23 ناۋرىز 2020, 18:49 893 0 ەكونوميكا انار لەپەسوۆا

قازاقستاندىقتاردىڭ يپوتەكا تولەمدەرى 3 ايعا شەگەرىلەدى

«بايتەرەك» ۇبح» اق تۇرعىن ءۇي بلوگىنىڭ ەنشىلەس ۇيىمدارى يپوتەكا تولەمدەرىن 3 ايعا شەگەرەدى. بۇل تۋرالى اكتسيونەرلىك قوعامنىڭ ءباسپاسوز قىزمەتى حابارلادى. 

«23 ناۋرىزدا توتەنشە جاعداي جونىندەگى مەملەكەتتىك كوميسسيانىڭ وتىرىسىندا ايتىلعان مەملەكەت باسشىسىنىڭ تاپسىرمالارىنا سايكەس، ۋاقىتشا قارجىلىق قيىندىقتارعا تاپ بولعان جەكە جانە زاڭدى تۇلعالار ءۇشىن حولدينگتىڭ تۇرعىن ءۇي بلوگىنىڭ ەنشىلەس ۇيىمدارى ((تۇرعىن ءۇي قۇرىلىس جيناق بانكى، قازاقستان يپوتەكالىق كومپانياسى، بايتەرەك دەۆەلوپمەنت) بارلىق تولەمدەر بويىنشا، نەگىزگى قارىز بەن سىياقى سوماسىن قوسا العاندا، تۇرعىن ءۇي جانە تۇرعىن ەمەس جىلجىمايتىن مۇلىك وبەكتىلەرىن ساتىپ الۋ قۇقىعىمەن جالداۋ/ساتىپ الۋ-ساتۋ (ونىڭ ىشىندە ءبولىپ تولەۋ) بارلىق مامىلەلەرى بويىنشا، ايىپپۇلدار مەن وسىماقى ەسەپتەمەي، الداعى 3 ايعا ء(ساۋىر-ماۋسىم) تولەمدەردى كەيىنگە قالدىرۋ تۋرالى شەشىم قابىلدادى» دەلىنگەن «بايتەرەك» ۇلتتىق باسقارۋشى حولدينگى» اق ءباسپاسوز قىزمەتى تاراتقان حابارلامادا.

تولەمدەردى كەيىنگە قالدىرۋ ءۇشىن مەملەكەتتىك وپەراتورلارعا قاشىقتىقتان بايلانىس ارنالارى (جەكە كابينەت، telegram-بوتتار، رەسمي سايتتار) ارقىلى ءوتىنىش بەرۋى كەرەك. ءوتىنىش جەكە تارتىپپەن قارالاتىن بولادى.

 

سوڭعى جاڭالىقتار