22 ناۋرىز, 12:26 1603 0 ايماق انار لەپەسوۆا

الماتىدا كوممۋنالدىق قىزمەتتەر اقىسىن تولەۋ مەرزىمى ۇزارتىلدى

الماتى تۇرعىندارىنا ناۋرىز بەن ءساۋىر ايلارىنداعى كوممۋنالدىق قىزمەتتەردىڭ اقىسىن جىل سوڭىنا دەيىن تولەي الادى. بۇل تۋرالى شاھار باسشىسى باقىتجان ساعىنتاەۆ Instagram-داعى پاراقشاسىندا مالىمدەدى. 

"ساۋدا ورتالىقتارىنىڭ، كيىم-كەشەك بازارلارىنىڭ، مەكتەپتەر مەن بالاباقشالاردىڭ، كافەلەردىڭ، ءتۇرلى سالونداردىڭ جانە باسقا دا قىزمەت كورسەتۋ سالاسىنداعى كاسىپورىنداردىڭ جۇمىسىن ۋاقىتشا توقتاتۋعا تۋرا كەلدى. ءبىراز جۇرت اقىسىز ەڭبەك دەمالىسىنا كەتۋگە، ەندى ءبىرى قىسقارتۋعا ىلىكتى. بۇل جاعداي از قامتىلعان جانە جۇمىسسىز جۇرگەن جاندارعا اۋىر ءتيدى", - دەپ جازدى قالا اكىمى باقىتجان ساعىنتاەۆ الەۋمەتتىك جەلىدەگى رەسمي پاراقشاسىندا.

ايتۋىنشا، اكىمدىك قيىن جاعدايعا تاپ بولعان الماتىلىقتاردى قولداۋ ءۇشىن مونوپوليستەرمەن، ليفت پەن قوقىستى شىعارۋدى قوسا العاندا، بارلىق كوممۋنالدىق قىزمەت بويىنشا تولەمدەردى كەيىنگە قالدىرۋ تۋرالى كەلىسىمگە كەلگەن.

"ناۋرىز جانە ءساۋىر ايلارىنا كەلگەن تۇبىرتەكتەردى جىل سوڭىنا دەيىن تولەۋگە بولادى. بۇل رەتتە كەشىكتىرگەنى ءۇشىن وسىماقى مەن ايىپپۇل ەسەپتەلمەيدى", -دەدى قالا باسشىسى.

سونداي-اق، كارانتين كەزىندە بەرەشەگى بار تۇتىنۋشىلار ەلەكتر، سۋ، جىلۋ، گاز جانە تەلەفون بايلانىسىنان اجىراتىلمايدى.

 

سوڭعى جاڭالىقتار