24 ناۋرىز 2020, 15:26 1105 0 جاڭالىقتار اسىل تۇمار

«Birgemiz» قوعامدىق قورىنىڭ باسقارما توراعاسى رۋسلان ساكەەۆ: بىزگە «Nur Otan» پارتياسىنىڭ جان-جاقتى كومەگى قاجەت

ەلوردادا كوروناۆيرۋسپەن كۇرەس جاعدايىندا حالىقتىڭ مۇقتاج توبىنا قولداۋ كورسەتۋ ماقساتىندا ەلباسى نۇرسۇلتان نازارباەۆتىڭ باستاماسىمەن قۇرىلعان «Birgemiz» قوعامدىق قورى قامقورشىلار كەڭەسىنىڭ العاشقى وتىرىسى ءوتتى. 

جيىن بارىسىندا قوردىڭ قامقورشىلار كەڭەسىنىڭ قۇرامى جاريالانىپ، وعان بەلگىلى قوعام جانە مەملەكەت قايراتكەرلەرى، ازاماتتىق قوعام وكىلدەرى مەن جاستار كىردى.

قور قۇرىلتايشىلارى جينالىسىنىڭ شەشىمى بويىنشا مەملەكەت باسشىسىنىڭ ۇسىنىستارى ەسكەرىلە وتىرىپ، قامقورشىلار كەڭەسىنىڭ قۇرامىنا: قامقورشىلار كەڭەسىنىڭ توراعاسى – «Nur Otan» پارتياسى توراعاسىنىڭ ءبىرىنشى ورىنباسارى باۋىرجان بايبەك، قامقورشىلار كەڭەسى توراعاسىنىڭ ورىنباسارى – تۇڭعىش پرەزيدەنت قورىنىڭ اتقارۋشى ديرەكتورى قانات جۇماباەۆ، قامقورشىلار كەڭەسىنىڭ حاتشىسى – جۋرناليست، «باس رەداكتورلار كلۋبىنىڭ» پرەزيدەنتى بيبىگۇل جەكسەنباي، كەڭەس مۇشەلەرى – پارلامەنت سەناتىنىڭ دەپۋتاتتارى نۇرتورە ءجۇسىپ پەن ولگا پەرەپەچينا، پارلامەنت ءماجىلىسىنىڭ دەپۋتاتتارى نۇرلان ءابدىروۆ پەن باقتىقوجا ىزمۇحامبەتوۆ، «ۆولونتەرلەر ليگاسى» قوعامدىق قورىنىڭ ءتورايىمى ايسۇلۋ ەرنيازوۆا، «ۇلتتىق ۆولونتەرلار جەلىسى» زاڭدى تۇلعالار قاۋىمداستىعىنىڭ ءتورايىمى ۆەرا كيم، «مير چەرەز دۋحوۆنوست» قوعامدىق بىرلەستىگىنىڭ ءتورايىمى ساۋلە مۋحاشوۆا، «ۇلتتىق عىلىمي كارديوحيرۋرگيا ورتالىعى» اق باسقارماسىنىڭ توراعاسى يۋري پيا جانە «Altyn Kyran» حالىقارالىق قايىرىمدىلىق قورىنىڭ پرەزيدەنتى يسلامبەك سالجانوۆ كىردى.

قوردىڭ جوعارى باسقارۋ ورگانى – قۇرىلتايشىلاردىڭ جالپى جينالىسىنىڭ توراعاسى پرەمەر-ءمينيستردىڭ ورىنباسارى ەرالى توعجانوۆ بولدى.

قور قۇرىلتايشىلارى – «ارداگەرلەر ۇيىمى» (باقتىقوجا ىزمۇحامبەتوۆ باسقارادى) جانە «مير چەرەز دۋحوۆنوست» قوعامدىق بىرلەستىكتەرى (ساۋلە مۋحاشوۆا باسقارادى).

«Birgemiz» قورىنىڭ باسقارما توراعاسى رۋسلان ساكەەۆ قورعا «Nur Otan» پارتياسىنىڭ جان-جاقتى كومەگى قاجەت ەكەندىگىن اتاپ كورسەتتى. ويتكەنى وسىناۋ قوعامدىق بىرلەستىكتىڭ ءاربىر وڭىردە فيليالدارى جۇمىس ىستەيدى، قاجەتتى ماتەريالدىق-تەحنيكالىق بازاعا يە جانە «Jas Otan» جاستار قاناتىنىڭ كەڭ اۋقىمدى ۆولونتەرلار جەلىسى بار.

