو ىشكى ساياسات باسقارماسىنىڭ مالىمەتىنشە، عاني نىعىمەتوۆ 1983 جىلى اقتوبە وبلىسىندا دۇنيەگە كەلگەن.

ل. گۋميلەۆ اتىنداعى ەۋرازيا ۇلتتىق ۋنيۆەرسيتەتىن حالىقارالىق قاتىناستار، اقش-تاعى مونتەرەي حالىقارالىق زەرتتەۋلەر ينستيتۋتىن مەملەكەتتىك باسقارۋ ماگيسترى، سونداي-اق نازارباەۆ ۋنيۆەرسيتەتىنىڭ جوعارى بيزنەس مەكتەبىن ىسكەرلىك اكىمشىلىك ماگيسترى ماماندىقتارى بويىنشا بىتىرگەن.

گارۆارد ۋنيۆەرسيتەتىنىڭ كەننەدي اتىنداعى باسقارۋ مەكتەبىندە، سينگاپۋردىڭ ۇلتتىق ۋنيۆەرسيتەتىندە باسشىلار ءۇشىن بىلىكتىلىكتى ارتتىرۋ كۋرسىنان ءوتتى.

ەڭبەك جولىن نيۋ-يورك قالاسىنداعى بۇۇ دامۋ باعدارلاماسىنىڭ شتاب-پاتەرىندە ستاجەر بولىپ باستاعان.

2007-2009 جىلدارى – «قر ۇكىمەتى مەن ۇلتتىق بانكى جانىنداعى ۇلتتىق تالداۋ ورتالىعى» اق مەملەكەتتىك باسقارۋ دەپارتامەنتىنىڭ جوبا مەنەدجەرى.

2009-2013 جىلدارى – نازارباەۆ ۋنيۆەرسيتەتىنىڭ حالىقارالىق ىنتىماقتاستىق دەپارتامەنتىنىڭ ديرەكتورى، نازارباەۆ ۋنيۆەرسيتەتىنىڭ ەنەرگەتيكالىق زەرتتەۋلەر ورتالىعى باس ديرەكتورىنىڭ ورىنباسارى، Nazarbayev University Research and Innovation System بيزنەستى دامىتۋ جونىندەگى باس ديرەكتورى.

2013-2016 جىلدارى – قر ءبىلىم جانە عىلىم مينيسترلىگىنىڭ «حالىقارالىق باعدارلامالار ورتالىعى» اق پرەزيدەنتى.

2016-2018 جىلدار ارالىعىندا «ستراتەگيالىق باستامالار ورتالىعى» جشس، «ەۋرازيالىق ينتەگراتسيا ينستيتۋتى» جشس ديرەكتور بولدى.

2018 جىلعى ناۋرىزدان باستاپ 2019 جىلعى شىلدەگە دەيىن قازاقستان رەسپۋبليكاسى پرەزيدەنتى اكىمشىلىگىنىڭ ىشكى ساياسات ءبولىمى مەڭگەرۋشىسىنىڭ ورىنباسارى، سوڭعى تاعايىندالعانعا دەيىن قر پرەزيدەنتى اكىمشىلىگىنىڭ ىشكى ساياسات ءبولىمىنىڭ مەڭگەرۋشىسى قىزمەتىن اتقاردى.

«بولاشاق» پرەزيدەنتتىك ستيپەندياسىنىڭ تۇلەگى.

ال بۇعان دەيىن سقو اكىمىنىڭ ورىنباسارى بولعان رۋسلان الىشەۆ «ورتالىق كوممۋنيكاتسيالار قىزمەتىنىڭ» ديرەكتورى قىزمەتىنە تاعايىندالدى.

سوڭعى جاڭالىقتار