25 ناۋرىز, 18:25 4238 0 اتاجۇرت باقىتبەك قادىر

قىتايدان شىققان حانتاۆيرۋستەن قاۋىپ بار ما؟

قىتايدىڭ ۋحان قالاسىنان ورشىگەن قاتەرلى كوروناۆيرۋس ىندەتى دۇنيەجۇزىن تۇگەلدەي شارپىپ، بارعان سايىن شەڭگەلىن باتىرىپ بارادى. بارلىق ستاتيستيكالىق مالىمەت كوز الدىمىزدا. ادامزات ءبىر ءسات ەستەن شىعارىپ الاتىنى بولماسا مۇنداي ءىرى ىندەتتەر ۇنەمى جەر بەتىندە جۇرەتىنى، الدەبىر مۋتاتسيا كەزىندە قايتا باس كوتەرەتىنى جايلى ايتادى ماماندار.

كەشەدەن بەرى الەمنىڭ كەيبىر بەيرەسمي اقپارات كوزدەرىنە سۇيەنسەك، قىتايدىڭ يۋننان پروۆينتسياسىندا كوروناۆيرۋcتان بولەك تاعى ءبىر ىندەت شىققان. كەنەت قايتىس بولعان ادامنىڭ دياگنوزىن دارىگەرلەر تەز ارادا انىقتىپ، حانتاۆيرۋستان شىعاتىن كارديوپۋلمونالدى سيندروم ەكەنىن انىقتاعان. ول ادامنىڭ قاسىندا بولعان 32 ادام كارانتينگە جاتقىزىلدى. ازىرگە ولاردىڭ اراسىندا ۆيرۋس جۇقتىرعاندار تۋرالى مالىمەت جوق.

حانتاۆيرۋس – قازاقشالاپ ايتقاندا تىشقانۆيرۋس دەۋگە دە بولادى. سەبەبى بۇل ۆيرۋس كەمىرگىشتەر ارقىلى ادامعا جۇعاتىن اۋرۋ.

اقش-تىڭ جۇقپالى اۋرۋلاردى باقىلاۋ ورتالىعىنىڭ مالىمەتتەرى بويىنشا، بۇل ۆيرۋستى جۇقتىرۋ قاۋپى ءتىپتى دەنى ساۋ ادام ءۇشىن دە وتە جوعارى. حانتاۆيرۋس سيمپتومدارى كوپتەگەن رەسپيراتورلىق اۋرۋدىڭ بەلگىلەرىنە ۇقساس. باس اۋرۋى، السىزدىك، جوتەل، اس قورىتۋدا قيىندىق، قۇسۋ بايقالادى. حانتاۆيرۋستى ەمدەيتىن ۆاكتسينا ءالى جوق دەيدى.

ال وڭتۇستىك كورەيانىڭ Hallym حالىقارالىق مەديتسينا ۋنيۆەرسيتەتىنىڭ تۇلەگى جانە Hallym اۋرۋحاناسىنىڭ بىلىكتى دارىگەرى ايىمبەك ۇلىقپان اتالعان حانتاۆيرۋس سونشالىقتى ۇرەيلى ەمەس ەكەنىن ايتادى.

– حانتاۆيرۋس وتە سيرەك كەزدەسەتىن ۆيرۋس. بۇل ۆيرۋستىڭ قازىرگە 12 تۇرىنەن  1 ءتۇرى عانا ادامنان ادامعا جۇققانى بايقالعان. باسقا تۇرلەرى ادامدى تىستەۋ نەمەسە شاعۋ كەزىندە جۇعادى. كەمىرگىشتەردىڭ سىلەكەيى، ءزارى نەمەسە كەمىرگىشتەردىڭ ناجىسىمەن لاستانعان زاتتاردان (تىستەۋ، شاعۋ ارقىلى) جۇعادى. بۇل ۆيرۋس جۇرەك توقتاۋىنا الىپ كەلەدى جانە ناۋقاستاردىڭ شامامەن 36-40 پايىزىن ولىمگە اپارادى، بىراق ول ادامنان ادامعا تارالمايدى. دەگەنمەن كەيبىر مالىمەتتەرگە قاراعاندا ادامنان ادامعا جۇققانى بايقالدى، – دەيدى دارىگەر.

قانداسىمىز ايىمبەك ۇلىقپان – موڭعوليانىڭ بايان-ولگەي ايماعى التاي ەلدىمەكەنىندە دارىگەرلەر وتباسىندا تۋعان. ايىمبەك ۇلىقپاننىڭ ايتۋىنا قاراعاندا، ازىرگە بۇل ىندەتتەن قاۋىپ از. ەسەسىنە، مەيىلىنشە كوروناۆيرۋستان ساقتانۋ قاجەت دەيدى.

باقىتبەك قادىر

سوڭعى جاڭالىقتار