«ءبىرىنشى وتىرىستى ءبىز «Nur Otan» پارتياسىنىڭ قابىرعاسىندا وتكىزىپ وتىرمىز، ويتكەنى ونىڭ مۇمكىندىكتەرىنە سۇيەنگىمىز كەلەدى. ەلباسىنىڭ قولداۋىمەن قورعا قاراجات ءتۇسىپ جاتىر، ال حالىقتىڭ اۋقىمدى بولىگىمەن ءتيىمدى جۇمىس جۇرگىزۋ ءۇشىن بىزگە ينفراقۇرىلىم، زور ۇيىمدىق تاجىريبە جانە ادامدار قاجەت. بۇل اتالعانداردىڭ باسىم بولىگى بۇگىندە تەك پارتيادا عانا بار» – دەپ اتاپ ءوتتى رۋسلان ساكەەۆ.

بۇگىندە جاڭادان قۇرىلعان قوعامدىق قورعا ەلدىڭ ءىرى بيزنەس وكىلدەرى 40 ملن دوللاردان استام قاراجاتتى توپتاستىردى. بۇل قاراجات قامقورشىلار كەڭەسىنىڭ شەشىمىمەن حالىقتىڭ الەۋمەتتىك وسال توپتارىنا اتاۋلى كومەك كورسەتۋگە باعىتتالاتىن بولادى. قازىر كومەك تۇرلەرى مەن ونى الۋشىلار ساناتتارىن انىقتاۋ بويىنشا ءجۇمىس باستالدى.

ءوز كەزەگىندە باۋىرجان بايبەك قامقورشىلار كەڭەسى اتىنان ەلباسى ۇندەۋىنە قولداۋ كورسەتكەن بيزنەسمەندەرگە العىس ايتىپ، قازاقستاندىقتاردىڭ بىرلەسە وتىرىپ، كەز كەلگەن داعدارىستى ەڭسەرەتىنىنە سەنىمىن ءبىلدىردى.

«ەلباسى، «Nur Otan» ليدەرى نۇرسۇلتان نازارباەۆتىڭ تاپسىرماسى بويىنشا ءبىز ءوزىمىزدىڭ بارلىق ۇيىمدىق جانە مەديارەسۋرستارىمىزدى قوردىڭ ءتيىمدى جۇمىس ىستەۋى ءۇشىن اقىسىز نەگىزدە ۇسىنامىز»، – دەدى باۋىرجان بايبەك.

مەملەكەت باسشىسى قاسىم-جومارت توقاەۆ جاريالاعان «ءبىز بىرگەمىز!» جالپى رەسپۋبليكالىق اكتسياسى اياسىندا «كەدەرگىسىز كەلەشەك»، «باقىتتى وتباسى» جانە «ارداگەرلەردى ارداقتايىق» پارتيالىق جوبالارى جەلىسى بويىنشا حالىقتىڭ ءارتۇرلى توپتارىنا الەۋمەتتىك كومەك كورسەتۋ قور قۇرىلعانعا دەيىن باستالىپ كەتكەنىن اتاپ وتكەن ءجون.

ەلباسىنىڭ تاپسىرماسى بويىنشا «Nur Otan» پارتياسى كارانتين جاريالانعان نۇر-سۇلتان جانە الماتى قالالارىنداعى جالعىز باستى قارتتارعا، مۇگەدەكتەرگە جانە تۇرمىسى تومەن كوپبالالى وتباسىلارعا اتاۋلى كومەك كورسەتۋ ءۇشىن 150 ملن تەڭگە ءبولدى. كوروناۆيرۋس ىندەتىنىڭ تارالۋىنا قارسى كۇرەسكە ەلباسىنىڭ شەشىمىمەن تۇڭعىش پرەزيدەنت قورى تاعى دا 200 ملن تەڭگە باعىتتادى.

بۇگىندە «Jas Otan» ۆولونتەرلارى مەن پارتيا بەلسەندىلەرى حالىقتىڭ الەۋمەتتىك وسال ساناتتارىن انتيسەپتيكا جانە گيگيەنا قۇرالدارىمەن، ءبىرىنشى كەزەكتە قاجەتتى تاۋارلارمەن بايلانىسسىز تاراتۋ جولىمەن قامتاماسىز ەتۋدە. تەك سوڭعى ءتورت كۇندە بۇكىل ەل كولەمىندە 7 مىڭعا جۋىق وتباسىعا 130 ميلليون تەڭگە سوماعا الەۋمەتتىك كومەك كورسەتىلدى.

سوڭعى جاڭالىقتار