24 قىركۇيەك, 12:18 1323 0 تەحنولوگيالار Túrkistan Gazeti

Google-دا جۇمىس ىستەۋ – قولجەتپەس ارمان ەمەس

اياداي عانا اۋىلدان شىققان بالانىڭ بولاشاقتا الەمنىڭ الپاۋىت كومپانيالارىنىڭ بىرىندە قىزمەت ەتۋى بۇرىن ورىندالماس ارمانداي كورىنەتىن. ال قازىر مۇنىڭ قولدان كەلەتىن ءىس، باعىندىرۋعا بولاتىن بەلەس ەكەنىن دالەلدەپ جۇرگەن وتانداستارىمىز بارشىلىق. تۇركىستان وبلىسى ورداباسى اۋدانىنداعى تەمىرلان اۋىلىندا ءوسىپ-ونگەن باقىتجان تورەباەۆ قازىرگى تاڭدا كرەمني القابىنا قاراستى ساننيۆەيل قالاسىندا ورنالاسقان Google كورپوراتسياسىنىڭ كەڭسەسىندە جۇمىس ىستەيدى. ەڭبەك جولىن ەلىمىزدەگى بانكتەردىڭ بىرىندە پروگرامميست قىزمەتىنەن باستاپ، قازىرگى تاڭدا كۇللى الەم قولداناتىن Google Payments جوباسىندا جاۋاپتى قىزمەت ەتەتىن باقىتجانعا ارنايى حابارلاسىپ، اڭگىمەگە تارتقان ەدىك.

– باقىتجان، شىنى كەرەك، «قازاق بالاسى Google-دا جۇمىس ىستەيدى» دەسە، ەلەڭ ەتە قالا­تىنىمىز راس. اڭگىمەمىزدى كرەمني القابىنا قالاي جەتكەنىڭىزدەن باستاساق.

–وقىرمانعا تۇسىنىكتى بولۋ ءۇشىن اڭگىمەنى ارىدەن باستايىن، مەن 1985 جىلى وڭتۇستىك وڭىردەگى ارىس وزەنىنىڭ جاعاسىندا ورنالاسقان تەمىرلان اۋىلىندا دۇنيەگە كەلدىم. مۇندا باستاپقىدا اباي قۇنان­باەۆ اتىنداعى مەكتەپتە، كەيىننەن 4-سىنىپتان باستاپ شوقان ءۋاليحانوۆ اتىنداعى مەكتەپتە ءبىلىم ا­ل­دىم. 11-سىنىپتا وقىپ جۇرگەنىمدە الماتىداعى ستۋ­دەنت اعام دەمالىس سايىن اۋىلعا كەلگەندە مەنىڭ بولاشاعىمدى ويلاپ، «مىناداي ۋنيۆەرسيتەت بار، وندا وسىنداي ماماندىق بار، سوعان دايىندالۋىڭ كەرەك» دەپ  باعىت-باعدار بەرىپ كەتەتىن.

