24 قىركۇيەك, 12:07 416 0 نۇر وتان انار لەپەسوۆا

«Nur Otan» ەلىمىزدىڭ وڭتۇستىگىن وڭ وزگەرىستەرگە باستايتىن باعدارلاما ازىرلەدى

«Nur Otan» حالىقپەن تالقىلاۋ ءۇشىن ەلىمىزدىڭ وڭتۇستىك وڭىرلەرى بويىنشا سايلاۋالدى باعدارلامالارىنىڭ جوبالارىن جاريالادى. ولارمەن primaries.kz سايت ارقىلى تانىسۋعا جانە ءوز ۇسىنىستارىڭىزدى ەنگىزۋگە بولادى، دەپ حابارلايدى پارتيانىڭ ءباسپاسوز قىزمەتى.

ەلباسىنىڭ تاپسىرماسى بويىنشا «Nur Otan» پارتياسى ءار ءوڭىر، قالا مەن اۋدانعا ارناپ 216 سايلاۋالدى باعدارلامانىڭ جوباسىن ازىرلەدى. پرەزيدەنت جاريالاعان «حالىق ۇنىنە قۇلاق اساتىن مەملەكەت» تۇجىرىمداماسى اياسىندا ولاردى جالپىرەسپۋبليكالىق پارتياىشىلىك پرايمەريز قورىتىندىسى بويىنشا ۇزدىك يدەيالار مەن ۇسىنىستاردى جيناپ، كراۋدسورسينگ قاعيداتىمەن پىسىقتاماق.

سونىمەن، جامبىل وبلىسىندا وڭدەۋ ونەركاسىبى مەن اگروونەركاسىپتىك كەشەندى دامىتۋعا، جاڭا وندىرىستەر مەن جاڭا جۇمىس ورىندارىن اشۋعا باسا نازار اۋدارىلادى.

5 جىل ىشىندە اۋىل شارۋاشىلىعى جالپى ءونىمىنىڭ كولەمىن بىردەن 33,9%-عا ارتتىرۋ جوسپارلانۋدا. بۇل رەتتە «Nur Otan» پارتياسى 7 جاڭا سۋ قويماسىن سالۋ، سۋارۋ ارنالارى مەن درەناج جۇيەلەرىن قايتا جوندەۋ ەسەبىنەن 34,5 مىڭ گا سۋارمالى جەردى قالپىنا كەلتىرۋگە قول جەتكىزبەك.

اۆتوموبيل جولدارى مەن جولاۋشىلار تاسىمالىنىڭ ساپاسىن ارتتىرۋ ءۇشىن 2025 جىلعا دەيىن وبلىستىڭ بارلىق اۋداندارىندا 1200 كم جول توسەۋ جانە جوندەۋ، سونداي-اق، اۆتوبۋس پاركىن 52-دەن 90%-عا دەيىن جاڭارتۋ كوزدەلىپ وتىر.

حالىق سانى 200 ادامنان اساتىن اۋىلدار ورتالىقتاندىرىلعان سۋ جۇيەسىمەن جابدىقتالماق. 2023 جىلعا قاراي 119 اۋىلدى نەمەسە 125 مىڭ تۇرعىندى ساپالى اۋىز سۋمەن قامتاماسىز ەتۋ جوسپارلانۋدا. 2025 جىلعا دەيىن 107 ەلدى مەكەندەگى 128 مىڭ تۇرعىن ورتالىقتاندىرىلعان گازبەن قامتىلادى. بەس جىل ىشىندە وبلىستىڭ قالالارى مەن اۋداندارىندا 156 تۇرعىن ءۇي سالۋ جوسپارلانۋدا.

ەكولوگيالىق جانە سانيتارلىق تالاپتارعا سايكەس، 158 قوقىس ۇيىندىلەرى مەن پوليگوندار رەتكە كەلتىرىلەدى. 2022 جىلدىڭ سوڭىنا دەيىن تۇرمىستىق قاتتى قالدىقتاردى قايتا وڭدەۋ/جاعۋ زاۋىتى سالىنادى. تاراز، جاڭاتاس، قاراتاۋ جانە شۋ قالالارىندا تازارتۋ قۇرىلىستارى كەشەنىن سالۋ جوسپارلانۋدا.

