22 ناۋرىز, 12:45 1396 0 قاۋىپسىزدىك انار لەپەسوۆا

ەلوردادا كوروناۆيرۋس جۇقتىرعان ءبىر ناۋقاستىڭ جاعدايى اۋىر

نۇر-سۇلتاندا كوروناۆيرۋس ينفەكتسياسىمەن تىركەلگەن سوڭعى ءۇش ناۋقاستىڭ جاعدايى بەلگىلى بولدى.

قالالىق قوعامدىق دەنساۋلىق ساقتاۋ باسقارماسىنىڭ باسشىسى ساۋلە قيسىقوۆانىڭ ايتۋىنشا، ءبىر ناۋقاس 21 ناۋرىز كۇنى كەشكە انىقتالدى. ول كوروناۆيرۋس جۇقتىرعان اداممەن جاقىن بايلانىستا بولعان ادام رەتىندە تەكسەرۋگە الىنعان ەدى.

«22 ناۋرىز كۇنى تاعى ەكى جاعداي تىركەلدى. ونىڭ بىرەۋى - وكپە قابىنۋى كۇدىگىمەن ستاتسيونارداعى بوكستا جاتقان. دياگنوستيكالاۋ كەزىندە كوروناۆيرۋس ينفەكتسياسى انىقتالدى. قازىرگى ۋاقىتتا ونىڭ دەنە قىزۋى جوق، بىراق جاعدايى اۋىر. ەكى جاقتى پنەۆمونيا، 1-دەڭگەيدەگى تىنىس جەتىپەۋشىلىگى بار. پانارالىق توپ كونسيليۋمى تاعايىندادى»، - دەدى باسقارما باسشىسى «حابار 24» تەلەارناسىندا وتكەن بريفينگتە.

«قالعان 30 ناۋقاستىڭ جاعدايى قاناعاتتانارلىق، دەنە قىزۋى شەكتى مەجەدە. كوروناۆيرۋستىق ينفەكتسيا بويىنشا حاتتاماعا سايكەس ەم-دوم الىپ جاتىر»، - دەدى س. قيسىقوۆا.

ايتا كەتەيىك، قازاقستان رەسپۋبليكاسى اۋماعىندا كوروناۆيرۋس ينفەكتسياسىن جۇقتىرعان جالپى 56 ناۋقاس تىركەلدى.

ەلوردادا 31 ادامدا كوروناۆيرۋس ينفەكتسياسى انىقتالدى. الماتى قالاسىندا - 22 ادام، قاراعاندى قالاسىندا - 2, الماتى وبلىسىندا 1 ادام. 

 

 

سوڭعى جاڭالىقتار