كەزەكتى ءبىر كەلگەنىندە الماتىدا قازاقستان-بريتان تەحني­كا­لىق ۋنيۆەرسيتەتى اشىلعالى جات­قانىن ايتىپ، مۇنداعى قابىلداۋ ەم­­تيحانىنا قاجەتتى ماتە­ريال­دار­دىڭ بارلىعىن اكەلىپ بەرىپ كەتتى. ءسوي­تىپ، باعىم جانىپ، 2002 جىلى اعام جول سىلتەگەن سول ۋنيۆەرسيتەتكە وقۋعا ءتۇستىم. مۇندا بەس جىل بويى پروگرامميست ماماندىعى بويىنشا وقىدىم. جاڭادان اشىلعان وقۋ ورداسى بولعان سوڭ، ستۋدەنت سانى از بول­دى، وسىلايشا، ءبىر-ءبىرىمىزدى جاقسى تا­نىپ، جاقىن ارالاستىق. ونىڭ ءۇس­تىنە، ءبىلىم بەرۋ جۇيەسى دە جاڭادان جا­ساقتالىپ جاتقاندىقتان، بۇعان قو­سا كادر جەتىسپەۋشىلىگىنەن اعىل­شىن تىلىندە ءوتۋى ءتيىس كەيبىر ءپان ورىس جانە قازاق تىلىندە ءوتتى. اۋىلدان كەلگەن مەن ءۇشىن ورىس جانە اعىل­شىنشا ءتىل سىندىرۋ، سونىمەن قاتار بۇل تىلدەردە ساباق وقۋ وڭاي بولمادى. دەسەك تە، قاتارىمنان قالىسپاي، تى­رى­سىپ-تىرمىسىپ، وقىپ شىقتىم. قبتۋ-دى بىتىرگەن سوڭ، الماتى قالا­سىن­داعى بانكتىڭ بىرىندە بورىشكەرلەرمەن جۇمىس ىستەيتىن ورتالىقتا ەكى جىلداي جۇمىس ىستەدىم. مۇمكىن بىلەرسىز يا بىلمەسسىز، سول جىلدارى حا­لىققا نەسيەنى كوپتەپ بەرەتىن، اقىر سوڭىندا مۇنى حالىقتان قاي­تارا الماي، بورىشكەرلەر ءتىزىمى قۇ­راستىرىلدى، مەن سول ءتىزىمدى سۇرىپ­تاپ، اقپارات جينايتىن ورتالىقتا قىزمەت ەتتىم. كەيىننەن تاعى ءبىر بانك­تىڭ يننوۆاتسيالىق تەحنولوگيالار باسقارماسىندا پروگرامميست قىز­مەتىن اتقارىپ، وندا ءبىر جىلداي ەڭبەك ەتكەن سوڭ، جۇمىستان شىعىپ كەتتىم.

– ءىت سالاسى بويىنشا ەلدە جۇ­مىس ىستەگەن قازاقستاندىقتار «بانك­كە جۇمىسقا ءبىر كىرسەڭ، ءتۇر­مەگە كىرگەندەي بولاسىڭ، بۇل جۇيە­دەن قايتا شىعۋ قيىن، ءسوي­تىپ، دامىماي قالاسىڭ» دەگەندى العا تارتادى. بانكتەگى جۇمى­سىڭىزدى توقتاتۋعا وسىعان ۇقساس سەبەپ بولدى ما؟

– (كۇلىپ). مۇنى تۇرمە دەپ ايتا ال­مايمىن، بانكتەگى جۇمىستىڭ دا وزىندىك ەرەكشەلىگى بار. دەگەنمەن مۇندا ءوز بولاشاعىمدى ەلەستەتە المادىم. ونىڭ ۇستىنە، سول ۋاقىتتا ۇيلەنگەنمىن، ءبىر بالام بار. جاس وتباسىعا الماتى سەكىلدى قىمبات قالادا پاتەر جالداپ تۇرۋ قيىنعا سوعاتىنى بەلگىلى. ونىمەن قوسا، ۇلىمنىڭ بولاشاعىن ويلاپ، ونى جەتىلدىرۋ كەرەك ەكەنىن جەتە ءتۇسىنىپ، تەك ءبىر بانكپەن شەكتەلگىم كەلمەدى. ءسويتىپ، كوزگە كورىنگەن بارلىق مۇمكىندىكتى قاراستىرىپ، جان-جاقتى ىزدەنە باستادىم. سول ۋاقىتتا قبتۋ-دا بىرگە وقىعان دوستارىمنىڭ كەيبىرى كرەمني القابىندا، ەندى ءبىرى باسقا شەتەلدىك ءىرى كومپانيالاردا جۇ­مىس ىستەپ جاتقان بولاتىن. ولارمەن اقىلداسا كەلە، فريمونت قا­لا­سىندا ورنالاسقان سولتۇستىك-باتىس پوليتەحنيكالىق ۋنيۆەرسيتەتىنىڭ (Northwestern polytechnic university) ما­گيستراتۋرا بولىمىنە وقۋعا ءتۇستىم. مۇن­دا ەكى جىل كومپيۋتەرلىك باعدار­لا­مالاۋ بويىنشا ءبىلىم الدىم.

