22 ناۋرىز, 19:47 4269 0 زاڭ انار لەپەسوۆا

ەلوردادا بلوكبەكەتتى بۇزىپ وتپەك بولعان ازامات 7 جىلعا جۇرگىزۋشى كۋالىگىنەن ايرىلدى

وقيعا ەلوردا ماڭىنداعى قوسشى اۋىلىنا باراتىن جولداعى بلوكبەكەتتە بولعان، دەپ حابارلايدى Polisia.kz.

22 ناۋرىز كۇنى تاڭعى ساعات 03.35-تە «BMW» اۆتوكولىگىن تىزگىندەگەن 30 جاستاعى جۇرگىزۋشى الكوگولدى ىشىمدىككە ماس كۇيىندە بلوكبەكەتتى بۇزىپ وتكىسى كەلدى. ەر ادام توتەنشە جاعداي جاريالانعان اۋماقتا قوعامدىق ءتارتىپتى ساقتاۋ بويىنشا قىزمەتتىك مىندەتتەرىن ارتقارىپ جۇرگەن ىشكى ىستەر ورگانى قىزمەتكەرلەرىنىڭ تالابىنا باعىنباعان.

وعان قاتىستى قر اكىمشىلىك قۇقىقبۇزۋشىلىقتار كودەكسىنىڭ 478-بابى (توتەنشە جاعداي كەزىندە قوعامدىق ءتارتىپتى بۇزۋ ارەكەتتەرى، ىشكى ىستەر ورگاندارى قىزمەتكەرلەرىنىڭ زاڭدى تالابىنا باعىنباۋ) جانە 608-بابى (الكوگول، ەسىرتكى نەمەسە وزگە دە جۇيكەگە اسەر ەتەتىن زاتتاردىڭ قابىلداپ ماس كۇيىندە كولىك قۇرالىن باسقارۋ) بويىنشا اكىمشىلىك حاتتاما تولتىرىلدى.

نۇر-سۇلتان قالاسى ارنايى مامانداندىرىلعان اۋدانارالىق اكىمشىلىك سوتىنىڭ قاۋلىسىمەن قۇقىقبۇزۋشى 15 تاۋلىككە قاماۋعا الىندى جانە كولىك جۇرگىزۋ كۋالىگىنەن 7 جىلعا ايىرىلدى. ودان بولەك، 40 ايلىق ەسەپتىك كورسەتكىش كولەمىندە ايىپپۇل سالىندى.

ەسكە سالا كەتسەك، 22 ناۋرىز كۇنى ساعات 00.00-دە نۇر-سۇلتان مەن الماتى قالالارىنا كىرىپ-شىعۋ ۋاقىتشا توقتاتىلدى.

 

تەگتەر بلوكبەكەت

سوڭعى جاڭالىقتار