26 ناۋرىز, 11:55 210 0 قاۋىپسىزدىك انار لەپەسوۆا

كارانتين: بۇگىننەن باستاپ الماتىدا جاڭا شەكتەۋلەر كۇشىنە ەندى

بۇگىننەن باستاپ كارانتينگە بايلانىستى جاڭا شەكتەۋلەر كۇشىنە ەندى.

بۇل تۋرالى الماتى اكىمى باقىتجان ساعىنتاەۆ Instagram جەلىسىندەگى پاراقشاسىندا جازدى.

"كوروناۆيرۋسقا قاتىستى جاعداي ءبىز ويلاعاننان الدەقايدا قاۋىپتىرەك بولدى. قاۋىپتى جەتە تۇسىنبەۋ — جاۋاپسىزدىق جانە قىلمىسپەن پارا-پار. وكىنىشتىسى سول، كارانتينگە نەمقۇرايلى قاراپ، شەكتەۋ شارالارىن ساقتاماي، حالىقتىڭ ءومىرىن قاۋىپ-قاتەرگە تىككەن جاندار ازايماي تۇر.

جۇمىسىن جالعاستىرىپ جاتقان سپورت زالدارى مەن مەيرامحانالار، سانيتارلىق نورمالاردى ساقتاماعان ازىق-تۇلىك دۇكەندەرى انىقتالدى.

مامانداردىڭ سوزىنە قۇلاق اسپاي، كوشەدە قىدىرىپ جۇرگەن تۇرعىندار دا بار. تارتىپكە باعىنباعاندار ءۇشىن قاتاڭ شارا قولدانىلادى. بۇل رەتتە توتەنشە جاعداي رەجيمىن قامتاماسىز ەتۋ جونىندەگى قالالىق جەدەل شتابتىڭ وكىلدەرى قوسىمشا شەكتەۋ شارالارىن قاراستىرۋدا", - دەگەن شاھار باسشىسى قوعامدىق كولىك قوزعالىسىنىڭ كەستەسىنە وزگەرىس ەنگىزىلەتىنىن ايتتى.

ياعني 26 ناۋرىزدان باستاپ، قالادا قوعامدىق كولىك قوزعالىسى ساعات تاڭعى 6:00-دەن كەشكى 19:00-گە دەيىن عانا جۇرەدى.

سونداي-اق، شتابتىڭ شەشىمىمەن نەگىزگى ساۋدا نىساندارى مەن قىزمەت كورسەتۋ نىساندارىنىڭ جۇمىسى توقتاتىلادى.

"بۇل شەشىم تەك ءدارىحانالار مەن مەديتسينالىق ۇيىمداردىڭ، ازىق-تۇلىك دۇكەندەرى، جانار-جاعارماي ستانسالارىنىڭ جۇمىسىنا شەكتەۋ قويمايدى", - دەدى ساعىنتاەۆ.

ايتا كەتەيىك، ەلىمىزدە COVID-19 كوروناۆيرۋستىق ينفەكتسياسىن جۇقتىرعاندار سانى 88-گە جەتتى. 

سوڭعى جاڭالىقتار