– ءسىز وقۋعا كەتكەندە وتبا­سى­ڭىز اۋىلدا قالىپ قويدى ما؟

– سول ۋاقىتتا وزىممەن بىرگە وتبا­سىمدى الىپ كەتۋگە جاعدايىم بولمادى. قازىر وتكەن ومىرىمە كوز جۇگىرتسەم، «وقيمىن، داميمىن» دەگەن ماعان قارسى تۇرماي، قايتا قولداۋ ءبىل­­دىرىپ، ەلدە بالامەن قالعان ايە­لىم­نىڭ تۇسىنىستىك تانىتقانىنا قاي­ران قالامىن. نەگىزى، ەلدەن كىشىگىرىم قارا­جات جيناپ كەلگەنمىن، ونىڭ ۇستىنە، اعام دا قارجىلاي كومەكتەستى. سون­داي-اق قول بوس كەزدە قوسىمشا جۇمىس ىستەپ، وقۋىمنىڭ اقشاسىن وتەپ ءجۇر­دىم. سەگىز ايدان كەيىن امەريكاعا كە­لىنشەگىمدى الىپ كەلدىم، ال بالامدى اۋىلداعى اتا-انامنىڭ قاراۋىنا قال­دىردىق. مۇندا كەلگەن سوڭ، جولداسىم دا قۇر جاتپاي، تالاپتانىپ، اقى­رىندا باسقارۋ ءىسى بويىنشا ماگيستراتۋرا بولىمىندە ءبىلىمىن شىڭ­دا­دى.

– كرەمني القابىنىڭ ماڭايىن­دا ورنالاسقان ۋني­ۆەرسي­تەتتە وقيتىن كەز كەلگەن ستۋ­دەنت مۇنداعى الپاۋىت كوم­پانيالاردىڭ بىرىندە قىزمەتكە ور­نالاسۋدى ماقسات تۇتاتىنى بەل­گىلى. ءومىربايانىڭىزدى وقى­سام، Google كومپانياسىنا جۇ­مىس­قا تۇرۋ ءۇشىن ءۇش مارتە قۇجات تاپ­سىرىپ، تورتىنشىسىندە عانا قا­بىلدانىپسىز. مۇنداعى كوپ­تە­گەن ءىرى كومپانيانىڭ ىشىنەن نە­لىكتەن تەك Google-عا جۇمىسقا تۇرۋدى كوزدەدىڭىز؟

