26 ناۋرىز 2020, 13:33 2201 0 قاۋىپسىزدىك انار لەپەسوۆا

"ناماز وقيمىن، ىندەت جۇقپايدى": ءدىن ماماندارى ساقتىق شارالارىن ورىندامايتىندارعا ەسكەرتۋ جاسادى

ەلىمىزدە كوروناۆيرۋستىق ينفەكتسيا پايدا بولىپ، توتەنشە جاعداي جاريالانعالى بەرى حالىق اراسىندا ءتۇرلى قاڭقۋ سوزدەر تاراپ كەتتى. ماسەلەن، كەيبىرەۋلەر "بەس ۋاقىت ناماز وقىپ، سۇرە بىلسەم، ۆيرۋستان امان قالامىن" دەگەن پىكىردە. 

ەلىمىزدىڭ بەلگىلى ءدىن قىزمەتكەرلەرى اتالمىش ماسەلەگە قاتىستى پىكىر ءبىلدىردى، دەپ حابارلايدى ەۋرازيا ءبىرىنشى ارناسى. 

شىدام مەن سابىر ناعىز مۇسىلمانعا ءتان قاسيەت. الايدا ەل ىشىندە كوروناۆيرۋستان ساقتانۋ شارالارىن ەلەمەي، ماسكا كيۋدەن باس تارتىپ، ءتىپتى مەشىتتە ناماز وقۋدى جالعاستىرا بەرگىسى كەلەتىندەر بار. وسى ورايدا اتالمىش ماسەلەنىڭ ارا-جىگىن حالىققا تانىس يمامدار اجىراتىپ بەردى.

Islam.kz ۇلتتىق، رۋحاني-اعارتۋ پورتالىنىڭ باسشىسى قايرات جولدىبايۇلىنىڭ ايتۋىنشا، شىنايى تاقۋالىق ارەكەت پەن سالعىرتتىقتى شاتاستىرۋدان اۋلاق بولۋ كەرەك.

"سوزبەن جاسالعان دۇعا جەتكىلىكتى دەۋ ءدىندى، پايعامباردى دۇرىس تۇسىنبەۋ. اللا ەلشىسى (س.ا.ۋ.) نە نارسە بولسىن، الدىمەن اللانىڭ وسى دۇنيەدە قويعان زاڭدىلىقتارىن، سەبەپ-سالدارلارىن ورىندايتىن.

مىسالعا ۇحۇد سوعىسىن الايىق. ماديناعا قالىڭ اسكەرمەن شابۋىل جاساعان قۇرايىشتىقتارعا قارسى مۇسىلمانداردى بارىنشا قارۋلاندىردى. ءوزى دە ساۋىتىن كيىپ، قولىن كوككە كوتەرىپ، ەگىلە جىلاپ ۇزاق دۇعا جاسادى. ساحابالارىنا "ساۋىتتارىڭدى شەشىپ، قارۋلارىڭدى تاستاپ، "فالاق" پەن "ناس" سۇرەلەرىن وقىساڭدار، ءسوزسىز جەڭىسكە جەتەسىڭدەر" دەگەن جوق. كەرىسىنشە ەكى ءتۇرلى دۇعانى دا كەمەلىنە جەتكىزىپ ورىندادى.

حانداق سوعىسىندا دا دۇشپانداردان ءمادينا قالاسىنىڭ اينالاسىنا ور قازۋ ارقىلى قورعاندى. اللا ەلشىسىنىڭ: "قاي جەردە وبا اۋرۋى شىققانىنىن ەستىسەڭدەر، ول جەرگە اتاپ باسپاڭدار. ال وزدەرىڭ تۇرىپ جاتقان مەكەندە جۇقپالى اۋرۋ شىقسا، ول جەردەن قاشىپ، باسقا جاققا بارماڭدار!" - دەگەنى ىسپەن جاسالعان دۇعاعا جاتادى. جۇقپالى اۋرۋدى اۋىزدىقتاۋ ءۇشىن جاسالعان كارانتينى بولماق، - دەدى قايرات جولدىبايۇلى.

سونىمەن بىرگە قمدب "شاريعات جانە ءپاتۋا" ءبولىمى باسشىسىنىڭ ورىنباسارى حاسان امانقۇلوۆ كەز كەلگەن ءپاتۋا سارالانىپ، تارازىعا سالىنىپ، وزگە ەلدەردىڭ تاجىريبەسىمەن سالىستىرىلىپ بارىپ شىعارىلاتىنىن ايتتى.

"توتەنشە جاعدايدا ادام ومىرىنە دەنساۋلىعىنا، مال-مۇلكىنە، بالا شاعاسىنا جانە وتباسى مۇشەلەرىنە قاۋىپ تونەتىن كەزدە كەيبىر عيباداتتاردى شاريعات توقتاتۋعا رۇقسات ەتەدى. اللا تاعالا قۇران كارىمدە "باقارا" سۇرەسىنىڭ 195-ءشى اياتىندا: "سەندەر وزدەرىڭدى ولىمگە، جاماندىققا باستاماڭدار. جاماندىقتى بىلە تۇرا ادامداردى يتەرمەلەمەڭدەر، باستاماڭدار" دەگەن وسى مازمۇندا ايات كەلەدى", - دەدى ول.

ۆيرۋس - اقىر زاماننىڭ سوڭعى بەلگىلى ەمەس. ءدىنتانۋشى ماماندار بايبالام سالاتىنداردىڭ ارەكەتى دىنگە دە قايشى دەپ وتىر.

"ولىمنەن ەشكىم قاشىپ قۇتىلمايدى. "نيسسا" سۇرەسىنىڭ 78-ءشى اياتىندا ايتادى: "سەندەر مىقتى قورعاننىڭ ىشىندە بولساڭدار دا ءولىم سەندەردى تابادى" دەيدى. بىراق، ولىمنەن قاشىپ قۇتىلمايمىز، ءبارىبىر ولەمىز دەپ سالعىرتتىققا سالىنۋ، بەيقامدىققا بوي ۇرۋ، ساقتانباۋ، اللانىڭ بىزگە بەرگەن اقىلىن پايدالانباۋ، ماماندار پىكىرىن پايدالانباۋ بۇل ءدىننىڭ، يسلامنىڭ ۇستانىمى ەمەس.

ادامزاتقا كەلىپ جاتقان ىندەتتەن امان قالامىن، ءوز ۇستانىمىممەن امان قالامىن دەۋ جانساقتىق، سايازدىق، بۇل دۇرىس دۇنيە ەمەس", - دەدى ءدىنتانۋشى كەڭشىلىك تىشقانۇلى.

ەسكە سالا كەتسەك، الماتىدا كارانتين كەزىندە 19 ناۋرىزدان باستاپ بارلىق مەشىتتەر جابىلدى. سونداي-اق قمدب توتەنشە جاعداي ۋاقىتىندا مەشىتتەردە جۇما نامازىمەن قوسا بەس ۋاقىت نامازدىڭ ۋاقىتشا وقىلمايتىنىن ايتىپ مالىمدەمە جاسادى.

;feature=emb_logo

سوڭعى جاڭالىقتار