29 ناۋرىز, 18:46 4999 0 ىشكى ساياسات انار لەپەسوۆا

الەۋمەتتىك تولەم الۋ ءۇشىن قۇجات جيناۋدىڭ قاجەتى جوق – مينيستر

ەلىمىزدە توتەنشە جاعداي رەجيمىنە بايلانىستى الەۋمەتتىك تولەم تولەۋ تالاپتارى جەڭىلدەيدى. بۇل تۋرالى قر اقپارات جانە قوعامدىق دامۋ ءمينيسترى داۋرەن اباەۆ مالىمدەدى. 

«بىرىنشىدەن، تولەم الاتىندار قاتارى ارتتى. بۇرىن ايىنا 42,5 مىڭ تەڭگە الەۋمەتتىك تولەمگە الاتىندار قاتارىنا جاڭا ساناتتار قوسىلدى. بۇل سۋبەكتىلەرى جۇمىستاردى ورىنداۋ نەمەسە قىزمەتتەر كورسەتۋ بولىپ تابىلاتىن، سالىق اگەنتتەرى مىندەتتى زەينەتاقى جارنالارىن تولەگەن ازاماتتىق-قۇقىقتىق كەلىسىمشارتتار بويىنشا تابىس الاتىن ادامدار، سونداي-اق كارانتين ەنگىزىلگەن ەلدى مەكەندەردەگى ءىرى كاسىپكەرلىك سۋبەكتىلەرىنىڭ جۇمىسشىلارى»، - دەيدى داۋرەن اباەۆ حابار24 ارناسىندا وتكەن ونلاين بريفينگتە.

مينيستر بۇدان بىلاي تولەم الۋ ءۇشىن توتەنشە جاعدايعا بايلانىستى جالاقىدان ايىرىلىپ قالعانىن راستايتىن قۇجاتتاردى جيناۋ قاجەتتىلىگى جوق ەكەنىن ايتتى.

«بۇرىن الەۋمەتتىك تولەمدەر تۋرالى ءوتىنىشتى جۇمىس بەرۋشىلەر ءوز قىزمەتكەرلەرى ءۇشىن، جەكە كاسىپكەرلەر، توتەنشە جاعداي جانە بىرىڭعاي جيناقتىق تولەم جاساۋشىلار وزدەرى ءوتىنىش بەرەتىن. جۇمىس بەرۋشىلەر جۇمىسشىلارى توتەنشە جاعدايعا بايلانىستى تابىسىنان ايىرىلعانىن راستايتىن قۇجات ۇسىنىپ، جۇمىسشىلارىنىڭ ءتىزىمىن جانە جالاقىسى ساقتالماعان ەڭبەك دەمالىسىنا شىعارۋ تۋرالى بۇيرىعىن كورسەتۋى كەرەك بولاتىن. جاڭا ەرەجە بويىنشا، توتەنشە جاعدايعا بايلانىستى تابىسىنان ايىرىلعانىن راستايتىن قۇجات تالاپ ەتىلمەيدى. الەۋمەتتىك تولەم بەرىلۋى ءۇشىن جۇمىس بەرۋشى جۇمىسشىلارىنىڭ ءتىزىمى بار ءوتىنىش بەرەدى. ال جەكە كاسىپكەرلەر، بىرىڭعاي جيىنتىق تولەم جاسايتىندار جەكە مالىمەتتەرى جازىلعان ءوتىنىش قانا بەرەدى. جۇمىسشى بۇل ءوتىنىشتى ءوزى دە جازا الادى. ءوتىنىش جازۋشىلار تج جاعدايىنا بايلانىستى تابىسىنان ايىرىلىپ قالۋ فاكتىسىنە بايلانىستى جاۋاپكەرشىلىكتى وزدەرىنە الادى. ءوتىنىش ەلەكتروندىق ۇكىمەت ۆەب-پورتالى ارقىلى جىبەرىلەدى» - دەدى مينيستر.

تاعى ءبىر ايتا كەتەرلىگى، تولەم تاعايىنداۋ ءۇشىن الەۋمەتتىك ساقتاندىرۋ جۇيەسىنە قاجەتتى قاتىسۋ مەرزىمى قىسقارتىلدى. بۇرىن تولەم تاعايىنداۋ ءۇشىن الەۋمەتتىك ساقتاندىرۋ جۇيەسىندە سوڭعى 12 اي ىشىندە كەم دەگەندە 3 اي قاتىسۋ تالاپ ەتىلەتىن. ەندى، ەگەر قىزمەتكەر (جك جانە جپ دەربەس) مەملەكەتتىك الەۋمەتتىك ساقتاندىرۋ قورىنا (اقك ءۇشىن – بجزق-عا جارنالار) سوڭعى 12 ايدا كەمىندە 1 رەت الەۋمەتتىك اۋدارىمدار جاساعان بولسا، الەۋمەتتىك تولەمدەر تاعايىنداۋعا جەتكىلىكتى.

ماسق-تەن الەۋمەتتىك تولەمدى تاعايىنداۋعا ۇمىتكەر ازاماتتارعا الەۋمەتتىك اۋدارىمدار نەمەسە زەينەتاقى جارنالارىنىڭ بار-جوعىن دالەلدەۋدىڭ قاجەتى جوق، بۇل اۆتوماتتى تۇردە «ازاماتتارعا ارنالعان ۇكىمەت» مەملەكەتتىك كورپوراتسياسى» كەاق تەكسەرەدى. وتىنىمدەردى قاراۋ جانە الەۋمەتتىك تولەمدى تاعايىنداۋ مەرزىمى 7-دەن 3 جۇمىس كۇنىنە دەيىن قىسقارتىلدى.

 

سوڭعى جاڭالىقتار