7 مامىر, 18:19 314 0 ءبىلىم "تۇركىستان" گازەتىنىڭ اۆتورلارى

الەمدىك باق الەۋمەتتىك جەلىگە يەك ارتىپ وتىر

اقپاراتتىق تەحنولوگيانىڭ كۇن ساناپ جاڭارىپ، جەتىلىپ وتىرۋى ادامداردىڭ ءومىر ءسۇرۋ سالتىنا ۇلكەن وزگەرىس جاسادى. كەزىندە اقپاراتتى دايارلاۋ، تاراتۋ جۇمىستارى ۇجىمدىق ەڭبەكتىڭ قۋاتىنا سۇيەنەتىن بولسا، قازىر جەكەلەگەن ادامدار ءبىر عانا سمارتفونى ارقىلى جاڭالىقتى ءبىرىنشى بولىپ تاراتۋعا قول جەتكىزە الادى. سول سياقتى ءداستۇرلى مەديا سالاسى دا اۋديتوريا سۇرانىسىن قاناعاتتاندىرۋدىڭ جولىندا بارلىق مۇمكىندىكتى پايدالانۋعا بەت الدى.

سوڭعى كەزدەرى ءداستۇرلى باق يەلەرى ءوزىنىڭ اۋديتورياسىن جوعالتىپ الماۋ ءۇشىن جانە ونىڭ اۋقىمىن ۇلعايتۋ ماقساتىندا الەۋمەتتىك جەلىنى كەڭىنەن پايدالاناتىن بولعان.  ماسەلەن الەمدىك باق-تىڭ كەيبىرىنىڭ الەۋمەتتىك جەلىدەگى بەلسەندىلىگى تومەندەگىدەي.

الەمدىك باق Facebook جەلىسىندەگى وقىرماندار سانى Instagram جەلىسىندەگى وقىرماندار سانى Youtube جەلىسىندەگى وقىرماندار سانى
BBC News 51 ملن. 12.5 ملن. 7.3 ملن.
CNN 32 ملن. 11 ملن. 9.4 ملن.
NYTimes 17 ملن. 8.6 ملن. 2.7 ملن.
The Guardian 8.6 ملن. 3 ملن. 1 ملن.
Financial Times 3.9 ملن. 1.9 ملن. 434 مىڭ

ال ءبىزدىڭ وتاندىق باق وكىلدەرىنىڭ دە كەيبىرى وزدەرىنىڭ الەۋمەتتىك جەلىلەردەگى پاراقشالارىن بەلسەندى تۇردە جۇرگىزىپ كەلەدى.

وتاندىق باق Facebook جەلىسىندەگى وقىرماندار سانى Instagram جەلىسىندەگى وقىرماندار سانى Youtube جەلىسىندەگى وقىرماندار سانى
Nur.kz 307 مىڭ 765 مىڭ 22.6 مىڭ
Tengrinews 86 مىڭ 1.5 مىڭ 450 مىڭ
Zakon.kz 72 مىڭ 335 مىڭ -
سەدموي كانال 14 مىڭ 306 مىڭ 1.8 ملن.
Qazaqstan 80 مىڭ 459 مىڭ 1.5 ملن.
Informburo.kz 55 مىڭ 123 مىڭ 1.23 ملن.
كتك 47 مىڭ 332 مىڭ 434 مىڭ
حابار 24 20 مىڭ 233 مىڭ 676 مىڭ
Kazakh TV 8 مىڭ 11 مىڭ 110 مىڭ

الەمدىك باق-تىڭ الەۋمەتتىك جەلىلەردە اقپارات ونىمدەرىن ناسيحاتتاۋدىڭ نەگىزگى ادىستەرى مىناداي:

  • الەۋمەتتىك جەلىلەردىڭ ەرەكشەلىگىنە قاراي كونتەنتتى بەيىمدەۋ;
  • ساۋالناما جۇرگىزۋ جانە اۋديتوريامەن كەرى بايلانىس جاساۋ;
  • مۋلتيمەديالىق ونىمدەرگە باسا نازار اۋدارۋ;
  • كونتەنتكە وقىرمانداردىڭ گەوگرافياسى، جاس ەرەكشەلىگى مەن قىزىعۋشىلىعى بويىنشا تارگەت جۇرگىزۋ;
  • جاڭالىقتار لەنتاسىندا شىعارىلىمداردى بەكىتۋ جانە ولاردىڭ ىزدەۋ فۋنكتسياسىن وڭتايلاندىرۋ.

