19 مامىر, 10:48 283 0 بيزنەس انار لەپەسوۆا

ۇكىمەت لوگيستيكا مەن ءتۋريزمنىڭ تىنىسىن اشاتىن جەڭىلدىكتەردى جاريالادى

ەلىمىزدە ترانزيت كەزىندە كونتەينەرلىك پويىزداردى كەدەندىك تەكسەرۋدەن وتكىزۋ جەڭىلدەتىلەدى. ال يمپورتتاۋ كەزىندە تەكسەرۋ سوڭعى ستانتسيادا ءبىر رەت جۇرگىزىلەتىن بولادى.

بۇل تۋرالى ۇكىمەت وتىرىسىندا  قر ۇلتتىق ەكونوميكا ءمينيسترى رۋسلان دالەنوۆ ايتتى.

«لوگيستيكا جانە ءتۋريزمدى قولداۋ شارالارى اياسىندا الەۋمەتتىك ماڭىزى بار باعىتتار بويىنشا جولاۋشىلار اۆتوبۋسىنىڭ قىزمەتتەرىنە قوسىلعان قۇن سالىعىن تولەۋدەن بوساتۋ كوزدەلەدى. تۋريستىك ينۆەستيتسيالىق جوبالاردى ىسكە اسىرۋ كەزىندە باسىم تۋريستىك اۋماقتاردا سالىق پرەفەرەنتسيالارى بەرىلەتىن بولادى. بۇل - كورپوراتيۆتىك تابىس سالىعى، مۇلىك سالىعى جانە جەر سالىعى بويىنشا جەڭىلدىكتەر»، - دەدى مينيستر.

ر.دالەنوۆتىڭ ايتۋىنشا، تەمىر جول كولىگىمەن جۇكتەردى تاسىمالداۋعا ارنالعان ءوتىنىمدى ورىنداماعانى ءۇشىن ساقتاۋ تولەمنىڭ 10 ەسەلەنگەن مولشەرىن 6 ايعا الىپ تاستاۋ كوزدەلگەن.

«سونداي-اق، ترانزيت كەزىندە كونتەينەرلىك پويىزداردى كەدەندىك تەكسەرۋدەن وتكىزۋدى جەڭىلدەتۋ ۇسىنىلادى. ال يمپورتتاۋ كەزىندە تەكسەرۋ سوڭعى ستانتسيادا ءبىر رەت جۇرگىزىلەتىن بولادى. شەكتۋگە شارالارىن ەسكەرە وتىرىپ، تەمىر جول تاسىمالداۋشىلارىن سۋبسيديالاۋ دەڭگەيى ساقتالادى. كەمەلەر قاتىناسى قىزمەتتەرىنە تاريفتەردىڭ شەكتى دەڭگەيىنىڭ قولدانىلۋ مەرزىمى ۇزارتىلاتىن بولادى»، - دەدى ۆەدومستۆو باسشىسى.

ايتا كەتەيىك، بۇعان دەيىن مينيستر اۆياتسيانى قولداۋ شارالارىن جاريالادى.

سونداي-اق، ەلىمىزدە ونەركاسىپتى دامىتۋ قورى قۇرىلاتىنىن جەتكىزدى.

 

سوڭعى جاڭالىقتار