23 ناۋرىز, 19:38 385 0 دەنساۋلىق انار لەپەسوۆا

الماتىدا كوروناۆيرۋس جۇقتىرعان ناۋقاستاردىڭ جاعدايى بەلگىلى بولدى

الماتىدا كوروناۆيرۋس جۇقتىرعان ناۋقاستاردىڭ جاعدايى بىرقالىپتى. بۇل تۋرالى قالالىق قوعامدىق دەنساۋلىقتى ساقتاۋ باسقارماسىنىڭ ءباسپاسوز قىزمەتى حابارلادى. 

باسقارمانىڭ حابارلاۋىنشا، سوڭعى تىركەلگەن 26-شى پاتسيەنت — 45 جاستاعى ايەل. 23 ناۋرىزدا تۇنگى 01.00-دە مىسىردان الماتىعا ۇشىپ كەلگەن. «رەيستەن تۇسىسىمەن جولاۋشى بىردەن وقشاۋلاندى. دارىگەرلەر العان تالداۋدان ول ايەل COVID-19 جۇقتىرعانى راستالدى»، - دەدى باسقارمانىڭ ءباسپاسوز قىزمەتىنەن.

ال باسقارما مۇنىڭ الدىندا ايقىندالعان 2 پاتسيەنت كارانتين كەزىندە كوروناۆيرۋس جۇقتىردى دەگەن اقپاراتتى جوققا شىعاردى.

«ولاردىڭ ءبىرى مۇنىڭ الدىندا ماسكەۋ-الماتى باعىتىندا ۇشىپ كەلگەن ناۋقاسپەن تىعىز بايلانىستا بولعان. وسىعان بايلانىستى ول 14 كۇنگە وقشاۋلانعان بولاتىن. كەشە تالداۋ ناتيجەسى راستالدى. ەكىنشى ادام مينسك-الماتى رەيسىندە كەلگەن ناۋقاسپەن سەرىكتەس بولعان. بۇل لاينەردىڭ جولاۋشىلارى دا سول كۇنى وقشاۋلانعان بولاتىن. ناۋقاستاردىڭ بارلىعى كارانتيننەن بۇرىن اۋىرىپ كەلگەن ناۋقاستارمەن بايلانىستا بولعاندىقتان جۇقتىرعان»، - دەدى باسقارمادان.

جالپى، قالالىق اۋرۋحانالاردا قازىر 26 پاتسيەنت جاتىر. ولاردىڭ جاعدايى بىرقالىپتى. تەك ەكەۋىنىڭ جاعدايىن عانا دارىگەرلەر ورتاشا دەپ باعالاپ وتىر.

ال قالانىڭ پروۆيزورلىق ەمحانالارىندا 660 ادام جاتىر. ولاردىڭ بارلىعى 1 ا ساناتىنداعى ەلدەن كەلگەن جولاۋشىلارمەن بايلانىستا بولعان. ولار پروۆيزورلىق ەمحانادا ءبىر-بىرىنەن وقشاۋلانعان. ولارعا ارقايسىسىنا جەكە قىزمەت كورسەتىلەدى. ورتاق اسحانانى پايدالانا المايدى. سونىمەن قاتار 778 ادام كارانتينگە وقشاۋلانعان. ءۇي كارانتينىندە 1472 ادام جاتىر. كارانتيندە جاتقان ادامداردىڭ بارلىعىندا دەنە قىزۋى جوق. كاتارالدى بەلگىلەر بايقالمايدى.

 

سوڭعى جاڭالىقتار