مەديتسينالىق قىزمەت كورسەتۋ ساپاسىن ارتتىرۋ ماقساتىندا پارتيا 685 بىرلىك مەديتسينالىق جابدىق ساتىپ الۋدى جانە جاڭا تۋعان نارەستەلەردى رەانيماتسيالاۋ بولىمشەسى ءۇشىن 4 جاڭا دەنساۋلىق ساقتاۋ نىسانىن سالۋدى ۇسىنادى. سونداي-اق، مۇگەدەك بالالارعا ارنالعان 4 وڭالتۋ جانە بەيىمدەۋ ورتالىعىن جانە زورلىق-زومبىلىققا ۇشىراعان ادامدارعا ارنالعان 2 داعدارىس ورتالىعىن اشۋ كوزدەلۋدە.

تۇركىستان وبلىسى بويىنشا سايلاۋالدى باعدارلاما جوباسىنىڭ باسىم باعىتتارىنىڭ ءبىرى – ايماقىشىلىك جولداردىڭ ساپاسىن ارتتىرۋ. ول ءۇشىن «Nur Otan» جولداردىڭ 3600 شاقىرىمىن الداعى بەس جىل ىشىندە جوندەۋدى قولعا الماق.

حالىقتى ساپالى اۋىز سۋمەن قامتاماسىز ەتۋ ءۇشىن پارتيا اۋىلدىق وكرۋگتەردە 49 سۋمەن جابدىقتاۋ نىسانىنىڭ قۇرىلىسىنا، سونداي-اق 12 ەلدى مەكەندە سۋمەن جابدىقتاۋ جەلىلەرىن قايتا جاڭارتۋعا ىقپال ەتەتىن بولادى.

240 ءۇي پايدالانۋعا بەرىلىپ، 429 تۇرعىن ءۇي مەن نىسانعا كۇردەلى جوندەۋ جۇرگىزىلەدى.

مادەني جانە رۋحاني قۇندىلىقتاردى ساقتاۋ ماقساتىندا وڭىردەگى كيەلى ورىندار – اق مەشىت ۇڭگىرلەرى، تەرەكتى اۋليە، بابا تۇكتى شاشتى ءازيز، ىسحاق بابا، تۇركىباسى اۋليە، ىسحاق اتا كەسەنەلەرىن اباتتاندىرۋ جوسپارلانۋدا.

جاريالانعان مالىمەتتەرگە سايكەس، قىزىلوردا وبلىسىندا 67 مىڭنان استام جۇمىس ورنىن اشۋ جانە ورتاشا جالاقىنى 164 مىڭ تەڭگەگە دەيىن ارتتىرۋ مىندەتى قويىلىپ وتىر.

شىنى تالشىقتى جەلىلىك جانە جوعارى قىسىمدى سورعى-كومپرەسسورلىق قۇبىرلار شىعاراتىن زاۋىت سالۋ، جالپاق شىنى شىعاراتىن جانە وڭدەيتىن زاۋىتتىڭ قۇرىلىسى، ارال اۋدانىندا تاۋارلىق بالىقتى ءوسىرۋ جانە قايتا وڭدەۋ كەشەنىن كەڭەيتۋ سياقتى ينۆەستيتسيالىق جوبالاردى ىسكە اسىرۋ جوسپاردا بار.

اۋىل تۇرعىندارىنىڭ تابىسىن ارتتىرۋ جانە اۋىل شارۋاشىلىعىن دامىتۋ ءۇشىن سىرداريا وزەنىنىڭ كۇمىسكەتكەن ۋچاسكەسىندە تۇيە سۇتىنەن قۇرعاق ۇنتاق وندىرەتىن زاۋىت جانە سۋ قويماسىن سالۋ كوزدەلىپ وتىر.

بۇگىندە وبلىستا تۇرعىن ءۇي كەزەگىندە 30 مىڭعا جۋىق ادام تۇر. 1 170 كوپقاباتتى تۇرعىن ءۇيدىڭ جارتىسى جوندەۋدى قاجەت ەتەدى. «Nur Otan» پارتياسى حالىقتى تۇرعىن ۇيمەن قامتاماسىز ەتۋ دەڭگەيىن ارتتىرۋ ءۇشىن شامامەن 11 334 پاتەر مەن 26 787 جەكە تۇرعىن ءۇي سالۋ مىندەتىن قويىپ وتىر. قۇرىلىس سالىناتىن اۋدانداردىڭ ينجەنەرلىك-كوممۋنيكاتسيالىق ينفراقۇرىلىمىن دامىتۋعا، كوپ قاباتتى تۇرعىن ۇيلەرگە كۇردەلى جوندەۋ جۇرگىزۋگە ەرەكشە نازار اۋدارىلاتىن بولادى.

