27 ناۋرىز, 15:22 530 0 دەنساۋلىق انار لەپەسوۆا

اتىراۋدا كوروناۆيرۋس جۇقتىرعان ناۋقاستاردىڭ قايدان كەلگەنى انىقتالدى

سۋرەت عالامتوردان الىندى
سۋرەت عالامتوردان الىندى

اتىراۋدا كوروناۆيرۋس جۇقتىرعان 3 ناۋقاستىڭ قايدان كەلگەنى بەلگىلى بولدى.

ناۋقاستارعا قاتىستى دەرەكتى اتىراۋ وبلىسى دەنساۋلىق ساقتاۋ باسقارماسىنىڭ باسشىسى بايتوللا عازيزوۆ حابار24 تەلەارناسىنداعى ونلاين-بريفينگ بارىسىندا جاريالادى.

باسقارما باسشىسىنىڭ ايتۋىنشا، 3 ناۋقاستىڭ جاعدايى قاناعاتتانارلىق.

"وكىنىشكە قاراي، 27 ناۋرىزدا اتىراۋ وبلىسىندا كوروناۆيرۋس جۇقتىرعان 3 ادام انىقتالدى. ءبىرىنشى ناۋقاس 21 ناۋرىزدا نۇر-سۇلتان قالاسىنان اتىراۋعا كەلدى. 26 ناۋرىزدا جرۆي بەلگىلەرى بولعان سوڭ اناليز الىندى. ناتيجەسىندە ينفەكتسيا جۇقتىرعانى بەلگىلى بولدى. ەكىنشى ناۋقاس 17 ناۋرىزدا ىستامبۇلدان الماتىعا، سوسىن الماتىدان اتىراۋعا كەلدى. ول ىستامبۇلدان كەلگەن ەلوردالىق تۇرعىنمەن بايلانىستا بولعاندىقتان، ونىڭ اناليزدەرى الىندى. ناتيجەسىندە ينفەكتسيا جۇقتىرعانى انىقتالدى. ءۇشىنشى ناۋقاس كەشە امستەردامنان كەلدى. ۇشىپ كەلگەن بارلىق جولاۋشى كارانتينگە جاتقىزىلدى. وكىنىشكە قاراي، تەست ناتيجەسى بويىنشا ودان دا كوروناۆيرۋس انىقتالدى. ءۇش ناۋقاستىڭ جاعدايى قاناعاتتانارلىق، - دەدى باسقارما باسشىسى.

ناۋقاستارمەن قارىم-قاتىناستا بولعان بارلىق ادام انىقتالىپ، وقشاۋلاندى.

ايتا كەتەيىك، بۇعان دەيىن اتىراۋ وبلىسىندا كوروناۆيرۋس ىندەتىن جۇقتىرعان 3 ناۋقاس تىركەلگەنىن حابارلاعانبىز.

سوڭعى جاڭالىقتار