– كرەمني القابىندا قاپتاعان ۋنيۆەرسيتەتتەردە وقيتىن ستۋدەنت­تەردىڭ سول ماڭدا ورنالاسقان ءىرى كومپانيالاردا جۇمىس ىستەۋگە تالپىناتىنى راس. نەگە تەك Google دەسەڭىز، مۇندا جۇمىس ىستەۋ ستۋدەنت كەزدەن تۋىنداعان ارمان بولاتىن. سو­سىن وقىپ جۇرگەن كەزدە مۇندا جۇمىس ىستەيتىن تانىستار ارقىلى Google-دىڭ كەڭسەسىنە كىرىپ، مۇنداعى قىزمەتكەرلەردىڭ جۇمىس ىستەۋ ءادىسى بىلاي تۇرسىن، كەڭسەنىڭ، ءبىزدىڭ تىلمەن ايتقاندا، كومپانيانىڭ كامپۋسىنا تامسانىپ جۇرەتىنبىز. مۇنداعى جۇمىس ورىندارى كەڭسە رەتىندە ەمەس، ۇلكەن ءبىر قالاشىق رەتىنە سالىنعان. ءسويتىپ، ۋنيۆەرسيتەت بىتىرەردە سوندا جۇمىسقا تۇرۋعا قۇجات تاپسىردىم، الايدا بۇل ارەكەتىمنەن تۇك شىق­پادى، قابىلدامادى. ەسەسىنە، سان-فرانتسيسكو قالاسىندا Brighterion كومپانياسىنان ۇسىنىس كەلىپ ءتۇستى. ءسويتىپ، وقۋىم اياقتالعان كۇننىڭ ەرتەسىندە سول جۇمىسقا شىعىپ كەتتىم. مۇندا ەكى جىل ىستەگەن سوڭ، جۇمىس ورنىمدى اۋىستىرعىم كەلدى. جالپى، ءوز باسىم پروگرامميستكە ەكى-ءۇش جىل سايىن جۇمىسىن اۋىستىرىپ تۇرۋ ءتيىمدى دەپ ەسەپتەيمىن، سەبەبى ءبىر باعىتتاعى تەحنولوگيانى از ۋاقىت­تىڭ ىشىندە تەز مەڭگەرىپ الا­سىڭ دا، ارى قاراي دامىماي قالا­سىڭ. وزىمە كەرەكتىنى يگەرىپ، ما­شىق­تانعان سوڭ، باسقا باعىتتاعى قىز­مەتتى قاراستىر­دىم. ورىندالماي ءجۇر­گەن ارمانىم – Google-عا جۇ­مىسقا تۇرۋعا تاعى دا تا­لاپتاندىم، تاعى جولىم بولمادى، ءۇشىنشى مارتە تاپسىرىپ ەدىم، تاعى دا جاۋاپ جوق. مۇ­نىمەن قاتار، تاعى باسقا كوم­پانيا­لارعا قۇجات تاپ­سىر­عان بو­لاتىن­مىن. ناتيجەسىندە نيۋارك قا­لا­سىندا ورنالاسقان Aport كومپانياسىنان ۇسىنىس ءتۇسىپ، وندا ءتورت جىلداي پروگرامميست بولىپ جۇ­مىس ىستە­دىم. سوسىن الگى Google-مەن باي­لا­­نىستىرعان ماقساتىم مەنمۇن­دا­لاپ، مازا بەرمەي قويعان سوڭ، 2018 جىلى ءتورتىنشى رەت قۇجات تاپسىردىم. ءسويتىپ، بۇل جولى ايىم وڭىنان تۋىپ، اتالمىش كومپانيا قىز­مەت­كەرلەرىنىڭ قاتارىنا قوسىلدىم. قازىر ۋاقىتتى كەرى اينالدىرسا، قبتۋ-دا وقىپ جۇرگەندە كوپتەگەن وليم­پياداعا قاتىساتىن ەدىم، سول وليمپيادالار ارقىلى نەبىر ەسەپتەر شىعارۋدى سول كەزدە ۇيرەنسەم، Google-دىڭ ەسىگىن ءۇش رەت قاقپاي، ءبىرىن­شى رەتتەن-اق جۇمىسقا ورنالاسار ەدىم. ويتكەنى بۇل ەسەپتەردى شى­عارا بىلمەسەڭ، Google-دىڭ كادرمەن قامتۋ ءبولىمى ۇيىمداستىراتىن سۇحباتتان وتە المايسىڭ. بىرگە جۇمىس ىستەيتىن ارىپتەستەرىمنىڭ كوبىسى جاس­تايىنان نەبىر جارىستار مەن وليم­پيادالارعا قاتىسقان، سول سەبەپتى ولارعا مۇنداي ءىرى كومپانياعا جۇ­مىسقا تۇرۋ وڭاي.

