23 ناۋرىز, 16:00 834 0 نارىق انار لەپەسوۆا

داعدارىسقا قارسى شارالارعا 10 ملرد دوللار بولىنەدى – مەملەكەت باسشىسى

سۋرەت ينتەرنەتتەن الىندى
سۋرەت ينتەرنەتتەن الىندى

مەملەكەت باسشىسى قاسىم-جومارت توقاەۆ توتەنشە جاعداي جونىندەگى مەملەكەتتىك كوميسسيانىڭ وتىرىسىندا داعدارىسقا قارسى شارالاردى جۇزەگە اسىرۋ ءۇشىن قانشا قارجى بولىنەتىنىن ايتتى. 

"سالىق پرەفەرەنتسيالارى مەن جەرگىلىكتى دەڭگەيدەگى قولداۋدى قوسپاعاندا، داعدارىسقا قارسى شارالار جيىنتىعى 4,4 تريلليون تەڭگەنى نەمەسە 10 ميلليارد دوللاردى قۇرايدى. وسى قاراجاتتى دۇرىس يگەرگەن سوڭ، ءبىز داعدارىسقا قارسى كۇرەستە جەڭىسكە جەتەتىنىمىز ءسوزسىز", – دەدى توقاەۆ.

ونىڭ ايتۋىنشا، داعدارىس مەملەكەتتىك اپپارات پەن وتاندىق بيزنەستىڭ قوزعاۋشى كۇشى بولادى.

"وسىدان الاتىن ساباقتاردى ەسكەرۋىمىز كەرەك. سونىمەن قاتار، جەدەل شارالاردان باسقا، جاعداي تۇراقتانعاننان كەيىن دە جۇيەلى ءىس-شالار قابىلداۋ كەرەك. شىن مانىندە، ءبىز مۇلدەم جاڭا جاھاندىق الەمنىڭ تابالدىرىعىندا تۇرمىز. وندا قازاقستان ءوزىنىڭ لايىقتى ورنىن تابۋى ءتيىس", – دەپ اتاپ ءوتتى ق.توقاەۆ.

پرەزيدەنت جاعدايدىڭ كۇردەلىلىگىنە قاراماستان، ەلىمىزدىڭ اپاتتى جاعدايدان الىس ەكەنىن باسا ايتتى.

"بىزدە بارلىق مۇمكىندىكتەر مەن رەزەرۆتەر بار. باستىسى، ءبىز قولايسىز ستسەناريگە دايىندىقتى ۋاقىتىندا قولعا الىپ، نە ىستەۋ كەرەكتىگىن دۇرىس تۇسىندىك", – دەدى توقاەۆ.

پرەزيدەنت سونداي-اق ەلدەگى توتەنشە جاعداي كەزىندە وقشاۋلاۋ شارالارىن قاتاڭداتۋدى تاپسىرعان ەدى.

پرەزيدەنتتىڭ توتەنشە جاعداي جونىندەگى مەملەكەتتىك كوميسسيانىڭ وتىرىسىندا سويلەگەن ءسوزىنىڭ تولىق ءماتىنىن مىنا سىلتەمە ارقىلى وقي الاسىز.

 

سوڭعى جاڭالىقتار