24 قىركۇيەك, 19:57 773 0 جاھان انار لەپەسوۆا

پۋتين نوبەل سىيلىعىنا ۇسىنىلدى

رەسەي پرەزيدەنتى ۆلاديمير پۋتين 2021 جىلعى بەيبىتشىلىك سالاسىنداعى نوبەل سىيلىعىنا ۇسىنىلدى.  وسلودا ورنالاسقان نوبەل كوميتەتىنىڭ كەڭسەسىنە ءوتىنىمدى جازۋشى سەرگەي كومكوۆ جولداعان.

"بۇل مەنىڭ نوبەل سىيلىعىنا ءتورتىنشى ۇسىنىسىم. حات بيىلعى جىلدىڭ 9 قىركۇيەگىندە جىبەرىلدى. ال 10 قىركۇيەكتە بۇل ءوتىنىم وسلوداعى نوبەل كوميتەتىنىڭ شتاب-پاتەرىنە تۇسكەن", - دەدى كومكوۆ وسى وقيعاعا وراي وتكىزىلگەن ءباسپاسوز ءماسليحاتىندا.

جازۋشىنىڭ سوزىنشە، ماراپاتتاۋعا ءوتىنىم جولداۋ قىركۇيەكتە باستالىپ، قازاندا اياقتالادى. ناۋرىز ايىنا دەيىن كوميتەت ولاردى قاراپ، ناۋرىز-ءساۋىر ايلارىندا ءوتىنىم جىبەرگەندەرگە حاتتارى قابىلدانىپ، قارالىپ، تىركەلگەنى تۋرالى حابارلاما جىبەرەدى. حاتتىڭ دىتتەگەن جەرگە جەتۋىن مۇقيات قاداعالاعان كومكوۆ رەسەيدەن جولدانعان حات امەريكالىقتاردىڭ تىنىشىن كەتىرگەنىن ايتتى.

«جەرگىلىكتى ۋاقىت بويىنشا 15:07-دە حات وسلوعا جەتكىزىلىپ، نوبەل كوميتەتىنىڭ حاتشىلارىنىڭ ءبىرى قول قويدى. وسى وتىنىمنەن كەيىن اقش تاراپىنىڭ تىنىشى كەتتى. كەشكە تامان، جەرگىلىكتى ۋاقىت بويىنشا ساعات 16-دان كەيىن وسلوداعى اقش وكىلى اسىعىس ءوتىنىم تولتىرىپ، ترامپتى بەيبىتشىلىك سالاسىنداعى نوبەل سىيلىعىنا ۇسىندى. اقش پرەزيدەنتى ءباا مەن يزرايل اراسىنداعى كيكىلجىڭدى رەتتەگەن كورىنەدى»، - دەدى جازۋشى.

ايتا كەتەيىك، بەيبىتشىلىك سالاسىنداعى نوبەل سىيلىعى – بۇل 19 عاسىردىڭ اياعىندا شۆەد ونەركاسىپشىسى جانە ونەرتاپقىشى الفرەد نوبەل مۇرا ەتىپ قالدىرعان بەس سىيلىقتىڭ ءبىرى. ول ادامعا نەمەسە ۇيىمعا بەيبىتشىلىككە قوسقان ەرەكشە ۇلەسى ءۇشىن بەرىلەدى.

ەسكە سالا كەتسەك، كوروناۆيرۋس پاندەمياسىنا بايلانىستى بيىل نوبەل سىيلىعىن تابىستاۋ سالتاناتى ونلاين-فورماتتا وتەدى.

سوڭعى جاڭالىقتار