19 مامىر, 11:54 361 0 ەكونوميكا انار لەپەسوۆا

جەكە كاسىپكەرلەرگە 6 پايىزبەن 20 ملن تەڭگەگە دەيىن نەسيە بەرىلەدى – مينيستر

شاعىن جانە ورتا بيزنەس وكىلدەرىنە 6 پايىزدان اسپايتىن مولشەرلەمەمەن نەسيە بەرىلەدى. بۇل تۋرالى ۇلتتىق ەكونوميكا ءمينيسترى رۋسلان دالەنوۆ مالىمدەدى. 

ءمينيستردىڭ ايتۋىنشا، "بيزنەستىڭ جول كارتاسى–2025" باعدارلاماسىنا "ميكرو جانە شاعىن كاسىپكەرلىكتى قولداۋ" بويىنشا جاڭا باعىت ەنگىزىلەدى.

"سۋبسيديالاۋ ەسەبىنەن قارجىلاندىرۋ قولجەتىمدى بولادى. مولشەرلەمە 6 پروتسەنتتەن اسپايدى. نەسيە اينالىم قاراجاتىن تولىقتىرۋعا 5 ميلليون تەڭگەگە دەيىن جانە وندىرىستىك ماقساتتارعا 20 ميلليون تەڭگەگە دەيىن بەرىلەدى. بۇل ميكروبيزنەس وكىلدەرىنىڭ ۇلكەن توبىن قامتۋعا مۇمكىندىك بەرەدى", – دەدى ر.دالەنوۆ.

ءمينيستردىڭ اتاپ وتۋىنشە، ميكروبيزنەس ءۇشىن جاڭا فورمات بويىنشا وقىتۋ ەنگىزىلەدى، بۇل دا قارجىلاندىرۋعا قولجەتىمدىلىكتى جەڭىلدەتەدى.

سونىمەن قاتار، بانكتەر مەن ميكروقارجى ۇيىمدارىنىڭ كرەديتى بويىنشا تولەم مەرزىمى ۇزارتىلاتىن سالالاردىڭ تىزبەسى كەڭەيتىلدى.

ارنايى سالىق رەجيمىندە جۇمىس ىستەيتىن جەكە كاسىپكەرلەر ءۇشىن بۋحگالتەرلىك جانە سالىق ەسەپتەرىن جۇرگىزۋ جەڭىلدەتىلەدى.

"جەكە كاسىپكەرلەردىڭ جالدامالى قىزمەتكەرلەرى مەن ازاماتتىق-قۇقىقتىق سيپاتتاعى شارتتار بويىنشا جۇكتەمەنى تومەندەتۋ جانە مىندەتتى تولەمدەردى تولەۋدى وڭايلاتۋ ماسەلەسى پىسىقتالۋدا. سالىق ورگاندارىنا سالىق ەسەپتىلىگىن الدىن الا دەكلاراتسيالاۋ مىندەتى جۇكتەلەدى، بۇل بيزنەسكە اكىمشىلىك اۋىرتپالىقتى ازايتادى", – دەدى مينيستر.

ايتا كەتەيىك، بۇعان دەيىن رۋسلان دالەنوۆ لوگيستيكا مەن ءتۋريزمدى قولداۋ شارالارىن جاريالادى.

سونداي-اق، وتاندىق اۆياتسيانىڭ  تىنىسىن اشاتىن جەڭىلدىكتەرگە توقتالدى.

بۇدان بولەك، ەلىمىزدە ەڭبەك نارىعىنداعى جاعدايدى جەدەل جاقسارتۋ ماقساتىندا جۇمىسسىز مارتەبەسىن الۋ ءۇشىن تىركەۋدى وڭايلاتۋ شارالارى قابىلدانادى.

 

سوڭعى جاڭالىقتار