23 قىركۇيەك, 21:14 330 0 جاھان انار لەپەسوۆا

پرەزيدەنت حالىقارالىق ەرىكتىلەر جىلىن جاريالاۋدى ۇسىندى

بۇۇ باس اسسامبلەياسى 75-سەسسياسىنىڭ جالپى ساياسي دەباتتارىندا سويلەگەن سوزىندە قازاقستان پرەزيدەنتى قاسىم-جومارت توقاەۆ حالىقارالىق ۆولونتەرلەر جىلىن جاريالاۋدى ۇسىندى.

مەملەكەت باسشىسى بۇۇ-عا مۇشە ەلدەردى الەمدەگى اشتىقتى تولىق جويۋعا جولىندا كۇش بىرىكتىرۋگە شاقىردى. وسى ورايدا، قازاقستاننىڭ باستاماسىمەن قۇرىلعان ازىق-تۇلىك قاۋىپسىزدىگى جونىندەگى يسلام ۇيىمى ازىق-تۇلىك قورلارىن قۇرۋ ارقىلى اۋقىمدى حالىقارالىق گۋمانيتارلىق ناۋقانعا ءوز ۇلەسىن قوسۋعا دايىن ەكەندىگىن باسا ايتتى.

«ءبىز بىردە-ءبىر ادامدى، اسىرەسە، داعدارىستىڭ تاۋقىمەتىن تارتقان ايەلدەردى، جاستاردى، بالالاردى، قارتتاردى، مۇگەدەكتەردى قولداۋسىز جانە كومەكسىز قالدىرماۋ جونىندەگى مىندەتىمىزدى ناقتىلاۋعا ءتيىسپىز. «ۇرپاقتىڭ ازىپ-توزۋىنا الىپ كەلەتىن اپاتتى» بولدىرماۋ ءۇشىن ءبىلىم بەرۋ جۇيەسى تاريحىنداعى ەڭ ۇلكەن توقىراۋعا جول بەرمەۋىمىز كەرەك»،- دەدى قازاقستان پرەزيدەنتى.

قاسىم-جومارت توقاەۆتىڭ ايتۋىنشا، قازىرگى زامانداعى وزەكتى ماسەلەلەردى ءتيىمدى شەشۋگە ازاماتتىق قوعام مەن جەكە سەكتوردىڭ بەلسەندى اتسالىسۋى وتە ماڭىزدى.

«بيىل ۆولونتەرلىك قوزعالىستىڭ بۇكىل الەم حالقىنىڭ ىنتىماقتاستىعىنا سەرپىن بەرگەنىنە كۋا بولدىق. ەرىكتىلەردىڭ ايرىقشا ءرولىنىڭ بەلگىسى رەتىندە بۇۇ-عا دامۋ ماقساتىندا ۆولونتەرلەردى جۇمىلدىرۋدىڭ حالىقارالىق جىلىن جاريالاۋدى ۇسىنامىن. بيىل قازاقستاندا ۆولونتەرلەر جىلى دەپ جاريالاندى»، - دەدى مەملەكەت باسشىسى.

ايتا كەتەيىك، بۇعان دەيىن قاسىم-جومارت توقاەۆ الەم ەلدەرىن كوروناۆيرۋسقا قارسى ۆاكتسينا ازىرلەۋ ءىسىن ساياسيلاندىرماۋعا شاقىردى.

مەملەكەت باسشىسىنىڭ بۇۇ باس اسسامبلەياسى 75-سەسسياسىنىڭ جالپى ساياسي دەباتتارىندا سويلەگەن ءسوزىنىڭ تولىق ماتىنىمەن مىنا سىلتەمە ارقىلى تانىسۋعا بولادى.

 

سوڭعى جاڭالىقتار