– Google-دا قانداي جوباعا جاۋاپ­تىسىز؟

– باستاپقىدا الەمنىڭ ون شاقتى ەلى­نە تەگىن Wi-Fi تاراتاتىن Google stations جوباسىن دامىتۋعا جاۋاپتى كوماندادا جۇمىس ىستەدىم. دەسەك تە، بيىل جىل باسىندا بۇل جوبا كومپانيا ءۇشىن ءتيىمسىز بولۋ سەبەبىنەن جابىلىپ قالدى. ونىڭ ۇستىنە، ينتەرنەت تاراتۋعا قاتىستى ءار ەلدىڭ ءوز زاڭى بار، بىرەۋ مۇنى قۇپتار، ەندى بىرەۋى قۇپ­تاماس. بۇعان قوسا، تەگىن دۇنيە بولعان سوڭ، كومپانياعا تۇسەر پايداسى دا ونشا بولمادى-اۋ. سوسىن بۇل ىسكە جاۋاپتى كوماندانىڭ تەڭ جارتىسى Google payments جوباسىنا اۋىستىق. قازىرگى تاڭدا وسى جوبامەن اينالىسىپ جۇرگەنىمە جارتى جىلداي ۋاقىت بولدى. Google payments تسيفرلىق فورماتتاعى ءاميان ىسپەتتى، مۇندا كەز كەلگەن ءونىمدى Google payments  ءموبيلدى قوسىمشاسى ار­قىلى ساتىپ الا الاسىز. بۇل – ماعان وتە قىزىق، سەبەبى بۇعان دەيىن مەن تەك سەرۆەرلىك جەلىلەر بويىنشا جۇمىس ىستەۋدى ۇيرەنگەنمىن، سوندىقتان ءموبيلدى قوسىمشامەن بايلانىستى مۇنداي ۇلكەن جوبا – مەن ءۇشىن تىڭ نارسە. بۇعان قوسا، مۇندا كوپتەگەن جاڭا تەحنولوگيانى ۇيرەنۋگە ءمۇم­كىندىك بار. بۇگىندە Google ينجەنەرلەرى قۇراستىرعان Flutter (dart) تەحنولوگياسىنا الەم بويىنشا سۇرانىس كوپ، سول سەبەپتى الەم قولداناتىن ءارى تەگىن تۇرعان دۇنيەنى ۇيرەنىپ ءجۇرمىن.

–مۇنداي كومپانيالارعا جۇ­مىسقا قابىلدانۋدىڭ ءوزى بەلگىلى ءبىر كەزەڭدەردەن تۇراتىن كۇردەلى پرو­تسەسس ەكەنىن ءجيى ەستيمىز. ءسىز­دىڭ جاعدايىڭىزدا قالاي بولدى؟

–جۇمىسقا شاقىرتۋ، زاماناۋي تىلمەن ايتقاندا، وففەر العان سوڭ، كومپانيانىڭ كادرمەن قامتۋ ءبولى­مىمەن بايلانىس ورناتاسىز، مۇن­داعىلار قۇجاتتاردى تۇگەندەپ، كومپانيا جۇمىسىمەن تانىستىرادى. سوسىن كەلەسى كەزەڭدە قىرىق بەس مينۋت بويى ونلاين رەجيمدە ەسەپ شىعارۋىڭ كەرەك. كەيىن كەڭسەگە شا­قىرتىلاسىز، مۇندا كۇنى بويى سوندا جۇمىس ىستەيتىن بەس-التى مامان سىزگە باعدارلامالاۋعا قاتىستى ءارتۇرلى باعىتتاعى سۇراقتار قويادى. وسى كە­زەڭ­دەردەن وتكەننەن كەيىن، ارنايى كوميسسيا ناتيجەڭىزدى باعالاپ، الگى مامانداردىڭ بەرگەن باعاسىن سارالاپ، سوڭعى كەزەڭ – كەلىسىمشارت جا­ساسۋعا باعىتتايدى. مەن مۇنى ساۋدالاسۋ دەپ ايتامىن (كۇلىپ). مۇندا اي­لىق، ەڭبەك دەمالىسى بويىنشا ساۋ­دالاساسىڭ. ەلدە ەڭبەكاقى اي سايىن بەرىلەدى عوي، ال مۇندا ولاي ەمەس، تابىس تۇرلەرى كوپ، اپتا، ەكى اپتا سايىن بەرىلەتىنى بار، سوسىن قىز­مەتكەرگە كومپانيا اكتسيا ۇسى­نادى، مۇنىمەن قوسا، جىل سايىن بەل­گىلى ءبىر كولەمدە بونۋس بەرەدى. مەن مۇنداعىلارمەن ارى ساۋدالاسىپ، بەرى ساۋ­دالاسىپ، ناتيجەسىندە ەكى تاراپقا قولايلى ورتاق ءبىر مامىلەگە كەلدىك، دەسەك تە، كەيىن قاراسام ولار ماعان مەن كۇتكەننەن دە كوبىرەك جالاقى تاعايىنداپتى (كۇلىپ).

