24 قىركۇيەك, 18:19 391 0 جاڭالىقتار انار لەپەسوۆا

تارازدا «قازاق حالقىنا مىڭ العىس» مونۋمەنتى اشىلدى

تاراز قالاسىندا ەلىمىزدەگى وزگە ۇلت وكىلدەرىنىڭ قازاق حالقىنا دەگەن العىسىنىڭ سيمۆوليكالىق بەلگىسى رەتىندە «قازاق حالقىنا مىڭ العىس» مونۋمەنتى بوي كوتەردى.

جاڭا مونۋمەنت «اربات-1» جاياۋ جۇرگىنشىلەر اللەياسىندا ورىن تەپكەن. ونىڭ قۇرىلىسىن «تەمىر-بايلىق» جاۋاپكەرشىلىگى شەكتەۋلى سەرىكتەستىگى جۇرگىزگەن. بيىكتىگى 30 مەتر نىساننىڭ قۇرىلىسىنا 158 ميلليون تەڭگە قارجى جۇمسالعان.

نىسانمەن تانىسقان جامبىل وبلىسىنىڭ اكىمى بەردىبەك ساپارباەۆ مونۋمەنت ەلباسى نۇرسۇلتان نازارباەۆتىڭ تاپسىرماسى اياسىندا بوي كوتەرگەنىن اتاپ ءوتتى.

«قازاقستان حالقى اسسامبلەياسى ەلدەگى ۇلتارالىق قاتىناستاردى نىعايتۋ جولىندا اۋقىمدى جۇمىستار اتقارۋدا. ءبىز سوعىس، اشارشىلىق، رەپرەسسيا سەكىلدى كوپتەگەن قيىندىقتاردى بىرگە ەڭسەرگەنبىز، ونى بۇگىنگى ۇرپاق جەتە ءبىلىپ، ءتۇسىنۋى ءارى ەستە ساقتاعانى اسا ماڭىزدى. قازاقتار باۋىرلاس حالىقتارعا قيىن-قىستاۋ كەزەڭدەردە قول ۇشىن سوزىپ، باۋىرىنا باسا ءبىلدى. بۇل ەسكەرتكىش ولاردىڭ قازاق حالقىنا شىن جۇرەكتەن العىس ءبىلدىرۋىنىڭ بەلگىسى. ەڭ باستىسى – ەلىمىزدە تۇراتىن بارلىق ەتنوستاردىڭ دوستىعى، بەيبىتشىلىگى مەن ىنتىماعى. ەلىمىزدىڭ تۇڭعىش پرەزيدەنتى – ەلباسى نۇرسۇلتان نازارباەۆ بارلىق قازاقستاندىقتار تەڭ جاعدايدا ءومىر ءسۇرۋى كەرەك دەپ ۇنەمى ايتىپ كەلەدى. سوندىقتان ءار ەتنوستىڭ ءوز ءتىلىن، ءداستۇرىن، ادەت-عۇرپىن جانە مادەنيەتىن ساقتاپ قالۋى ءۇشىن كوپ كۇش جۇمسالدى. ءبىزدىڭ تاۋەلسىزدىك جىلدارىنداعى ەڭ ماڭىزدى جەتىستىگىمىز – ساقتالىپ، نىعايىپ كەلە جاتقان ۇلتارالىق دوستىعىمىز»، - دەدى وبلىس اكىمى.

ال «دنەپرو» ۋكراين ەتنومادەني بىرلەستىگىنىڭ توراعاسى فەدور كليمەنكو بارشا ەتنوستاردىڭ اتىنان قازاق حالقىنا العىسىن ءبىلدىردى. سونىمەن قاتار م.ح.دۋلاتي اتىنداعى تاراز وڭىرلىك ۋنيۆەرسيتەتىنىڭ «قازاقستان حالقى اسسامبلەياسى» كافەدراسىنىڭ مەڭگەرۋشىسى پاريدا يمانجانقىزى ءسوز سويلەپ، مونۋمەنتتىڭ تاعىلىمى تەڭدەسىز ەكەنىن جەتكىزدى.

 

سوڭعى جاڭالىقتار