مەديتسينالىق قىزمەت كورسەتۋ دەڭگەيىن ارتتىرۋ ماقساتىندا بارلىق قاجەتتى ماتەريالدىق-تەحنيكالىق جابدىقتارمەن قامتاماسىز ەتىلگەن 27 جاڭا دەنساۋلىق ساقتاۋ نىسانىن، 23 اۋىلدىق دارىگەرلىك امبۋلاتوريا سالۋ جوسپارلانعان. سونىمەن قاتار، «Nur Otan» پارتياسى 11 جاڭا مەكتەپ سالۋعا، سونداي-اق 54 ءبىلىم بەرۋ نىسانىنا كۇردەلى جوندەۋ جۇرگىزۋگە ۋادە بەردى.

الماتى وبلىسىندا سايلاۋالدى باعدارلاما اياسىندا وتاندىق وندىرۋشىلەردى قولداۋدى كۇشەيتۋ، اۋىل شارۋاشىلىعى سالاسىندا جاڭا وندىرىستەر قۇرۋ، سونداي-اق كولىك جانە الەۋمەتتىك ينفراقۇرىلىمدى جاقسارتۋ جوسپارلانۋدا.

«Nur Otan» پارتياسىنىڭ باستاماسىمەن الداعى 5 جىلدا وڭىردە 134 مىڭنان استام جۇمىس ورنىن اشىپ، ورتاشا جالاقىنى 136-دان 174 مىڭ تەڭگەگە دەيىن كوتەرۋگە نيەتتى. 35 ينۆەستيتسيالىق جوبا ىسكە اسىرىلادى، ولاردىڭ ىشىندە ءمۇيىزدى ۇساق مال ەتىن وڭدەيتىن ەت زاۋىتىن، كەندى قايتا وڭدەۋ زاۋىتىن، برويلەر باعىتىنداعى قۇس فابريكاسىن سالۋ، سونداي-اق 100 مىڭ ادامعا دەيىن تۇراتىن نۇركەنت قالاسىنىڭ قۇرىلىسى بار.

وڭىردە مال شارۋاشىلىعىندا، وسىمدىك شارۋاشىلىعىندا جانە ءونىمدى قايتا وڭدەۋدە جاڭا تەحنولوگيالاردى ەنگىزۋ بويىنشا جۇمىستار جالعاسادى. 20 مىڭ ءىرى قارا مالعا ارنالعان 26 بورداقىلاۋ الاڭىن، 6,9 مىڭ باسقا ارنالعان 18 ءسۇت-تاۋارلارى فەرماسىن، 3 قۇس فابريكاسىن جانە اۋدانى 34 گا بولاتىن 4 جىلىجايدى سالۋ جوسپارلانۋدا. وسى جانە باسقا دا شارالار 2025 جىلعا قاراي اوك سالاسىندا 10 مىڭنان استام جاڭا تۇراقتى جۇمىس ورىندارىن اشۋعا مۇمكىندىك بەرەدى.

پارتيا ءوڭىر تۇرعىندارىنىڭ ءومىر ءسۇرۋ جاعدايلارىن جاقسارتۋ ءۇشىن 2025 جىلعا قاراي 5,4 ملن.شارشى مەتر تۇرعىن ءۇي سالۋدى قامتاماسىز ەتۋدى ماقسات ەتىپ وتىر.

قازىرگى ۋاقىتتا الماتى وبلىسىندا ءۇش اۋىسىمدى 38 مەكتەپ جۇمىس ىستەيدى، 146 مەكتەپ بەيىمدەلگەن عيماراتتاردا ورنالاسقان. «Nur Otan» پارتياسى ءوزىنىڭ سايلاۋالدى باعدارلاماسى اياسىندا ءۇش اۋىسىمدى وقىتۋدى بولدىرماۋ ءۇشىن 39 جاڭا مەكتەپ، 57 بەيىمدەلگەن مەكتەپتىڭ ورنىنا 45 جاڭا مەكتەپ سالماق. سونداي-اق 92 ءبىلىم بەرۋ نىسانىنا كۇردەلى جوندەۋ جۇرگىزەدى.

سوڭعى جاڭالىقتار