– سوسىن مۇندا جۇمىس ىستەۋ ءتار­تىبىندە قاتىپ قالعان قاعيدا جوق ەكەن، سول راس پا؟

– ءيا، ول راس. جۇمىسقا بارۋ، قايتۋ ۋاقىتىڭ وزىڭە بايلانىستى. جۇمىس بارىسىمەن كەزدەسۋدى دە وزىڭە ىڭعايلى ۋاقىتقا بەلگىلەپ الاسىڭ. بار بولعانى – وزىڭە مىندەتتەلگەن جۇ­مىستى دەر كەزىندە اياقتاساڭ بول­عانى. دەگەنمەن مۇنداي عيما­رات­تىڭ ىشىنە ءبىر كىرسەڭ، شىققىڭ كەلمەي قالا­تىنىن جوعارىدا ايتىپ ءوتتىم. وندا ءار عيماراتتا ەكى-ءۇش تاماقتا­نا­تىن ورىن بار، مۇندا ءار ەلدىڭ ۇلت­تىق تاعامدارىن ازىرلەيدى. ءما­سەلەن، ءسۋشيدى ۇناتساڭىز، ارعى بەتتە تۇرعان جاپون اسحاناسىنا بارا الاسىز، ءۇندى تاماعىن قالاساڭىز، بەرگى بەتتەگى سول ەلدىڭ تاماعىن ازىرلەيتىن كافەدەن تاماقتانا الاسىز. سوسىن ارنايى جاساقتالعان عيماراتتاردا قىزمەتكەردىڭ بوس كەزىندە اينالىسۋىنا ءتيىمدى كوپتەگەن سەكتسيا جۇمىس ىستەيدى. گيتارا ۇيرەنۋ، پيانينودا ويناۋ، سۋرەت سالۋ سەكىلدى ۇيىرمەلەر بار، مۇنىڭ بارلىعى قىزمەتكەرلەر ءۇشىن تەگىن. ءتىپتى، جۇمىس بارىسىندا كيىمىڭىزدى ابايسىزدا بىلعاپ ال­ساڭىز، ۇيگە بارماي-اق، وسىنداعى ارنايى بولمەدە جۋىپ الساڭىز بولادى. سوسىن مۇندا سپورت سەكتسيالارى دا كوپ، تيىسىنشە قىزمەتكەرلەر اراسىندا كوپتەگەن سايىس ۇيىمداس­تىرى­لادى. ءوزىم فۋتبولعا قىزىعا­تىندىقتان، ارىپتەستەرىممەن ءجيى دوپ تەۋىپ تۇرامىن. جالپى، Google كوم­پا­نياسىنىڭ كرەمني القابىنىڭ ءار ايماعىنداعى فيليالدارىندا وتىز مىڭعا جۋىق قىزمەتكەر جۇمىس ءىس­تەيدى. البەتتە، مۇنداي ءىرى كومپانيا باسشىلىعىنىڭ سان مىڭداعان قىزمەتكەرىنە قولايلى جاعداي جاساپ، وزىندىك مادەنيەت پەن ەرەجەسىن قالىپتاستىراتىنى تۇسىنىكتى جايت. دەگەنمەن، مەن كرەمني القابىندا ءىت استاناسى نەمەسە قولايلى جۇمىس ورنى بولعاندىقتان تۇرىپ جاتقا­نىم جوق. مۇندا ءوزىمدى قاۋىپسىز سەزى­نەمىن، ونىڭ ۇستىنە، اۋا رايى دا قو­لايلى، مۇندا قاتتى سۋىق نەمەسە قات­تى ىستىق بولمايدى. ونىڭ ءۇستى­نە، ءۇش ۇلىمنىڭ وقۋىنا دا قولايلى جەر. 5-سىنىپتا وقيتىن ۇلكەن ۇلىم ءبىز تۇرىپ جاتقان قالادا ءوز جاسىنا قاتىستى كاتەگوريا بويىنشا قا­لالىق فۋتبول كومانداسىندا ونەر كور­سەتەدى. ال جۇبايىم ۇيدە بالا­لار­دىڭ وقۋىنا قارايلاسادى، بۇعان قوسا، قازىر ونلاين رەجيمدە وقۋعا ءماجبۇر بولعاندىقتان، بالالاردىڭ وقۋىنا باسا كوڭىل ءبولۋ قاجەت.