ەندى وسى اتالعان تاسىلدەردىڭ ارقايسىنا جەكە-جەكە توقتالساق.

الەۋمەتتىك جەلىلەردىڭ ەرەكشەلىگىنە قاراي كونتەنتتى بەيىمدەۋ

الەمدىك باق الەۋمەتتىك جەلىلەردى نەگىزىنەن «شۇعىل جانە ماڭىزدى جاڭالىقتاردى» تاراتۋ ءۇشىن پايدالانادى. دالەل رەتىندە، «شۇعىل جانە ماڭىزدى» بەلگىسى بار جاڭالىقتاردىڭ وقىلىمى 57 پايىز كورسەتكىشىن كورسەتسە، بۇل باسقا جاڭالىقتار كاتەگورياسىمەن سالىستىرعاندا الدەقايدا جوعارى كورسەتكىش. سونىمەن قاتار، الەۋمەتتىك جەلىلەردىڭ ءبىر ەرەكشەلىگى جاڭالىقتاردى جاريالاعان كەزدە ونىڭ ودان ءارى تارالۋىنا دامۋ تاريحى فۋنكتسياسىن قوسۋعا مۇمكىندىگىنىڭ بولۋى. Facebook مالىمەتتەرىنە سۇيەنسەك اقپارات رەداكتسيالارى از ۋاقىت ارالىعىندا بىرنەشە جاڭالىقتار تىزبەگىن جاريالاۋى مۇمكىن. بۇل ۋاقىتتا اۋديتوريانىڭ بەلسەندىلىگى 10 پايىزعا ارتادى. سونداي-اق، باق وكىلدەرى الەۋمەتتىك جەلىلەردە رەسمي رەسۋرستاردا جارىققا شىقپايتىن «ەكسكليۋزيۆتى» ونىمدەرىن جاريالايدى.

ساۋالناما جۇرگىزۋ جانە اۋديتوريامەن كەرى بايلانىس

باق ءوز اۋديتورياسىمەن كەرى بايلانىس ورناتۋ ءۇشىن جانە ساۋالناما جۇرگىزۋ ماقساتىندا الەۋمەتتىك جەلىنى كەڭىنەن پايدالانادى. مىسالى، ءار ءتۇرلى وقيعالار تۋرالى پىكىرلەر جيناپ،  جاريالانعان ماتەريالداردىڭ ساپاسى تۋرالى پىكىردى ءبىلۋ ماقساتىندا ساۋالناما جۇرگىزەدى.

سونىمەن قاتار، وقىرماندار تىكەلەي ەفير ارقىلى نەمەسە پىكىر قالدىرۋ ارقىلى باق رەداكتسياسىنا سۇراق قويا الادى. Facebook ۇسىنعان مالىمەتتەرگە سۇيەنسەك، باق پاراقشالارىنداعى وقىرماندار سۇراقتارىنا جاۋاپتار بەرگەن پوستتار، باسقا پوستتارعا قاراعاندا 14 پايىز كوپ پىكىر جيناپ،  كەرى بايلانىس ورناتا الادى.

مۋلتيمەديالىق ونىمدەرگە باسا نازار اۋدارۋ

باعدارلامالىق قامتۋ قىزمەتىمەن اينالىساتىن امەريكالىق HubSpot كومپانياسىنىڭ مالىمەتىنە سۇيەنسەك فوتوسۋرەتى بار پوستتار فوتوسىز پوستتارعا قاراعاندا 50 پايىزعا ارتىق  «ۇنايدى» بەلگىسىن جيناي الادى. الەمدىك بۇقارالىق مەديا ستاندارتتى كەسكىندەمەلەرمەن قاتار، گرافيكانى، كاريكاتۋرانى جانە اۋديتوريا نازارىن اۋدارتۋ ءۇشىن انونستىق قىسقا ۆيدەولاردى دا پايدالانادى. ەسكەرە كەتەتىن جايت، ۆيدەولار ۇيالى تەلەفوندار ارقىلى كورۋگە نەگىزدەلگەن. مىسالى، «ستوريس» ءۇشىن فوتولار مەن ۆيدەولار تولىقەكراندى ۆەرتيكالدى فورماتقا تۇرلەندىرىلەدى.

