24 قىركۇيەك, 10:02 393 0 قوعام انار لەپەسوۆا

82 جاستاعى كەيۋانا العاش رەت جەكە كۋالىك الدى

الماتى وبلىسىندا 82 جاستاعى اجە العاش رەت جەكە كۋالىگىن الدى.

ەگدە جاستاعى ازاماتشاعا قۇجاتتى الماتى وبلىسى پوليتسيا دەپارتامەنتى كوشى-قون قىزمەتىنىڭ وكىلدەرى تابىستادى. بۇدان بولەك، قالانىڭ ءۇش تۇرعىنى جەكە كۋالىكتەرىن ءبىرىنشى رەت رەسمي تۇردە تىركەدى. ەندى بۇل ازاماتتار قازاقستان رەسپۋبليكاسىنىڭ تەڭ قۇقىلى ازاماتتارى بولىپ سانالىپ، لايىقتى زەينەتاقىلارىن الا الادى.

– بىزگە ومىرلىك قيىن جاعدايعا تاپ بولعان ادامدارعا ارنالعان وڭالتۋ ورتالىعىنىڭ قىزمەتكەرى جۇگىندى. ول جەكە باسىن كۋالاندىراتىن قۇجاتتارى جوق ءۇش ادامنىڭ ورتالىقتا ورنالاسقانىن جەتكىزدى. بۇل ادامداردىڭ ەشقاشان قۇجاتتارى بولماعان. كەيبىرىنىڭ ءتىپتى ازاماتتىعى دا جوق ەدى. بارلىق قاجەتتى قۇجاتتاردى جيناپ، ءتيىستى ورگاندارعا كوپتەگەن سۇرانىستى جولداي وتىرىپ، ءبىز ولارعا قۇجاتتاردى تاپسىردىق. بۇدان بىلاي ولار ءبىزدىڭ بارلىق ازاماتتارىمىز سياقتى، مەملەكەتتىك زەينەتاقىعا ۇمىتكەر بولا وتىرىپ، كۇنكورىس ءۇشىن قاراجات الا الادى، – دەپ حابارلادى الماتى وبلىسى پد كوشى-قون قىزمەتى باسقارماسى باستىعىنىڭ ورىنباسارى ەلمۇرات نۇرسەيىتوۆ.

ايتا كەتۋ كەرەك، جىل باسىنان بەرى قازاقستان ازاماتتىعىنا 7508 ازامات قابىلداندى.

− 353 ادام قازاقستان رەسپۋبليكاسىنىڭ ازاماتتارى بولىپ سانالدى جانە تانىلدى. جالپى وبلىس بويىنشا جيىرما بەس مىڭنان استام شەتەل ازاماتى تىركەلگەن. كوشى-قون زاڭناماسىن بۇزعانى ءۇشىن 159 شەتەلدىك ەلدەن شىعارىلدى، – دەپ تولىقتىردى ەلمۇرات نۇرسەيىتوۆ.

 

سوڭعى جاڭالىقتار