– امستەردامداعى Booking.com كومپانياسىنىڭ باس كەڭسە­سىندە جيىرماعا جۋىق قازاق جۇ­مىس ىستەيدى ەكەن. ال بىرنەشە ءىرى كومپانيانى توعىستىراتىن كرەم­ني القابىندا جۇمىس ءىس­تەي­تىن قازاقتار سانى بۇدان دا كوپ شىعار؟

– بىلۋىمشە، قازىرگى تاڭدا جالپى ال­قاپتا شامامەن وتىز-قىرىق قازاق جۇ­مىس ىستەپ جاتىر. كوپشىلىگىمىز دە­مالىستا، ءتۇرلى مەيرامداردا باس قوسىپ تۇرامىز. مۇندا ءبىر مەكتەپ پەن ۋنيۆەرسيتەتتە وقىعان دوستارىمنان بولەك، ءتىپتى ءبىر اۋىلدا ءوسىپ-ونگەن اۋىلداستارىم دا جۇمىس ىستەيدى. سوسىن وسى جەرگە كەلىپ تانىسقان قازاقتارمەن دە بايلانىسىمىز جاقسى. ال Google-دىڭ كوپتەگەن فيليال­دارىندا جۇمىس ىستەيتىن قازاق­تار ارنايى قۇرىلعان چات ارقى­لى جۇمىسىمىزعا جانە قازاقستانعا قا­­تىستى ماسەلەلەردى تالقىلاپ وتى­را­­مىز.

– ءوزىڭىز سەكىلدى الەمنىڭ ءىرى كوم­پانيالارىندا جۇمىس ىستەيتىن قازاقتار ەلدەگى ءىت سالاسىنىڭ دامۋى كەنجەلەپ تۇر دەگەندى ءجيى ايتادى. بۇل جونىندە ءسىز نە ايتا الاسىز؟

– قازاقستان – جاس مەملەكەت، تاۋەل­سىزدىك العانىمىزعا وتىز جىل ەندى تولادى. ال ءىت سالاسى باتىستا قاي زاماننان بەرى دامىپ كەلە جاتىر. سوڭعى ون جىل ىشىندە قازاقستان با­تىستى قۋىپ جەتپەسە دە، ىلگەرىلەۋ­شى­لىك بار دەپ ايتا الامىن. ارينە، ۇيرەنۋدى، يگەرۋدى قاجەت ەتەتىن جاڭا تەحنولوگيالار جەتەرلىك. دەگەنمەن قازىرگىدەي قولىڭدى سوزساڭ، قالا­عا­نىڭدى الاتىن زاماندا جاڭا تەحنولوگيالار قولجەتىمدى، قولايلى ءارى اسا كۇردەلى ەمەس. سوسىن ەلدە اتقارىلىپ جاتقان جۇمىستى جوققا شىعارۋعا بولمايدى. ەلدە جاڭا تەحنولوگيالارمەن تانىستىرۋ ءۇشىن ءتۇرلى زەرتحانالار اشىلىپ جاتقانىن بىلەمىن. قبتۋ-دا وقىعان تۇرعىلاستارىم دا جاڭا تەحنولوگيالاردى مەڭگەرۋ ءىسىن ءۇي­رەتىپ جۇرگەنىنەن حاباردارمىن. ماسەلەن، سوڭعى رەت ەلگە بارعانىمدا ەل­دەگى كەڭ قولدانىلاتىن ءبىر بانكتىڭ ءموبيلدى قوسىمشاسىنىڭ الەمدىك ستاندارتقا ساي ازىرلەنگەنىن بايقا­دىم. تاعى سول سەكىلدى جاڭالىقتار جە­تەرلىك. سول سەبەپتى ەلدەگى ءىت سالاسى كەن­ج­ەلەپ قالدى دەگەنگە ونشا كەلىس­پەيمىن.

