6 ءساۋىر, 19:01 350 0 جاڭالىقتار اسىل تۇمار

3,2 ميلليون وقۋشى قاشىقتىقتان وقۋدا – مينيستر

سۋرەت عالامتوردان الىندى
سۋرەت عالامتوردان الىندى

قر ءبىلىم جانە عىلىم ءمينيسترى اسحات ايماعامبەتوۆ ينتەرنەتتى قولدانۋ ارقىلى قاشىقتان وقۋعا كوشكەن وقۋشىلار سانى 2,4 ميلليونعا جەتكەنىن ايتتى.

ورتالىق كوممۋنيكاتسيالار ورتالىعىندا «توتەنشە جاعداي كەزىندە قاشىقتىقتان وقىتۋدىڭ جاڭا فورماتتارى» تاقىرىبىندا وتكەن ونلاين بريفينگتە مينيستر: «بۇگىن ەلىمىزدەگى وقۋشىلار ءۇشىن ءتورتىنشى توقسان باستالدى. بۇل توقسان ءبىز ءۇشىن ەرەكشە، سەبەبى قاشىقتىقتان وقىتۋ بويىنشا العاش رەت جۇمىستى باستاپ وتىرمىز. قىسقا مەرزىم ىشىندە دايىندىق جۇمىستارىن جۇرگىزگەن بولاتىنبىز. ءبىلىم سالاسى ءۇشىن، ءبارىمىز ءۇشىن بۇل ۇلكەن ەمتيحان، سونىمەن قاتار ۇلكەن مۇمكىندىك. وسى تاجىريبەدەن كەيىن ءبىلىم سالاسى وزگەرەتىنى ايدان انىق. قىسقا مەرزىم ىشىندە ارىپتەستەرىمىز جاڭا قۇزىرەتتىلىك الىپ، قاشىقتىقتان وقىتۋ فورماتىنا وتە جىلدام بەيىمدەلدى»، – دەپ اتاپ ءوتتى.

ول بۇگىنگى ءبىرىنشى كۇننىڭ نەگىزگى ناتيجەسىنە توقتالىپ ءوتتى.

«وڭاي بولماسا دا، قاشىقتىقتان وقۋ فورماتىنا كوشتىك. بىرىنشىدەن، 3,2 ملن وقۋشى ءارتۇرلى باعىت بويىنشا قاشىقتىقتان وقۋدى باستادى. كەيبىرى ارنايى دايىندالعان ينتەرنەت باعدارلاماسى نەگىزىندە وقۋىن باستاسا، باسقالارى تەلەارنا ارقىلى وقۋدى باستادى. ينتەرنەت جۇيەسى ارقىلى بىرنەشە ينتەرنەت پلاتفورما ارقىلى جۇمىس جۇرگىزىپ وتىرمىز. ونىڭ ىشىندە ءبارىمىز ۇيرەنىپ قالعان كۇندەلىك، دارىن-ونلاين جانە تاعى دا باسقا پلاتفورمالار بار. جالپى ينتەرنەتتى قولدانۋ ارقىلى قاشىقتىقتان وقۋعا كوشكەندەر سانى بۇگىنگى كۇنى 2,4 ملن وقۋشىعا جەتتى. كۇندەلىك پلاتفورماسىندا ءبىر كۇن ىشىندە 2,2 ميلليون وقۋشى تاڭعى ساعات 07:00-دەن قازىرگى ۋاقىتقا دەيىن جۇمىس ىستەۋدە. بۇگىن تەك كۇندەلىك پلاتفورماسىنىڭ وزىندە 32 ميلليون سەسسيا ءوتتى. مۇنداي بۇرىن سوڭدى بولماعان. دارىن-ونلاين قوسىمشاسىن تىركەلىپ، دايىندالعان ۆيدەونى قاراپ، ءبىلىم الۋعا بولادى. ۆيدەو ساباقتار بىتكەننەن كەيىن ناقتى سول ءپان بويىنشا بەرىلەتىن سۇراقتارعا جاۋاپ بەرۋگە بولادى. جاۋاپ قاتە بولسا ۆيدەونى قايتادان قاراپ، قاتەلىكتەرمەن جۇمىس ىستەۋگە مۇمكىندىكتەر قاراستىرىلعان. دارىن-ونلاينعا 300 مىڭعا جۋىق وقۋشى تىركەلىپ، ءبىلىم الۋدا»، – دەيدى ول.

سوڭعى جاڭالىقتار