8 ءساۋىر, 16:28 299 0 جاھان انار لەپەسوۆا

رەسەيدە ءبىر تاۋلىكتە مىڭنان استام ادام كوروناۆيرۋس جۇقتىرعان

سوڭعى تاۋلىكتە رەسەيدە كوروناۆيرۋس جۇقتىرۋدىڭ 1175 جاڭا دەرەگى تىركەلدى. بۇل تۋرالى ەلدەگى كوروناۆيرۋس جاعدايىن باقىلاۋ مەن مونيتورينگتەۋ بويىنشا جەدەل شتاب دەرەگىنە سىلتەمە جاساپ Lenta.ru حابارلادى.

بۇگىندە رەسەيدىڭ 81 وڭىرىندە 8672 ادام ىندەت جۇقتىرعان. ەلدە كوروناۆيرۋستان 63 ادام كوز جۇمدى. ال 580 ادام دەرتىنەن ايىقتى.

ىندەت جۇقتىرۋدىڭ جاڭا جاعدايلارىنىڭ كوپشىلىگى ماسكەۋدە تىركەلگەن. جەدەل شتاب دەرەگىنشە، كەشە رەسەي استاناسىندا  66 ادامنان كوروناۆيرۋس انىقتالعان. ماسكەۋ وبلىسىندا – 95, سانكت-پەتەربۋرگتا – 34 دەرەك تىركەلىپتى.

ۆيرۋس ازىرگە چۋكوتكا، التاي رەسپۋبليكاسى، نەنەتسك اۆتونومدى ايماعى جانە تۋۆاعا جەتپەگەن.

رەسەيلىكتەردىڭ 60 پايىزى ەل بيلىگىنىڭ كوروناۆيرۋسقا قارسى كۇرەس شارالارى مەن ەنگىزىلگەن شەكتەۋلەردى قولدايدى. ۆلاديمير پۋتين باستاپقىدا 28 ناۋرىزدان 5 ساۋىرگە دەيىن ەل تۇرعىندارىنا دەمالىس جاريالاعان بولاتىن. كەيىننەن دەمالىس مەرزىمى ءساۋىردىڭ سوڭىنا دەيىن ۇزارتىلدى.

كەشە رەسەي پرەزيدەنتى ەلدەگى ەپيدەميولوگيالىق احۋال جونىندە ماماندارمەن كەڭەس وتكىزدى. جيىندا ەل تۇرعىندارىنىڭ ءوزىن-ءوزى وقشاۋلاۋ رەجيمىن ۇزارتۋ ماسەلەسى كوتەرىلدى. «ميكروب» ينستيتۋتىنىڭ ديرەكتورى ۆلاديمير كۋتىريوۆتىڭ پىكىرىنشە، ەنگىزىلگەن شەكتەۋ شارالارىنىڭ تيىمدىلىگىن انىقتاۋ ءۇشىن جانە ونى ۇزارتۋ نەمەسە قىسقارتۋ تۋرالى شەشىم قابىلداۋ ءۇشىن كەم دەگەندە ءبىر اپتا كۇتۋ قاجەت.  

 دۇنيەجۇزىلىك دەنساۋلىق ساقتاۋ ۇيىمىنىڭ سوڭعى دەرەگىنە سۇيەنسەك، الەمدە كوروناۆيرۋس جۇقتىرعاندار سانى  1 432 409 ادامعا جەتكەن. ىندەت قۇرباندارىنىڭ سانى 82 مىڭنان اسىپ جىعىلدى. ال 302 303 ادام دەرتىنەن ايىقتى.

ەلىمىزدەگى ەپيدەميولوگيالىق احۋالعا كەلەر بولساق، قازاقستاندا كوروناۆيرۋس جۇقتىرعاندار سانى 709 ادامعا جەتتى. كەسىرلى كەسەلدەن 7 وتانداسىمىز كوز جۇمدى. ەمدەلىپ شىققاندار سانى – 54.

سوڭعى جاڭالىقتار