5 ءساۋىر, 11:13 363 0 قوعام انار لەپەسوۆا

جامبىل وبلىسىندا كوروناۆيرۋس جۇقتىرعان 17 ادامعا قاتىستى دەرەكتەر جاريالاندى

سۋرەت عالامتوردان الىندى
سۋرەت عالامتوردان الىندى

5 ءساۋىر كۇنى جامبىل وبلىسىندا COVID-2019 جۇقتىرعان 17 ادام انىقتالدى. سانيتارلىق-ەپيدەميولوگيالىق جاعدايدىڭ كۇشەيتىلگەن شاراسىنىڭ ارقاسىندا ناۋقاس ازاماتتار دەر كەزىندە انىقتالىپ، كارانتينگە جاتقىزىلدى، دەپ حابارلايدى coronavirus2020.kz. 

جۇقتىرىلعان ىندەت سىرتتان اكەلىنگەن جانە ونى ناۋقاستارمەن بايلانىستا بولعاندار جۇقتىرىپ العان. ءتورت ناۋقاس ءۇندىستاننان كەلگەن رەيس جولاۋشىلارى. ۇشىپ كەلگەن جولاۋشىلار ارنايى اۆتوبۋسپەن مەديتسينا قىزمەتكەرلەرى مەن پوليتسيانىڭ باقىلاۋىمەن كارانتيندىك ستاتسيونارعا جەتكىزىلىپ، وقشاۋلاندى. لابوراتوريالىق زەرتتەۋ ناتيجەسى بويىنشا 1984, 1996, 1998, 2000 جج. تۋعان ءتورت جولاۋشىدان ينفەكتسيا انىقتالدى.

قورداي اۋدانىندا ءۇش جاعداي تىركەلدى. 1975 جانە 1982 جىلدارى تۋعان ەكى تۇرعىن نۇر-سۇلتان قالاسىنىڭ ۆيرۋس جۇقتىرعان تۇرعىنىمەن بايلانىستا بولعاندىقتان كارانتيندىك ستاتسيوناردا جاتقان بولاتىن. تاعى ءبىر ىندەت جۇقتىرعان 1999 جىلعى ازاماتشا 23 ناۋرىز كۇنى قوستاناي قالاسىنان «قوستاناي-الماتى» پويىزىمەن كەلگەن.

شەكارا پۋنكتەرىندەگى كۇشەيتىلگەن شارالارعا بايلانىستى قازاقستانعا كىرەتىن بارلىق ازامات كارانتيندىك ستاتسيونارعا جاتقىزىلادى، ونىڭ ىشىندە جۇك كولىگىنىڭ جۇرگىزۋشىلەرى دە بار. ناتيجەسىندە 10 ناۋقاس انىقتالدى. ولاردىڭ 4-ەۋى قىرعىزستان ازاماتى بولسا، 6-ۋى كورشىلەس ەلدەن جۇك تاسىعان قازاقستان تۇرعىنى.

ناۋقاس ازاماتتاردىڭ بارلىعى ينفەكتسيالىق ستاتسيونارعا جاتقىزىلدى. بايلانىستا بولعان ادامداردى انىقتاپ، وقشاۋلاۋ جانە تۇرعىلىقتى مەكەنجايى مەن ناۋقاستاردىڭ بارعان جەرلەرىن دەزينفەكتسيالاۋ جۇمىستارى ءجۇرىپ جاتىر.

ەسكە سالا كەتسەك، كوروناۆيرۋس ينفەكتسياسىنىڭ جاڭا جاعدايلارى تىركەلگەننەن كەيىن جامبىل وبلىسىنىڭ مەملەكەتتىك باس سانيتار دارىگەرىنىڭ بۇيرىعىمەن قورداي اۋدانى اۋماعىندا 2020 جىلدىڭ 6 ساۋىرىنەن باستاپ تۇرعىنداردىڭ قىزمەتى مەن ءومىر سالتىنا، شارۋاشىلىعىنا ەرەكشە ءتارتىپ ورناتاتىن كارانتين رەجىمىن ەنگىزۋ تۋرالى شەشىم قابىلداندى.

 

سوڭعى جاڭالىقتار