23 ناۋرىز 2020, 21:04 7018 0 ىشكى ساياسات انار لەپەسوۆا

توتەنشە جاعداي: ساۋدا ورتالىقتارى مەن بازارلاردىڭ جۇمىس ىستەۋىنە رۇقسات بەرىلدى

ەلىمىزدە اۋماعى 2 مىڭ شارشى مەتردەن كەم ەمەس ءىرى ساۋدا ويىن-ساۋىق ورتالىقتارى ساعات 10:00-دەن 18:00-گە دەيىن جۇمىس ىستەۋگە رۇقسات بەرىلەدى.

الايدا سانيتارلىق، زالالسىزداندىرۋ شارالارىن كۇشەيتۋ كەرەك. بۇل وزگەرىستىڭ كارانتينگە جابىلعان استانا مەن الماتى قالالارىنا قاتىسى جوق.

ساۋدا جانە ينتەگراتسيا مينيسترلىگى مەن دەنساۋلىق ساقتاۋ مينيسترلىگى توتەنشە جاعداي كەزىندە ءدامحانا، دۇكەن مەن ساۋدا ورتالىقتارىنىڭ جۇمىسىنا قاتىستى بۇيرىققا وزگەرىس ەنگىزدى.

قۇجاتتا اۋماعى 2 مىڭ شارشى مەتردەن كەم ەمەس ءىرى ساۋدا نىساندارىنىڭ ساعات 10:00-دەن 18:00-گە دەيىن جۇمىس ىستەيتىنى جازىلعان. ولاردىڭ ىشىندەگى ازىق-تۇلىك دۇكەندەرى مەن ءدارىحانالار جۇمىسىن ادەتتەگى رەجيم بويىنشا جالعاستىرادى. اۋلالارداعى دۇكەندەر دە جۇمىسىن توقتاتپايدى. 

ازىق-تۇلىك ەمەس بازارلار ساعات 11:00-دەن 17:00-گە دەيىن جۇمىس ىستەيدى. سانيتارلىق شارالار كۇشەيتىلەدى. 

قوعامدىق تاماقتانۋ نىساندارى ءجۇمىس ىستەيدى، بىراق بىرقاتار شەكتەۋ ەنگىزىلگەن:

  • ساۋدا ورتالىعى اۋماعىنداعى ءدامحانالاردا تاماقتانۋعا بولمايدى، تەك دايىن تاعامدى ۇيگە جەتكىزۋ قاراستىرىلعان; 
  • ساۋدا ورتالىقتارىنىڭ اۋماعىندا ەمەس ءدامحانالار تەك 22:00-گە دەيىن جۇمىس ىستەيدى. كەلۋشىلەر سانى ءبىر ۋاقىتتا 50 ادامنان اسپاۋى ءتيىس. 

"ساۋدا ورتالىقتارى مەن بازارلاردى اشۋ شەشىمى قابىلداندى. بۇل ساۋدا جانە قىزمەت كورسەتۋ سالاسىنداعى كوپتەگەن ازاماتتاردى جۇمىسپەن قامتۋ جانە تابىسىن جوعالتپاۋمەن بايلانىستى. بىراق بارشا كاسىپكەرلەر باس سانيتار دارىگەردىڭ تالاپتارىن ساقتاۋى كەرەك ەكەنىن ەسكەرتەمىز", - دەپ جازىلعان حابارلامادا. 

وزگەرىس كارانتين جاريالانعان استانا مەن الماتى قالالارىنان باسقا اۋماقتا قولدانىلادى. الايدا اكىم مەن باس سانيتار دارىگەردىڭ شەشىمىمەن قوسىمشا شەكتەۋ ەنگىزىلۋى مۇمكىن.

 

سوڭعى جاڭالىقتار