25 قىركۇيەك, 14:04 477 0 جاڭالىقتار اسىل تۇمار

شىعىس قازاقستان وبلىسىندا قار جاۋدى

بۇگىن تۇندە شىعىس قازاقستان وبلىسىنداعى كاتونقاراعاي، كۇرشىم اۋداندارى مەن ريددەر قالاسىنىڭ ماڭىنا قار جاۋدى. كۋاگەرلەر الەۋمەتتىك جەلىلەردە قار باسقان جولداردىڭ ۆيدەولارى مەن فوتوسۋرەتتەرىن جاريالاۋدا.

tvoi_vko.kz ينستاگرام پاراقشاسىنا سالىنعان ۆيدەو اۆتورىنىڭ ايتۋىنشا، مارقاكول قورىعىنىڭ اۋماعىنداعى ۇرانحاي اۋىلىندا تاڭەرتەڭ قار 12 سانتيمەترگە جەتكەن. سونداي-اق ريددەر قالاسىنىڭ ماڭىنداعى تاۋعا، جول مەن شىرشالارعا قار تۇسكەن.

«قازگيدرومەت» رمك بۇل اقپاراتتى راستاپ، شىعىس قازاقستاننىڭ تاۋلى ايماقتارى ءۇشىن بۇل ادەتتەگى قۇبىلىس ەكەنىن جەتكىزدى.

«ءبىزدىڭ مەتەورولوگيالىق ستانتسيالار تەك مارقاكول قورىعىنىڭ اۋماعىندا قار جاۋعانىن كورسەتتى. بىراق كاتونقاراعاي، كۇرشىم اۋداندارى جانە ريددەر قالاسى ماڭىنداعى تاۋلى جەرلەردە قار تۇسكەن. قار مولشەرىن ناقتى اتاي المايمىن، ويتكەنى تاۋدا مەتەورولوگيالىق ستانتسيا جوق»، – دەدى «قازگيدرومەت «رمك سينوپتيگى دينارا جىلىباەۆا.

ساراپشىنىڭ ايتۋىنشا، تاياۋ كۇندەرى شىعىس قازاقستان وبلىسىندا اۋا رايى سۋىتادى. بولجامعا سايكەس، وڭىردە تەمپەراتۋرانىڭ تومەندەۋى جانە جەلدىڭ كۇشەيۋى كۇتىلۋدە.

 

سوڭعى جاڭالىقتار