كونتەنتكە وقىرمانداردىڭ گەوگرافياسى، جاس ەرەكشەلىگى مەن قىزىعۋشىلىقتارى بويىنشا تارگەت جۇرگىزۋ

باق-تا ماقالا جاريالاۋدىڭ تيىمدىلىگى – جاريالانعان ماتەريالدىڭ وقىرماندار قىزىعۋشىلىعىن قانشالىقتى تۋدىرا العانىنا تىكەلەي بايلانىستى.

سول سەبەپتى باق جاريالانعان ماقالاعا پاراقشانىڭ وقىرماندارى بولىپ سانالمايتىن پايدالانۋشىلاردىڭ ەلى، قالاسى، جاس ەرەكشەلىگى مەن كاسىبي، جەكە قىزىعۋشىلىعىنا قاراي تارگەت جۇرگىزەدى.

جاڭالىقتار لەنتاسىنا قىزىعۋشىلىق تانىتاتىن اۋديتوريا ءۇشىن ارنايى جارنامالىق پوست جاريالانادى. مىسالى، باق ءوزىنىڭ الەۋمەتتىك جەلىسىندەگى پاراقشاسىنا جازىلماعان نيۋ-يورك قالاسىنىڭ جاس تۇرعىندارىنىڭ الەۋمەتتىك پاراقشالارىنا جارناما رەتىندە بەلگىلى ءبىر پوست كەلۋى مۇمكىن.

جازىلعان پىكىرلەر ساراپتاماسى نەگىزىندە («ۇنايدى» بەلگىلەۋلەرى، پىكىر الماسۋدىڭ كولەمى) ماقالانىڭ مازمۇنى بەيىمدەلىپ، وقىرماندار پىكىرىن از جيناعان ماتەريالدار جاڭالىقتار لەنتاسىنان الىنىپ تاستالادى.

جاڭالىقتار لەنتاسىندا شىعارىلىمداردى بەكىتۋ جانە ولاردىڭ ىزدەۋ فۋنكتسياسىن وڭتايلاندىرۋ

الەۋمەتتىك جەلىدەگى پاراقشانىڭ تانىمالدىلىعىن ارتتىرۋدىڭ ەڭ ءتيىمدى ءتاسىلى – ىزدەۋ فۋنكتسياسىن وڭتايلاندىرۋ. سول سەبەپتى، پروفيلدە باق پاراقشاسىنا سيپاتتاما بولۋ كەرەك. بۇل سيپاتتاما وقىرمانداردىڭ ەڭ ءجيى سۇراۋ سالاتىن سۇراقتارىنا جاۋاپ بەرەتىن بولۋ قاجەت.    كوپتەگەن باق ماڭىزدى ماقالالاردى جاڭالىقتار لەنتاسىندا بەكىتۋ مۇمكىندىگىن ءجيى قولدانادى. بۇل وقىرماندار تاراپىنان پاراقشاعا دەگەن قىزىعۋشىلىقتى وسىرەدى.

قورىتا ايتار بولساق قازىرگى تاڭدا باق اۋديتورياسىن ساقتاپ قالۋ جانە كەڭەيتۋ ءۇشىن الەۋمەتتىك جەلىنى پايدالانۋ ەڭ ءتيىمدى ءتاسىل بولىپ سانالادى. شەتەلدىك باق-تاعى جاڭالىق پەن تەحنوگويالىق سەرپىلىس وتاندىق مەديا سالاسىن دا اينالىپ ءوتىپ جاتقان جوق. الەمدىك مەديا نارىقتاعى وزگەرىستەر جايلى «مەديا دامىتۋ قورى» ماماندارى نەگىزگى دەرەككوزدەر ارقىلى ساراپتاما جاساپ كەلەدى. قازاقستاندىق باق-تىڭ جان-جاقتى جاڭارۋ  ءۇشىن وزگەلەردەگى وزىق ۇلگىلەر ارقاشاندا ارتىق بولعان ەمەس.

ب.بالىقباي

 

سوڭعى جاڭالىقتار