24 قىركۇيەك, 11:23 1231 0 جاڭالىقتار انار لەپەسوۆا

پارا الۋدان "كوش باستاپ" تۇرعان ايماقتار انىقتالدى

ەلىمىزدە پارا الۋ فاكتىلەرى جيىلەپ كەتتى: بۇل كورسەتكىش ءبىر جىلدا 11%-عا ارتقان. مەملەكەتتىك قىزمەت پەن مەملەكەتتىك باسقارۋ مۇددەلەرىنە قارسى سىبايلاس جەمقورلىق جانە باسقا دا قىلمىستىق قۇقىق بۇزۋشىلىقتاردىڭ ۇشتەن ەكىسى پاراقورلىققا تيەسىلى، دەپ حابارلايدى Finprom.kz.

2020 جىلدىڭ قاڭتار-تامىز ايلارىندا ەلىمىزدە مەملەكەتتىك قىزمەت پەن مەملەكەتتىك باسقارۋ مۇددەلەرىنە قارسى 1,6 مىڭ سىبايلاس جەمقورلىق جانە وزگە دە قىلمىستىق قۇقىق بۇزۋشىلىق تىركەلدى. بۇل ءبىر جىل بۇرىنعى كورسەتكىشپەن سالىستىرعاندا 12,6%-عا تومەن. ولاردىڭ ۇشتەن ەكىسىن پارا الۋ وقيعالارى قۇراپ تۇر.

جىل باستالعالى ەلدە 993 پارا الۋ وقيعاسى تىركەلدى – 2019 جىلدىڭ وسى كەزەڭىمەن سالىستىرعاندا 11,4%-عا كوپ. ونىڭ ىشىندە 555-ءى – پارا الۋ، 404-ءى – پارا بەرۋ، 34 جاعداي – دەلدالدىق وقيعاسى.

ايماقتار بويىنشا پارا الۋ وقيعالارىمەن باتىس قازاقستان وبلىسى «كوشباسشى» بولىپ تۇر – 97 جاعداي، جىلدىق ءوسىم بىردەن ەكى ەسەگە ارتتى. ەكىنشى جانە ءۇشىنشى ورىنداردا الماتى (87 جاعداي، 47,5%) جانە شىعىس قازاقستان (76 جاعداي، مينۋس 3,8%) وبلىستارى تۇر.

 

سوڭعى جاڭالىقتار