25 قىركۇيەك, 12:33 544 0 جاڭالىقتار اسىل تۇمار

«Tengri Bank» سالىمشىلارى اقشاسىن قاي بانكتەن الادى؟

قازاقستاننىڭ دەپوزيتتەرگە كەپىلدىك بەرۋ قورى اگەنت بانك رەتىندە «ەۋرازيالىق بانك» اق تاڭدادى. قوردىڭ قاراجاتى ەسەبىنەن كەپىلدىك بەرىلگەن وتەمدى «Tengri Bank» اق سالىمشىلارىنا وسى بانك تولەيتىن بولادى.

«Tengri Bank» اق دەپوزيتتەرىندە، اعىمداعى شوتتارىندا جانە كارتوچكالارىندا قاراجاتى بار جەكە تۇلعالار مەن كاسىپكەرلەر وتەم الۋعا ءوتىنىش بەرە الادى. كەپىلدىك بەرىلگەن وتەم تولەۋگە وتىنىشتەر قابىلداۋ 2020 جىلدىڭ 30 قىركۇيەگىنەن باستالادى.

«ەۋرازيالىق بانك» اق بولىمشەلەرى ەلدەگى ەپيدەميولوگيالىق جاعدايدى ەسكەرە وتىرىپ، كەزەك كۇتۋدى ازايتۋ ماقساتىندا «Tengri Bank» اق سالىمشىلارىنا تاياۋداعى دەمالىس كۇندەرى – 3 -4 قازاندا قوسىمشا قىزمەت كورسەتەتىن بولادى.

قدكبق سالىمشىلارعا اگەنت بانكتىڭ بولىمشەلەرىنە بارماي تۇرىپ، ونىڭ سايتى ارقىلى بولىمشەلەردىڭ جۇمىس كەستەسىن قاراۋى كەرەك. اگەنت بانك سونداي-اق وتىنىشتەردى قاشىقتان بەرۋ جانە وتەم سومالارىن ونلاين تەكسەرۋ بويىنشا وپتسيالاردى قاراستىراتىن بولادى. بۇل تۋرالى تولىق اقپاراتتى «ەۋرازيالىق بانك» اق سايتىنان الۋعا مۇمكىندىك بار.

اگەنت بانك ارقىلى كەپىلدىك بەرىلگەن وتەم تولەۋ شاراسى 12 اي بويى – 2021 جىلدىڭ 30 قىركۇيەگىنە دەيىن جۇزەگە اسىرىلادى. قور بەلگىلەنگەن مەرزىمنىڭ اياقتالۋىنا قاراي اگەنت بانكپەن اراداعى كەلىسىمنىڭ قولدانىلۋ مەرزىمىن ۇزارتۋى مۇمكىن.

اگەنت بانك ارقىلى بەلگىلەنگەن وتەم تولەۋ مەرزىمى اياقتالعان سوڭ، «Tengri Bank» اق سالىمشىلارى تولەم الۋ جونىندە تىكەلەي قدكبق-عا ءوتىنىش بەرە الادى. ايتا كەتسەك، قدكبق كەپىلدىك بەرىلگەن وتەمدى دەپوزيتتەگى قالدىق سوما شەگىندە، بانك ليتسەنزياسىنان ايىرىلعان كۇنگە قاراي ەسەپتەلگەن سىياقىنى ەسكەرە وتىرىپ تولەيدى:

– ۇلتتىق ۆاليۋتاداعى جيناق دەپوزيتتەر بويىنشا – 15 ملن تەڭگەدەن;

– ۇلتتىق ۆاليۋتاداعى باسقا دەپوزيتتەر بويىنشا – 10 ملن تەڭگەدەن;

– جانە شەتەل ۆاليۋتاسىنداعى دەپوزيتتەر بويىنشا – ۆاليۋتا بالاماسىندا 5 ملن تەڭگەدەن اسپايدى («Tengri Bank»اق ليتسەنزياسىنان ايىرىلعان كۇنى بەلگىلەنگەن ۆاليۋتا ايىرباستاۋ باعامى بويىنشا).

«Tengri Bank» اق سالىمشىسىنىڭ بانكتە ءتۇرى مەن ۆاليۋتاسى بويىنشا ەكى جانە ودان دا كوپ كەپىلدەندىرىلگەن دەپوزيتتەرى بار بولسا، اگەنت بانك ولار بويىنشا 15 ملن تەڭگەدەن اسپايتىن كولەمدە كەپىلدىك بەرىلگەن جيىنتىق وتەم تولەيدى. بۇل رەتتە شەتەل ۆاليۋتاسىنداعى دەپوزيتتىڭ 5 ملن تەڭگەدەن اسپايتىن كەپىلدەندىرىلگەن قالدىعى بويىنشا شەكتەۋ ەسكەرىلەدى.

كەپىلدىك بەرىلگەن وتەمدى الۋ ءۇشىن «Tengri Bank» اق سالىمشىلارى ەۋرازيالىق بانكتىڭ كەز كەلگەن فيليالى نەمەسە بولىمشەسىنە بارىپ، تولەم الۋعا ءوتىنىش تولتىرۋلارى قاجەت.

 

 

سوڭعى جاڭالىقتار