25 ناۋرىز, 10:48 264 0 جاڭالىقتار اسىل تۇمار

«Birgemiz» قوعامدىق قورىنىڭ نەگىزگى 10 قاعيداتى ايقىندالدى

ەلباسى، «Nur Otan» پارتياسىنىڭ ليدەرى نۇرسۇلتان نازارباەۆتىڭ باستاماسىمەن قۇرىلعان «Birgemiz» قوعامدىق قورىنىڭ قامقورشىلار كەڭەسى وتىرىسىنىڭ 2020 جىلعى 23 ناۋرىزداعى №3 حاتتاماسىمەن كوروناۆيرۋسقا قارسى كۇرەس جاعدايىندا مۇقتاج جاندارعا قولداۋ كورسەتۋدى ۇيىمداستىرۋدا باسشىلىققا الىناتىن نەگىزگى 10 قاعيدات بەكىتىلدى.

1. ەرىكتى جارنالار مەن قايىرمالدىق كومەك. بارلىق قايىرىمدىلىقتى بيزنەس وكىلدەرى تەك جەكە قاراجاتى ەسەبىنەن ەرىكتى تۇردە جاسايدى. بيۋدجەتتىك ۇيىمداردان، سونداي-اق جالاقىدان اۋدارىمدار قابىلدانبايدى.

2. ادرەستىلىك. تىكەلەي جەكە قولداۋ حالىقتىڭ الەۋمەتتىك ءالسىز توپتارىنا (جاسىنا بايلانىستى COVID-19 جۇقتىرۋ قاۋپى جوعارى جاندارعا، كوروناۆيرۋستىڭ زاردابىن شەككەن جانە الەۋمەتتىك-ەكونوميكالىق قيىندىقتارعا ۇشىراعان تۇرمىسى تومەن قازاقستاندىقتارعا) كورسەتىلەدى. ساناتتار ناقتىلانۋدا. كومەك ەلدىڭ ىندەت جۇقتىرۋ قاۋپى جوعارى ءىرى قالالارىنىڭ تۇرعىندارىنا بەرىلەدى.

3. كومەكتىڭ ادىلدىگى. كومەك الۋشىلاردىڭ ءتىزىمىن انىقتاۋدا سۋبەكتيۆتى پايىمداۋلار مەن داۋلاردى بولدىرماۋ ءۇشىن قور زاڭناما تالاپتارىنا جانە مەملەكەتتىك ورگانداردىڭ (مينيسترلىكتەر مەن اكىمدىكتەردىڭ) رەسمي دەرەكتەرىنە سۇيەنەدى.

4. قولما-قولسىز جانە بايلانىسسىز كومەك. بارلىق تولەمدەر، ترانزاكتسيالار، ەسەپ ايىرىسۋلار تەك قولما-قول اقشاسىز ۇلگىدە جۇزەگە اسىرىلادى، بۇل قارجى جۇمسالىمدارىنىڭ اشىقتىعى مەن ايقىندىعىن قامتاماسىز ەتەدى.

5. قور قىزمەتىنىڭ ۋاقىت بويىنشا شەكتەلۋى. قوردىڭ قىزمەتى ينفەكتسيانىڭ تارالۋىنا بايلانىستى ەلدەگى توتەنشە جاعدايدىڭ ۇزاقتىعىمەن شەكتەلەدى.

6. قور قاراجاتىنىڭ ماقساتتى جۇمسالۋى. اكىمشىلىك، ۇيىمداستىرۋشىلىق شىعىستارى «Nur Otan» پارتياسىنىڭ قايتارىمسىز كومەگى ەسەبىنەن وتەلەدى.

7. ۇنەمدىلىك جانە تيىمدىلىك. الەۋمەتتىك جانە گيگيەنالىق پاكەتتەرگە سالىناتىن تاۋارلار باسەكەلىك نەگىزدە تاۋاردىڭ ساپاسى مەن قۇنىنىڭ وڭتايلى قاتىناسى ەسكەرىلە وتىرىپ ساتىپ الىنادى.

8. قازاقستاندىق وندىرۋشىلەردى قولداۋ. الەۋمەتتىك پاكەتتەردى جاساۋ ءۇشىن تاۋارلار، قازاقستاندا جاسالمايتىن تاۋارلاردى قوسپاعاندا، تەك قازاقستاندىق وندىرۋشىلەردەن ساتىپ الىنادى.

9. قوردىڭ قاراجاتى مەن مەملەكەتتىك بيۋدجەت اراسىنىڭ ناقتى اجىراتىلۋى. كومەك زاتتاي الەۋمەتتىك پاكەتتەر (ازىق-تۇلىك سەبەتى), قورعانىس قۇرالدارى (انتيسەپتيكتەر، ماسكالار، قولعاپتار), قولما-قول اقشاسىز تولەمدەر تۇرىندە كورسەتىلەدى. مەملەكەتتىك بيۋدجەتتەن تولەنەتىن قاجەتتىلىكتەر قارجىلاندىرىلمايدى.

10. قوردىڭ اشىق، ايقىن قىزمەتى. قور قىزمەتىنىڭ اشىقتىعى مەن ايقىندىعى قوردىڭ باسقارماسىنان جاۋاپتى تۇلعانىڭ كۇندەلىكتى بريفينگ وتكىزىپ، تولىقاندى اقپاراتتى بەرۋى، تۇسكەن قارجى مەن كورسەتىلگەن كومەك تۋرالى ەسەپتەردى تۇراقتى تۇردە جاريالايتىن ارنايى سايت قۇرۋ ارقىلى قامتاماسىز ەتىلەدى.

سونىمەن قاتار قوعامدىق قوردا ۇيىم قىزمەتىنىڭ ءوز جارعىلىق ماقساتتارىنا سايكەستىگىن باقىلاۋدى قۇرامىنا بەلگىلى قوعام جانە مەملەكەت قايراتكەرلەرى، ازاماتتىق قوعام وكىلدەرى مەن جاستار كىرەتىن قامقورشىلار كەڭەسى جۇزەگە اسىراتىنى اتالىپ ءوتتى. قاراجاتتىڭ جۇمسالۋىن تەكسەرۋ كوميسسياسى باقىلايدى.

سوڭعى جاڭالىقتار