– ءسىز سەكىلدى بولاشاقتا Google كورپوراتسياسىندا جۇمىس ءىس­تەۋدى ماقسات تۇتىپ جۇرگەن قا­زاق­ستاندىق جاستارعا ايتارىڭىز بار ما؟

– Google-عا جۇمىسقا ورنالاسپاي تۇرىپ، مۇنداعى ادامدار وتە ءبىلىمدى، ەش قاتەلەسپەيدى، قۇددى ءبىر روبوتتار سەكىلدى جۇمىس ىستەيدى دەپ ويلايتىنمىن، سويتسەم، مۇنداعىلار دا ءوزىمىز سەكىلدى قاراپايىم ادامدار ەكەن. ولار دا جاڭىلىسادى، ولار دا قاتە شە­شىم قابىلدايدى. دەسەك تە، ولار قاتاڭ دايىندىقتان وتكەن، تەح­نو­لوگيانىڭ «ءتىلىن» ەرتە جاستان مەڭ­گەرگەن، بىراق مۇنى ۇيرەنىپ الۋ اناۋ ايتقانداي قيىن ەمەس. مۇندا كەلگەنگە دەيىن ەكى كومپانيادا جۇمىس ءىس­تەگەنىمدى ايتتىم، قازىر ساراپتاپ قاراسام، مۇنداعى ماماندىقتاردىڭ اسىپ بارا جاتقان تۇگى جوق. ەڭ باستى قىزمەتكەرلەر جۇمىس ىستەۋ ەرەجەسىن جانە اعىلشىن ءتىلىن جاقسى بىلەدى. ءبىز تەك جاڭا ورتاعا بەيىمدەلۋ جانە ءتىل بىلمەۋ جاعىنان عانا اقساپ جات­قا­نىمىز بولماسا، الگى ماماندارمەن تەڭ دارەجەدە جۇمىس ىستەي الامىز. سىزگە مىنانى ايتايىن، ەڭبەك ەتكەن قازاق شەتەلدىڭ مەن دەگەن مامانىنان ارتىق بولماسا، كەم تۇسپەيدى. سوعان كوزىم جەتتى. ارامىزدا جالقاۋ باۋىرلارىمىز دا جوق ەمەس، دەسەك تە، ءبىزدى كوپشىلىك ەڭبەكقور حالىق دەپ تانيدى. سوسىن ءوزىمدى ءومىر بويى ءبىر كومپانياعا جۇمىس ىستەيمىن دەپ ايتا المايمىن. الداعى ۋاقىتتا جەكە جوبا اشقىم كەلەدى، سول كەزدە بۇل جوباعا تاجىريبە جيناقتاعىسى كەلەتىن، بىلىكتىلىگىن ارتتىرۋدى ويلايتىن باۋىر-قارىنداستارىمدى جۇ­مىلدىرىپ، ءوز بىلگەن-كورگەنىممەن ءبولىسىپ، ولارعا جاڭا نارسەنى ءتيىمدى قول­دانۋدىڭ قىر-سىرىن ۇيرەتكىم كەلەدى.

سۇحباتتاسقان

ءاليا تىلەۋجانقىزى

 

 

 

سوڭعى جاڭالىقتار